ڈھاکہ: بنگلہ دیش نیشنلسٹ پارٹی (بی این پی) کے چیئرمین اور بنگلہ دیش کے وزیر اعظم طارق رحمان کے مشیر سید معظم حسین علّال نے جمعرات کو سابق وزیر اعظم شیخ حسینہ کی 2024 میں اقتدار سے ہٹائے جانے کے بعد پہلی بار ہندوستان سے کی گئی ورچوئل میڈیا گفتگو کی سخت مذمت کرتے ہوئے کہا کہ نئی دہلی کی جانب سے اس کی اجازت دینے سے دونوں ممالک کے تعلقات متاثر ہوں گے۔ علّال نے کہا کہ بی این پی ہندوستان کی جانب سے شیخ حسینہ کو یہ خطاب کرنے کی اجازت دیے جانے کی سخت مخالف ہے۔

انہوں نے اس معاملے کو 5 اگست 2024 کے بعد بنگلہ دیش میں پیدا ہونے والی سیاسی صورتحال سے جوڑا، جب طلبہ کی قیادت میں ہونے والی تحریک کے بعد شیخ حسینہ اقتدار سے بے دخل ہو گئی تھیں۔ انہوں نے کہا، "ہم اس کی سخت مذمت کرتے ہیں اور ہندوستانی حکومت کی جانب سے شیخ حسینہ کو تقریر کی اجازت دینے کے فیصلے کی بھی مذمت کرتے ہیں، کیونکہ یہ بنگلہ دیش اور ہندوستان کے تعلقات کے لیے انتہائی نقصان دہ ہے۔ 5 اگست بنگلہ دیش میں جمہوریت، عوامی شرکت پر مبنی حکومت، آزادی اور آزاد میڈیا کی بحالی کا عظیم دن ہے۔"

یہ بیان اس کے ایک روز بعد سامنے آیا، جب شیخ حسینہ نے بدھ کے روز نئی دہلی میں فارن کوریسپونڈنٹس کلب آف ساؤتھ ایشیا کے زیر اہتمام ایک نجی تقریب میں ورچوئل خطاب کیا۔ ادھر ہندوستان نے اس تقریب سے خود کو الگ رکھتے ہوئے واضح کیا کہ اس پروگرام سے حکومت کا کوئی تعلق نہیں ہے۔

منگل کو وزارت خارجہ کے ترجمان رندھیر جیسوال نے میڈیا بریفنگ کے دوران کہا تھا کہ یہ پروگرام ایک نجی میڈیا ادارہ منعقد کر رہا ہے اور حکومت ہند کا اس سے کوئی تعلق نہیں، نہ ہی وہ وہاں پیش کیے جانے والے خیالات کی توثیق کرتی ہے۔

انہوں نے کہا، "جس تقریب کا آپ ذکر کر رہے ہیں، وہ ایک نجی میڈیا ادارے کی جانب سے منعقد کی جا رہی ہے۔ حکومت کا اس سے کوئی تعلق نہیں ہے اور نہ ہی وہ وہاں پیش کیے جانے والے خیالات کی حمایت کرتی ہے۔" سید معظم حسین علّال نے مزید مطالبہ کیا کہ شیخ حسینہ اور عوامی لیگ کے وہ دیگر رہنما، جو اس وقت ہندوستان میں موجود ہیں، انہیں بنگلہ دیش کے حوالے کیا جائے۔ انہوں نے کہا، "شیخ حسینہ اور دیگر سزا یافتہ افراد، جو ہندوستان میں موجود ہیں، انہیں بنگلہ دیش واپس بھیجا جانا چاہیے اور حکومت کے حوالے کیا جانا چاہیے۔"

یاد رہے کہ گزشتہ سال دسمبر میں بنگلہ دیش کے انٹرنیشنل کرائمز ٹریبونل (آئی سی ٹی) نے 2024 کے جولائی اور اگست میں ہونے والے احتجاج کے دوران انسانیت کے خلاف جرائم کے ایک مقدمے میں شیخ حسینہ اور سابق وزیر داخلہ اسد الزمان خان کمال کو سزائے موت سنائی تھی، جبکہ سابق پولیس سربراہ چودھری عبداللہ المامون، جو سرکاری گواہ بن گئے تھے، کو پانچ سال قید کی سزا دی گئی تھی۔ اس فیصلے کے بعد ڈھاکہ نے ہندوستان سے مطالبہ کیا تھا کہ دونوں سزا یافتہ افراد کو فوری طور پر بنگلہ دیش کے حوالے کیا جائے۔

علّال نے شیخ حسینہ کے صاحبزادے سجیب واجد کے اس بیان پر بھی تنقید کی، جس میں انہوں نے کہا تھا کہ ہندوستان کی مشرقی سرحد پر بنگلہ دیش "ایک اور پاکستان" بن چکا ہے۔ انہوں نے اس بیان کو "توہین آمیز اور ریاست مخالف" قرار دیتے ہوئے کہا کہ ایسے بیانات ناقابل قبول ہیں۔