تہران: ایران نے واضح کیا ہے کہ عمان کے ساتھ آبنائے ہرمز میں نئے بحری راستے پر ہونے والی مفاہمت کا مطلب آبنائے ہرمز کو دوبارہ کھولنا نہیں ہے، بلکہ یہ صرف بحری آمدورفت کو محفوظ اور منظم بنانے کے لیے ایک تکنیکی انتظام ہے۔

ایرانی وزارت خارجہ کے ترجمان اسماعیل بقائی نے ایرانی سرکاری نشریاتی ادارے آئی آر آئی بی سے گفتگو کرتے ہوئے کہا کہ آبنائے ہرمز کی بندش امریکہ کی معاہدہ شکنی، ایران کی بحری ناکہ بندی اور اسلامی جمہوریہ ایران کے خلاف مسلسل جارحانہ اقدامات کا نتیجہ ہے۔ انہوں نے کہا، "عمان کے ساتھ نئے بحری راستے پر اتفاق صرف سمندری ٹریفک کو منظم کرنے کی ایک لازمی تکنیکی شرط ہے۔ اس کا ہرگز یہ مطلب نہیں کہ آبنائے ہرمز دوبارہ کھول دی گئی ہے۔"

اسماعیل بقائی نے کہا کہ ایران کسی بھی صورت میں امریکی حکام کے دباؤ یا دھمکیوں سے اپنی پالیسی تبدیل نہیں کرے گا اور اس کے قومی مفادات کا فیصلہ صرف تہران کرے گا۔ ان کے مطابق، عمان کے ساتھ محفوظ بحری راستے کے بارے میں مذاکرات 8 اپریل کے جنگ بندی یادداشت کے بعد شروع ہوئے تھے اور 18 جون کے معاہدے کے بعد ان میں تیزی آئی۔ دونوں ممالک اس وقت ایک نئے ٹریفک سیپریشن اسکیم (TSS) پر کام کر رہے ہیں، جو پرانے شمالی اور غیر محفوظ جنوبی بحری راستوں کی جگہ لے گا۔

بقائی نے زور دے کر کہا کہ ایران کا ہرگز یہ ارادہ نہیں کہ آبنائے ہرمز کی صورتحال کو اس حالت میں واپس لے جایا جائے جو 30 مئی سے پہلے تھی۔ انہوں نے مزید کہا کہ عمان کے ساتھ تکنیکی مذاکرات مثبت انداز میں آگے بڑھ رہے ہیں، لیکن نئے بحری راستے پر اتفاق کا آبنائے ہرمز کو کھولنے یا بند رکھنے کے فیصلے سے کوئی تعلق نہیں۔ ان کے بقول، "یہ ایک ضروری شرط ضرور ہے، لیکن کافی شرط نہیں۔ آبنائے ہرمز کو دوبارہ کھولنے کا فیصلہ ایک الگ معاملہ ہے۔"

ترجمان نے حالیہ امریکی فضائی حملوں، جن میں جزیرہ قشم کے رہائشی علاقوں کو بھی نشانہ بنانے کا دعویٰ کیا گیا، کا حوالہ دیتے ہوئے کہا کہ ایران نے بلغاریہ، برطانیہ، یوکرین اور دیگر ممالک کو خبردار کیا ہے کہ وہ اپنی سرزمین یا فوجی اڈے ایران کے خلاف امریکی کارروائیوں کے لیے استعمال نہ ہونے دیں۔

انہوں نے کہا کہ اقوام متحدہ کی قراردادوں کے مطابق جو ملک کسی جارح ریاست کو فوجی اڈے، سہولیات یا لاجسٹک مدد فراہم کرے گا، اسے بھی جارح فریق تصور کیا جا سکتا ہے، اور ایسی صورت میں ایران کو اپنے دفاع کا حق حاصل ہوگا۔

دوسری جانب، ایرانی صدر مسعود پزشکیان نے بھی ایک بیان میں اسلام آباد مفاہمتی یادداشت کے 14 نکاتی فریم ورک کی حمایت کرتے ہوئے کہا کہ یہ دستاویز شوریٰ کونسل کی اجتماعی دانش کا نتیجہ ہے اور مستقبل میں ایران کی خارجہ پالیسی کا اہم محور ثابت ہوگی۔ انہوں نے کہا کہ اس معاہدے پر عمل درآمد سے ملک، خطے اور اتحادیوں کی سلامتی مزید مضبوط ہوگی۔