ڈھاکہ۔ ہندوستان اور بنگلہ دیش کے ریلوے حکام نے منگل کو ڈھاکہ میں تین روزہ مذاکرات شروع کیے ہیں، جن کا مقصد معطل مسافر ٹرین خدمات کو دوبارہ شروع کرنے کی راہ ہموار کرنا ہے۔ بنگلہ دیش ریلوے کے ایڈیشنل ڈائریکٹر جنرل (آپریشنز) محمد ناظم الاسلام نے اے این آئی سے بات کرتے ہوئے کہا کہ دونوں ملکوں کے درمیان ریلوے رابطے اگست 2024 میں معطل کیے گئے تھے، تاہم ہندوستانی مال بردار ٹرینیں بغیر کسی رکاوٹ کے چل رہی ہیں۔

انہوں نے بتایا کہ تین مسافر ٹرینیں چلتی تھیں۔ میتری ایکسپریس ڈھاکہ کینٹونمنٹ اور چِت پور (کولکاتا) کے درمیان، بندھن ایکسپریس کھلنا اور کولکاتا کے درمیان، جبکہ میتالی ایکسپریس ڈھاکہ کینٹونمنٹ اور نیو جلپائی گوڑی کے درمیان چلتی تھی۔ ہندوستان اور بنگلہ دیش کے درمیان انٹر گورنمنٹل ریلوے میٹنگ (آئی جی آر ایم) اس وقت ڈھاکہ میں جاری ہے، جس میں ٹرین خدمات بحال کرنے پر غور کیا جا رہا ہے۔

انہوں نے کہا، ’’ٹرین خدمات کب بحال ہوں گی یا کون سی مخصوص خدمات دوبارہ شروع کی جائیں گی، اس کا فیصلہ اسی آئی جی آر ایم اجلاس کے بعد کیا جائے گا۔ اجلاس میں ہونے والے فیصلوں کی بنیاد پر آئندہ اقدامات کیے جائیں گے۔‘‘ انہوں نے بتایا کہ ہندوستان کی جانب سے ریلوے بورڈ کے رکن (ٹریفک) اجلاس میں شرکت کر رہے ہیں، جبکہ بنگلہ دیش ریلوے کی نمائندگی اعلیٰ عہدیدار اور وزارت کے نمائندے کر رہے ہیں۔

انہوں نے مزید کہا، ’’مال بردار ٹرین خدمات کبھی بند نہیں ہوئی تھیں اور وہ معمول کے مطابق چل رہی ہیں۔ آئی جی آر ایم اجلاس میں عام طور پر آپریشن اور انتظامیہ سے متعلق مختلف امور پر بات چیت ہوتی ہے۔ ان میں دونوں ملکوں کے درمیان مالی معاملات اور واجبات، سرحد پار ٹرینوں کی آمد و رفت کا حساب، سالانہ حساب کتاب اور تصفیہ، آپریشنل کارکردگی، ریل کوچز اور بنیادی ڈھانچے کی ترقی جیسے معاملات شامل ہیں۔‘

‘ ہندوستان اور بنگلہ دیش کے درمیان سرحد پار ریلوے رابطے جولائی 2024 میں بڑے پیمانے پر ہونے والی شہری بدامنی کے دوران معطل کیے گئے تھے۔ اس بدامنی کے نتیجے میں اس وقت کی وزیر اعظم شیخ حسینہ نے استعفیٰ دیا اور 5 اگست 2024 کو ہندوستان فرار ہوگئیں، جس کے بعد ان کی عوامی لیگ حکومت کا خاتمہ ہوگیا۔ اس کے بعد نوبیل انعام یافتہ محمد یونس کی سربراہی میں ایک عبوری حکومت نے ڈھاکہ میں اقتدار سنبھالا۔

اس دوران دونوں ملکوں کے تعلقات میں مسلسل کشیدگی رہی، خاص طور پر شیخ حسینہ کی ہندوستان میں موجودگی اور ڈھاکہ کی جانب سے ان کی حوالگی کی باضابطہ درخواست کے معاملے پر۔ بنگلہ دیش میں 22 فروری 2026 کو ہونے والے عام انتخابات کے بعد بنگلہ دیش نیشنلسٹ پارٹی نے کامیابی حاصل کی اور یونس کی قیادت والی عبوری حکومت کی جگہ نئی حکومت تشکیل دی۔

طارق رحمان کی قیادت میں نئی حکومت نے اقتدار سنبھالا۔ ہندوستان کی جانب سے 27 جون کو بنگلہ دیشی شہریوں کے لیے سیاحتی ویزوں کا اجرا دوبارہ شروع کیے جانے کے بعد معطل مسافر ٹرینوں کو بحال کرنے کا مطالبہ بھی زور پکڑ رہا ہے۔ مسافروں کی سہولت کے پیش نظر ٹرین خدمات کی بحالی موجودہ آئی جی آر ایم مذاکرات کے اہم ایجنڈوں میں شامل ہے۔