بشکیک: وزیر اعظم نریندر مودی نے منگل کو شنگھائی تعاون تنظیم (ایس سی او) کے 26ویں سربراہی اجلاس میں دیگر رکن ممالک کے سربراہان کے ساتھ مشترکہ اعلامیے پر دستخط کیے۔ اس سے قبل بشکیک میں 26ویں شنگھائی تعاون تنظیم کے سربراہی اجلاس سے خطاب کرتے ہوئے وزیر اعظم مودی نے دہشت گردی کے ’’پورے نظام‘‘ کو ختم کرنے کی اپیل کی۔ انہوں نے دہشت گردی کی مالی معاونت، بھرتی، انتہا پسندی کی جانب مائل کرنے اور دہشت گردوں کو محفوظ پناہ گاہیں فراہم کرنے جیسے تمام پہلوؤں کو ختم کرنے پر زور دیا۔

انہوں نے واضح کیا کہ دہشت گردی کے خلاف جنگ میں ’’دوہرے معیار‘‘ کی کوئی گنجائش نہیں ہو سکتی۔ وزیر اعظم مودی نے کہا کہ دہشت گردی پوری انسانیت کے لیے ایک ’’سنگین چیلنج‘‘ بنی ہوئی ہے اور اس کے خلاف جنگ صرف ’’کارروائی اور ردعمل‘‘ کی سوچ تک محدود نہیں رہ سکتی۔

انہوں نے کہا، ’’ہمیں دہشت گردی کے پورے نظام کو ختم کرنا ہوگا، جس میں اس کی مالی معاونت، بھرتی، انتہا پسندی، اور محفوظ پناہ گاہیں شامل ہیں۔ ہمیں متحد ہو کر یہ کہنا ہوگا کہ اس سنگین مسئلے پر دوہرے معیار کی کوئی جگہ نہیں ہے۔ وہ ممالک جو دہشت گردی کو اپنی پالیسی کے ایک ذریعہ کے طور پر استعمال کرتے ہیں اور دہشت گردوں کو پناہ و حمایت فراہم کرتے ہیں، انہیں واضح پیغام دینا ہوگا کہ دہشت گردی کسی کے لیے بھی ’اسٹریٹجک اثاثہ‘ نہیں بن سکتی۔‘‘ وزیر اعظم مودی نے کہا کہ امن اور سلامتی ہندوستان کے لیے ایس سی او کے وژن کا پہلا ستون ہے، جس کے ساتھ ’’رابطہ‘‘ اور ’’مواقع‘‘ بھی اہم ستون ہیں۔

انہوں نے کہا کہ ’’پرامن اور محفوظ یوریشیا‘‘ کی ہماری مشترکہ خواہش افغانستان میں امن و استحکام سے بھی جڑی ہوئی ہے۔ انہوں نے کہا کہ ہندوستان افغانستان کے عوام کی ترقی اور انسانی امداد کے لیے اپنا کردار ادا کرتا رہا ہے اور آئندہ بھی یہ سلسلہ جاری رکھے گا۔ مغربی ایشیا کے بحران کا ذکر کرتے ہوئے وزیر اعظم مودی نے کہا کہ کسی ایک خطے میں ہونے والا تنازع صرف وہیں تک محدود نہیں رہتا، بلکہ اس کے اثرات پوری دنیا کی ’’توانائی کی سلامتی، بحری تجارت اور سپلائی چین‘‘ پر پڑتے ہیں۔ انہوں نے کہا، ’’گلوبل ساؤتھ کے ممالک کو اس کا سب سے زیادہ خمیازہ بھگتنا پڑتا ہے۔

اسی لیے ہندوستان کا موقف رہا ہے کہ تمام کشیدگی اور جنگوں کا حل میدان جنگ میں نہیں بلکہ بات چیت اور سفارت کاری کے ذریعے ہی ممکن ہے۔‘‘ وزیر اعظم مودی نے منشیات کی اسمگلنگ کو نوجوان نسل اور علاقائی سلامتی کے لیے ایک سنگین خطرہ قرار دیتے ہوئے ایس سی او کے ان ادارہ جاتی نظام کے ذریعے مزید مضبوط تعاون کی اپیل کی جو سلامتی کے خطرات، منظم جرائم، اطلاعاتی سلامتی اور منشیات سے متعلق معاملات سے نمٹتے ہیں۔ انہوں نے کہا، ’’ہمیں انہیں عملی رابطہ کاری اور بروقت کارروائی کے مؤثر ذرائع بنانا ہوگا۔‘‘ وزیر اعظم مودی نے زور دیا کہ ایس سی او کے تعاون کے فوائد براہِ راست عوام تک پہنچنے چاہئیں اور عوامی سطح پر تعلقات کو اس تعاون کا مرکز بنایا جانا چاہیے۔

انہوں نے کہا، ’’ایس سی او تعاون کے فوائد براہِ راست ہمارے عوام تک پہنچنے چاہئیں۔ ہماری سب سے بڑی طاقت ہمارے عوام کے درمیان تعلقات ہیں۔ ہندوستان کے لیے ایس سی او عظیم تہذیبوں، ثقافتوں اور خیالات کا سنگم ہے۔ ایس سی او کے اگلے 25 برسوں میں عوامی سطح کے تعلقات کو ہمارے تعاون کے مرکز میں رکھا جانا چاہیے۔‘‘ انہوں نے کہا کہ ہماری کامیابی کا حقیقی پیمانہ یہ ہونا چاہیے کہ ہماری کوششوں سے نوجوانوں کے لیے کتنے نئے مواقع پیدا ہوئے، ہمارے کاروباری افراد کے لیے کتنی نئی منڈیاں کھلیں، ٹیکنالوجی سے ہمارے کسانوں کو کتنا فائدہ پہنچا اور ہمارے شہریوں کی زندگی کتنی بہتر ہوئی۔

وزیر اعظم نے کہا، ’’یہی ’سلامتی، رابطہ اور مواقع‘ کا حقیقی مفہوم ہے۔‘‘ کرغزستان کے صدر صدر صادیر جاپاروف ایس سی او سربراہی اجلاس کی میزبانی کر رہے ہیں اور تنظیم کے چیئرمین کی حیثیت سے بھی ذمہ داریاں انجام دے رہے ہیں۔ وزیر اعظم نریندر مودی کے ساتھ چینی صدر شی جن پنگ، روسی صدر ولادیمیر پوتن، پاکستان کے وزیر اعظم شہباز شریف، ایرانی صدر مسعود پزشکیان، بیلاروس کے صدر الیگزینڈر لوکاشینکو، قازقستان کے صدر قاسم جومارت توکایف، ازبکستان کے صدر شوکت مرزیایوف اور تاجکستان کے صدر امام علی رحمان بھی ایس سی او اجلاس میں موجود ہیں۔ ایس سی او کا 26واں سربراہی اجلاس 10 رکن ممالک، 15 شراکت دار ممالک اور دو مبصر ممالک کو ایک ساتھ لایا ہے، جہاں علاقائی اور عالمی امور پر بات چیت اور تعاون کو آگے بڑھانے پر غور کیا جا رہا ہے۔