کویت سٹی (کویت): مغربی ایشیا اور خلیجی خطے میں تیزی سے بدلتی ہوئی صورتحال کے دوران کویت، اردن اور بحرین نے ہنگامی الرٹ جاری کر دیا ہے، جبکہ فضائی دفاعی نظام مشتبہ فضائی اہداف کو روکنے میں مصروف ہیں۔ کویتی فوج نے سوشل میڈیا پلیٹ فارم ایکس پر جاری بیان میں کہا کہ اس کا فضائی دفاعی نظام "دشمنانہ فضائی اہداف" کو نشانہ بنا رہا ہے۔ فوج نے شہریوں سے اپیل کی کہ وہ حفاظتی اور سکیورٹی ہدایات پر مکمل عمل کریں۔

الجزیرہ کے مطابق کویت نے اپنی فضائی حدود بھی بند کر دی ہیں اور میزائل و ڈرون حملوں کے خطرات سے نمٹنے کے لیے اقدامات کیے جا رہے ہیں۔ ادھر بحرین میں ایک بار پھر فضائی حملے کے سائرن بجائے گئے۔ بحرینی وزارتِ داخلہ نے تصدیق کی کہ خطرے کے پیشِ نظر الارم سسٹم فعال کیا گیا ہے۔ شہریوں سے کہا گیا ہے کہ وہ پرسکون رہیں، قریبی محفوظ مقامات پر منتقل ہو جائیں اور سرکاری ذرائع سے جاری ہدایات پر نظر رکھیں۔

ایرانی سرکاری نشریاتی ادارے پریس ٹی وی کے مطابق اردن میں بھی فضائی دفاعی نظام فعال کر دیا گیا ہے۔ رپورٹ میں دعویٰ کیا گیا کہ یہ اقدام ایران کی جانب سے ایک امریکی فوجی اڈے پر میزائل حملے کے بعد کیا گیا۔ اردن میں امریکی سفارت خانے نے ایک انتباہی بیان میں کہا: "اطلاعات ہیں کہ میزائل، ڈرون یا راکٹ اردن کی فضائی حدود میں موجود ہیں۔ فوری طور پر محفوظ پناہ گاہ اختیار کریں، گھروں کے اندر رہیں اور مقامی اعلانات و انتباہات پر توجہ دیں۔"

یہ پیش رفت ایسے وقت میں سامنے آئی ہے جب ایرانی حکام نے امریکی حملوں کے جواب میں آبنائے ہرمز بند کرنے کا اعلان کیا ہے۔ امریکی سینٹرل کمانڈ (سینٹکام) نے جمعرات کی ابتدائی ساعتوں میں اعلان کیا کہ صدر کے حکم پر ایران میں متعدد مقامات پر مزید "دفاعی نوعیت کے حملے" کیے گئے ہیں۔ سینٹکام کے مطابق یہ حملے ایران کی فوجی نگرانی، مواصلاتی نظام اور فضائی دفاعی تنصیبات کو نشانہ بنانے کے لیے کیے گئے۔

بیان میں کہا گیا: "امریکی میرین کور، فضائیہ اور بحریہ کے دستوں نے ان ایرانی اہداف پر انتہائی درست ہتھیاروں سے حملے کیے جو امریکی افواج اور خطے سے گزرنے والے بین الاقوامی تجارتی جہازوں کے لیے خطرہ سمجھے جا رہے تھے۔" امریکی فوج نے ان حملوں کو ایران کی "بلاجواز اور مسلسل جارحیت" کا جواب قرار دیا۔

دوسری جانب ایرانی میڈیا نے صوبہ قزوین کے شہروں سیرک، کرج اور آبیک میں دھماکوں کی اطلاعات دی ہیں۔ الجزیرہ نے اسلامی انقلابی گارڈ کور (آئی آر جی سی) کے حوالے سے رپورٹ کیا کہ ایران نے امریکی حملوں کے جواب میں 18 اہم امریکی فوجی تنصیبات کو نشانہ بنایا، جن میں کویت کے علی السالم اور احمد الجابر فضائی اڈے، جبکہ بحرین کا شیخ عیسیٰ ایئر بیس بھی شامل ہیں۔ خطے میں جاری اس کشیدگی کے باعث سکیورٹی خدشات میں اضافہ ہو گیا ہے، جبکہ عالمی برادری صورتحال پر گہری نظر رکھے ہوئے ہے۔