واشنگٹن۔ امریکی صدر ڈونالڈ ٹرمپ نے سن 2018 میں واشنگٹن پوسٹ کے کالم نگار جمال خشوگی کے قتل کے بارے میں امریکی انٹیلیجنس کی اس رائے کے باوجود سعودی ولی عہد محمد بن سلمان کا کھل کر دفاع کیا کہ وہ اس واقعے کے ذمہ دار تھے۔ ٹرمپ نے خشوگی کو ایسا شخص قرار دیا جو انتہائی متنازع تھے اور جنہیں بہت سے لوگ پسند نہیں کرتے تھے۔

انہوں نے امریکی انٹیلیجنس کے نتیجے کو مسترد کرتے ہوئے کہا کہ ولی عہد کا اس قتل سے کوئی تعلق نہیں تھا جو استنبول میں سعودی قونصل خانے کے اندر انجام پایا۔ ٹرمپ نے کہا کہ چاہے آپ انہیں پسند کریں یا نہ کریں واقعات ہوتے رہتے ہیں۔ مگر ولی عہد کو اس کے بارے میں کچھ معلوم نہیں تھا۔ اور ہم اسی بات پر رہ سکتے ہیں۔ انہوں نے یہ بھی کہا کہ آپ ہمارے مہمان کو شرمندہ کرنے کے لئے ایسے سوال نہ کریں۔

سی این این کے مطابق یہ بیان سعودی رہنما کے حوالے سے ٹرمپ کے سب سے مضبوط عوامی دفاع میں شمار ہوا۔ ٹرمپ سن 2018 سے بار بار ولی عہد کی تردید کو بنیاد بناتے رہے۔ وہ اکثر امریکی انٹیلیجنس کے جائزے کے مقابلے میں ریاض کے بیانات کو زیادہ اہمیت دیتے تھے۔

خشوگی کے قتل کے فوراً بعد جب ٹرمپ سے پوچھا گیا کہ آیا اس واقعے سے ان کے ریاض کے ساتھ تعلقات پر اثر پڑے گا تو انہوں نے سعودی معاشی تعلقات کی اہمیت پر زور دیا۔ انہوں نے کہا کہ انہیں دیکھنا ہوگا کہ کیا ہوتا ہے۔ انہوں نے کہا کہ وہ نہیں چاہتے کہ وہ بھاری رقوم رک جائیں جو ہندستان میں نہیں بلکہ ہمارے ملک میں آ رہی ہیں۔انہوں نے اس بات کی طرف بھی اشارہ کیا کہ خشوگی امریکی شہری نہیں تھے۔ اگرچہ انہوں نے تسلیم کیا کہ یہ قتل ہمیں بالکل پسند نہیں آیا۔

اسی دن ٹرمپ نے سی بی ایس کو بتایا کہ سعودی رہنما سختی سے تردید کرتے ہیں۔ انہوں نے کہا کہ اگر ایسا ہوا تو امریکہ بہت ناراض ہوگا۔ مگر پھر بھی انہوں نے دفاعی خریداریوں کو خطرے میں ڈالنے سے منع کیا۔سی این این کے مطابق ٹرمپ سعودی تردیدوں کو دہراتے رہے۔ سولہ اکتوبر سن 2018 کو انہوں نے ٹویٹ کیا کہ انہوں نے سعودی ولی عہد سے گفتگو کی ہے جنہوں نے ترک قونصل خانے میں پیش آنے والے واقعے سے لاعلمی کا اظہار کیا ہے۔ انہوں نے کہا کہ اندرونی تحقیقات جاری ہیں اور جلد جواب سامنے آ جائیں گے۔

چند ہفتوں بعد ٹرمپ نے سوال اٹھایا کہ کیا کوئی کبھی یہ جان پائے گا کہ ولی عہد کا کردار کیا تھا۔ انہوں نے کہا کہ کون جان سکتا ہے۔ اگرچہ انہوں نے اس بات کی طرف اشارہ کیا کہ کچھ لوگ جو ولی عہد کے قریب تھے شاید ملوث ہوں۔اگلے دن جب متعدد میڈیا اداروں نے خبر دی کہ سی آئی اے کے جائزے میں ولی عہد کا براہ راست تعلق ظاہر ہوتا ہے تو ٹرمپ نے کہا کہ انہیں بتایا گیا ہے کہ ولی عہد کا کوئی کردار نہیں تھا۔ ساتھ ہی انہوں نے سعودی عرب کو ایک معاشی اور تزویراتی شریک قرار دیا جو بہت سی نوکریاں اور بہت سا کاروبار فراہم کرتا ہے۔

بیس نومبر سن 2018 کو جاری کیے گئے ایک تحریری بیان میں ٹرمپ نے اس قتل کو ناقابل قبول اور ہولناک جرم قرار دیا۔ مگر انہوں نے زور دے کر کہا کہ شاہ سلمان اور ولی عہد اس واقعے سے لاعلمی کا سختی سے اظہار کرتے ہیں۔ انہوں نے لکھا کہ شاید انہوں نے کیا ہو اور شاید نہ کیا ہو۔ اور یہ بھی کہ ہمارا تعلق سعودی عرب کی سلطنت کے ساتھ ہے۔

سی این این کے مطابق بعد میں ٹرمپ نے یہ بھی کہا کہ سی آئی اے نے واضح طور پر یہ نہیں کہا کہ انہوں نے یہ کیا ہے۔ حالانکہ اس کے فوراً بعد ایک خفیہ بریفنگ میں شریک امریکی قانون سازوں نے کہا کہ وہ مطمئن ہیں کہ ولی عہد نے کارروائی کی ہدایت دی تھی۔سن 2019 کے اوائل میں ٹرمپ نے اس قتل کو خوفناک واقعہ قرار دیا اور سعودی عرب کی معاشی اہمیت کا ذکر کیا۔ انہوں نے کہا کہ وہ کسی کے لئے بہانہ نہیں بنانا چاہتے۔ وہ سمجھتے ہیں کہ یہ ایک خوفناک سانحہ تھا۔ یہ ایک خوفناک جرم تھا۔

جون سن 2019 میں جب ایک اقوام متحدہ کے محقق نے ایف بی آئی سے تحقیقات کا مطالبہ کیا تو ٹرمپ نے کہا کہ یہ معاملہ بہت زیادہ تحقیقات سے گزر چکا ہے۔ جب ان سے پوچھا گیا کہ کس نے تحقیقات کی ہیں تو انہوں نے کہا کہ سب نے۔ اور پھر ایک بار سعودی خریداریوں کی اہمیت کو نمایاں کیا۔