کاراکاس

 وینزویلا کے وزیر خارجہ ایوان گل نے ہفتے کے روز "آپریشن امیستاد" کے تحت ہندوستان کی جانب سے قائم کیے گئے فیلڈ اسپتال کا دورہ کیا اور وہاں فراہم کی جانے والی طبی خدمات کی تعریف کی۔

دورے کے اختتام پر میڈیا سے گفتگو کرتے ہوئے ایوان گل نے کہا کہ انہوں نے وینزویلا میں ہندوستان کے سفیر پی کے اشوک بابو کے ساتھ مل کر دونوں ممالک کے درمیان یکجہتی اور بھائی چارے کا ایک متاثر کن مظاہرہ دیکھا ہے۔ انہوں نے وزیر اعظم نریندر مودی کا شکریہ ادا کرتے ہوئے کہا کہ ہندوستان نے مشکل وقت میں وینزویلا کا ساتھ دیا ہے۔

انہوں نے کہا کہ ہم آپ کو بتانا چاہتے ہیں کہ ہم نے اس فیلڈ اسپتال کا دورہ کیا ہے، جسے دوست اور برادر ملک ہندوستان کی حکومت نے قائم کیا ہے۔ ہمارے ساتھ وینزویلا میں ہندوستان کے سفیر اشوک بابو، آپریشن کی نگرانی کرنے والے حکام اور نیشنل ہپپوڈروم انسٹی ٹیوٹ کے صدر جولیو لیون بھی موجود ہیں، جنہوں نے اس اسپتال کے قیام کے لیے سہولیات فراہم کی ہیں۔ایوان گل نے بتایا کہ ہندوستانی ماہرین روزانہ تقریباً 400 افراد کا علاج کر رہے ہیں اور انہیں مختلف طبی سہولیات فراہم کی جا رہی ہیں۔

انہوں نے کہا کہ ہم نے دیکھا کہ روزانہ تقریباً 400 افراد کو مختلف اقسام کی طبی امداد دی جا رہی ہے۔ زلزلے کے دوران زخمی ہونے والے افراد، ہڈیوں کے فریکچر، اندرونی چوٹوں کے مریضوں کا علاج کیا جا رہا ہے۔ اس کے علاوہ دانتوں کا علاج، ایکس رے کی سہولت، معمولی جراحی کے آپریشن بھی کیے جا رہے ہیں۔ ہم نے ان امدادی کارکنوں کا علاج بھی دیکھا جو ریسکیو کارروائیوں کے دوران زخمی ہوئے تھے۔

انہوں نے کہا کہ وینزویلا کی قائم مقام صدر ڈیلسی روڈریگز کے حالیہ دورۂ ہندوستان کے بعد یہ تعاون دونوں ممالک کے درمیان بھائی چارے کی بہترین مثال ہے۔ایوان گل نے کہا کہ میں حکومتِ ہند اور وزیر اعظم نریندر مودی کا شکریہ ادا کرنا چاہتا ہوں۔ ہم نے حال ہی میں ہندوستان کا دورہ کیا تھا، اور آج ہم بھائی چارے کی ایک زندہ مثال دیکھ رہے ہیں۔ یہ عوام کے درمیان بھائی چارے کا رشتہ ہے، جو وینزویلا کے عوام کے غم کی اس گھڑی میں ان کے ساتھ کھڑا ہے۔ میں ایک بار پھر دہراتا ہوں کہ اس فیلڈ اسپتال میں روزانہ 400 سے زائد افراد کا علاج کیا جا رہا ہے، جن میں زیادہ تر 24 جون کے زلزلے سے متاثر ہونے والے افراد شامل ہیں۔

وینزویلا کے وزیر خارجہ نے ہندوستان کے لیے اپنی حکومت اور عوام کی جانب سے محبت اور تشکر کا اظہار بھی کیا۔انہوں نے کہا کہ ہمارے پاس شکریہ ادا کرنے کے لیے الفاظ نہیں ہیں۔ براہِ کرم وینزویلا کی قائم مقام صدر ڈیلسی روڈریگز کی جانب سے حکومتِ ہند تک ہماری محبت، احترام اور تشکر کا پیغام پہنچا دیں۔ ہم ہندوستان کی مسلح افواج کے اہلکاروں، ڈاکٹروں، نرسوں اور طبی عملے کے بے حد شکر گزار ہیں، جو گزشتہ کئی دنوں سے چوبیس گھنٹے مسلسل خدمات انجام دے رہے ہیں۔انہوں نے کہا کہ وینزویلا کے عوام تنہا نہیں ہیں اور صدر ڈیلسی روڈریگز تمام امدادی کارروائیوں کی قیادت کر رہی ہیں۔

دریں اثنا، عالمی ادارۂ صحت (ڈبلیو ایچ او) کے ڈائریکٹر جنرل ٹیڈروس ادھانوم گیبریئسس نے کہا ہے کہ گزشتہ ہفتے وینزویلا میں آنے والے زلزلے میں اب تک 2,300 سے زائد افراد ہلاک، 5,000 سے زیادہ زخمی اور تقریباً 16,000 افراد بے گھر ہو چکے ہیں۔

انہوں نے ایکس پر اپنی پوسٹ میں کہا کہ وینزویلا میں گزشتہ ہفتے آنے والے زلزلے کے نتیجے میں 2,300 سے زیادہ افراد ہلاک، 5,000 سے زائد زخمی اور تقریباً 16,000 افراد بے گھر ہوئے ہیں۔ جیسے جیسے تلاش اور بچاؤ کی کارروائیاں بحالی کے مرحلے میں داخل ہو رہی ہیں، ہلاکتوں میں مزید اضافے کا خدشہ ہے۔

انہوں نے مزید کہا کہ عالمی ادارۂ صحت زمینی سطح پر ہنگامی طبی ٹیموں کے ساتھ مل کر زخمیوں کے علاج اور قومی صحت کے نظام کو ضروری طبی خدمات کی فراہمی میں معاونت کر رہا ہے۔ ادارے نے اب تک چھ میٹرک ٹن سے زائد ہنگامی طبی سامان فراہم کیا ہے، جبکہ مزید 28 میٹرک ٹن سامان روانہ کیا جا رہا ہے۔ اس کے علاوہ ہنگامی فنڈ سے 15 لاکھ ڈالر بھی جاری کیے گئے ہیں۔

ٹیڈروس کے مطابق، یہ قدرتی آفت وینزویلا میں پہلے سے موجود انسانی بحران کو مزید سنگین بنا رہی ہے اور صحت کے نظام پر اضافی دباؤ ڈال رہی ہے۔