تل ابیب

اسرائیلی فوج نے جنوب مغربی ایران میں واقع ایک بڑے صنعتی مرکز پر ہدفی فضائی حملوں کی تصدیق کی ہے، جو سرحد پار فوجی کارروائیوں میں نمایاں توسیع کی نشاندہی کرتا ہے۔سوشل میڈیا پلیٹ فارم ایکس پر جاری ایک مختصر آپریشنل بیان میں اسرائیلی فوج نے کہا کہ اسرائیلی فضائیہ نے حال ہی میں ایران کے اہم اور توانائی سے مالا مال ساحلی علاقے میں واقع ماہشہر پیٹروکیمیکل کمپلیکس کے متعدد مقامات کو نشانہ بنایا۔

ایران کے صنعتی بنیادی ڈھانچے کے خلاف فضائی طاقت کے استعمال میں اس تیزی کو ایک اہم تزویراتی تبدیلی کے طور پر دیکھا جا رہا ہے، کیونکہ دونوں علاقائی حریفوں کے درمیان براہ راست کشیدگی مسلسل بڑھ رہی ہے۔فوجی حکام نے فوری طور پر ان حملوں سے ہونے والے نقصانات یا متاثرہ تنصیبات کی تفصیلات جاری نہیں کیں، تاہم دفاعی ذرائع نے اشارہ دیا کہ بمباری سے ہونے والے نقصانات کا جائزہ مکمل ہونے کے بعد مزید معلومات فراہم کی جائیں گی۔

حکام نے کہا کہ مزید تفصیلات جلد شیئر کی جائیں گی۔یہ صنعتی مراکز پر حملے منگل کو ہونے والی ایک وسیع اور انتہائی کشیدہ فوجی جھڑپ کے فوراً بعد کیے گئے۔ ایرانی خبر رساں ادارے آئی ایس این اے کے مطابق ایران کی جانب سے اسرائیل کی طرف میزائل داغے جانے کے بعد وسطی اور جنوبی اسرائیل میں فضائی حملوں کے سائرن بج اٹھے۔

سوشل میڈیا پلیٹ فارم ایکس پر جاری بیان میں اسرائیلی فضائیہ نے کہا کہ ملک کا جدید فضائی دفاعی نظام آنے والے خطرات کو روکنے کے لیے سرگرم عمل ہے۔اسرائیلی فضائیہ کے مطابق، آئی ڈی ایف نے کچھ دیر قبل ایران سے اسرائیلی علاقے کی جانب داغے گئے میزائلوں کا سراغ لگایا ہے۔ دفاعی نظام خطرے کو ناکام بنانے کے لیے کام کر رہے ہیں۔

میزائل حملوں کے دوران اسرائیل کے داخلی دفاعی نظام نے فوری طور پر ہنگامی اقدامات نافذ کر دیے۔ ہوم فرنٹ کمانڈ نے متاثرہ علاقوں کے رہائشیوں کے موبائل فونز پر پیغامات بھیج کر انہیں محفوظ مقامات پر منتقل ہونے کی ہدایت کی۔

صورتحال کی سنگینی کا اندازہ اس وقت ہوا جب اسرائیل میں امریکہ کے سفیر مائیک ہکابی نے ایک ہنگامی بنکر سے سوشل میڈیا پر پیغام جاری کرتے ہوئے لکھا کہ میں اس وقت شیلٹر میں موجود ہوں۔ اوپر زور دار دھماکوں کی آوازیں سنائی دے رہی ہیں۔ امید ہے کہ یہ میزائلوں کو تباہ کیے جانے کی آوازیں ہیں۔

انہوں نے مزید کہا کہ ایک اور دن جب ہم ایران کی حکومت سے پیدا ہونے والے خطرات کے سائے میں زندگی گزار رہے ہیں۔سلامتی کی صورتحال میں یہ تیزی سے بگاڑ ایسے وقت میں سامنے آیا جب پہلے کی سفارتی کوششیں ناکام ہوتی دکھائی دے رہی ہیں۔مغربی ایشیا میں نازک جنگ بندی پیر کی صبح اس وقت متزلزل ہو گئی تھی جب ایران نے 8 اپریل کے معاہدے کے بعد پہلی مرتبہ اسرائیل پر حملہ کیا۔ اس کے جواب میں اسرائیل نے شدید جوابی کارروائی کی، جس کے دوران ایران کے وسطی اور مغربی علاقوں میں زوردار دھماکوں کی اطلاعات موصول ہوئیں۔

دشمنی کے دوبارہ بھڑک اٹھنے سے جنگ کے مستقل خاتمے کے لیے جاری سفارتی کوششوں پر خطرات کے بادل منڈلانے لگے ہیں۔ یہ تنازع اصل میں 28 فروری کو شروع ہوا تھا۔تشدد میں اس تیزی نے امریکی صدر ڈونلڈ ٹرمپ کی تہران کے ساتھ ایک جامع جوہری معاہدے کے ذریعے بحران کے حل کی کوششوں کو شدید خطرے سے دوچار کر دیا ہے۔

ٹرمپ، جو اسرائیلی وزیر اعظم بنیامین نیتن یاہو پر فوجی تحمل اختیار کرنے کے لیے دباؤ ڈال رہے تھے، نے حال ہی میں کہا کہ بین الاقوامی ثالثی میں آخری فیصلہ انہی کا ہوگا اور نیتن یاہو کو بالآخر مذاکرات کے ذریعے طے شدہ شرائط قبول کرنا ہوں گی۔

اپنے خدشات کا اظہار کرتے ہوئے ٹرمپ نے خبردار کیا کہ اگر بی بی (نیتن یاہو) دوبارہ حملہ کرتے ہیں تو یہ سلسلہ اسی طرح چلتا رہے گا جیسے گزشتہ 47 برسوں سے، یا شاید گزشتہ 3 ہزار برسوں سے چلتا آیا ہے۔

جنگ بندی کے خاتمے کا آغاز اس وقت ہوا جب تہران نے اسرائیل کے فضائی حملوں کے جواب میں میزائل داغے۔ اسرائیل نے یہ حملے بیروت کے جنوبی مضافات میں موجود حزب اللہ کے کمانڈ مراکز کو نشانہ بنا کر کیے تھے، حالانکہ واشنگٹن نے خطے میں کشیدگی نہ بڑھانے کی اپیل کی تھی۔

اس ابتدائی تصادم کے بعد اسلامک ریولوشنری گارڈ کور نے ایک سخت انتباہ جاری کرتے ہوئے کہا کہ اگر مزید کارروائیاں کی گئیں تو اس کا جواب زیادہ وسیع پیمانے پر دیا جائے گا۔بیان میں کہا گیا کہ پورے خطے میں تمام امریکی اور صہیونی اہداف کو نشانہ بنایا جائے گا۔ایرانی فورسز نے خاص طور پر لبنان، ایرانی ساحلی علاقوں اور آبنائے ہرمز سے گزرنے والے بحری جہازوں اور دیگر اثاثوں کو ممکنہ اہداف قرار دیا۔

ان دھمکیوں اور بعد میں ایران کے وسطی و مغربی علاقوں پر ہونے والے حملوں کے نتیجے میں پورے خطے میں سلامتی کے حوالے سے تشویش بڑھ گئی ہے۔ اسی دوران عراقی شیعہ ملیشیا کتائب حزب اللہ نے بھی سخت انتباہ جاری کرتے ہوئے ممکنہ مزید کشیدگی کے نتائج سے خبردار کیا ہے۔