نئی دہلی: اقوام متحدہ کے اگلے سیکریٹری جنرل کے انتخاب کے سلسلے میں سلامتی کونسل کی پہلی غیر رسمی اور خفیہ "اسٹرا پول" ووٹنگ کے ابتدائی اشارے سامنے آئے ہیں، جن میں اقوام متحدہ کی تجارت و ترقی کانفرنس (UNCTAD) کی سربراہ ریبیکا گرینسپان ابتدائی طور پر سب سے آگے نظر آ رہی ہیں۔ تاہم ان کی برتری مستقل ارکان کی ممکنہ ویٹو سیاست کی وجہ سے غیر یقینی بنی ہوئی ہے۔

کانگریس رہنما اور سابق اقوام متحدہ سفارت کار ششی تھرور نے سوشل میڈیا پلیٹ فارم ایکس پر کہا کہ اصل سوال یہ ہے کہ گرینسپان کو ملنے والا واحد "حوصلہ شکنی" (Discourage) ووٹ کیا سلامتی کونسل کے پانچ مستقل ارکان (امریکہ، چین، روس، فرانس یا برطانیہ) میں سے کسی ایک نے دیا ہے؟ اگر ایسا ہے تو یہ عملی طور پر ویٹو کے مترادف ہوگا۔

تھرور نے کہا کہ اگر یہ منفی ووٹ کسی مستقل رکن کی جانب سے ہے، تو یہ دیکھنا ہوگا کہ آیا آئندہ مراحل میں بھی یہ مخالفت برقرار رہتی ہے یا نہیں، خواہ ترقی پذیر ممالک اور چین ان کی حمایت کریں۔ کوسٹا ریکا کی سابق نائب صدر ریبیکا گرینسپان، جو اس وقت یو این سی ٹی اے ڈی کی سربراہ ہیں، ابتدائی ووٹنگ میں سب سے زیادہ حمایت حاصل کرنے والی امیدوار بن کر ابھری ہیں۔ اگر وہ منتخب ہوتی ہیں تو وہ اقوام متحدہ کی پہلی خاتون اور ممکنہ طور پر پہلی لاطینی امریکی سیکریٹری جنرل ہوں گی۔

غیر رسمی ووٹنگ میں سلامتی کونسل کے ارکان ہر امیدوار کے حق میں تین میں سے ایک رائے دیتے ہیں: "حوصلہ افزائی" (Encourage)، "حوصلہ شکنی" (Discourage) یا "کوئی رائے نہیں" (No Opinion)۔ گرینسپان کو اگرچہ وسیع حمایت ملی، تاہم انہیں ایک "حوصلہ شکنی" کا ووٹ بھی ملا۔

ششی تھرور نے مزید کہا کہ دیگر دو نمایاں امیدواروں کو بھی منفی ووٹ ملے ہیں۔ اگر مستقل ارکان مختلف امیدواروں کو ویٹو کرتے رہے تو انتخابی عمل تعطل کا شکار ہو سکتا ہے، جس کے بعد کسی متفقہ اور نسبتاً غیر متنازع امیدوار پر غور کیا جا سکتا ہے۔ جیتنے والے امیدوار کو سلامتی کونسل کے 15 میں سے کم از کم 9 ووٹ حاصل کرنے ہوں گے اور پانچ مستقل ارکان میں سے کسی ایک کے ویٹو سے بھی بچنا ہوگا۔

این ایچ کے کی رپورٹ کے مطابق، موجودہ سیکریٹری جنرل انتونیو گوتریس کی دوسری پانچ سالہ مدت 31 دسمبر 2026 کو مکمل ہو رہی ہے اور ان کی جگہ لینے کے لیے سات امیدوار میدان میں ہیں۔ پہلے مرحلے کی ووٹنگ میں ذرائع کے مطابق گرینسپان کو 10، اقوام متحدہ میں گیانا کی سفیر کیرولن روڈریگیز برکٹ کو 9، جبکہ بین الاقوامی ایٹمی توانائی ایجنسی (IAEA) کے سربراہ رافیل ماریانو گروسی کو 7 "حوصلہ افزائی" کے ووٹ ملے، تاہم ہر امیدوار کو کم از کم ایک "حوصلہ شکنی" کا ووٹ بھی ملا۔ اقوام متحدہ میں امریکہ کے سفیر مائیک والٹز نے کہا کہ حتمی فیصلے میں کئی ماہ لگ سکتے ہیں۔

ان کے مطابق دنیا کو ایسے سیکریٹری جنرل کی ضرورت ہے جو ادارے میں اصلاحات کرے، اسے زیادہ مؤثر اور عالمی سطح پر زیادہ متعلقہ بنائے۔ آنے والے ہفتوں میں مزید خفیہ ووٹنگ کے مراحل ہوں گے، جن کے دوران رکن ممالک کے درمیان سفارتی سرگرمیوں اور مذاکرات میں مزید شدت آنے کا امکان ہے، جبکہ اقوام متحدہ کے دسویں سیکریٹری جنرل کے انتخاب کی دوڑ ابھی پوری طرح کھلی ہوئی ہے۔