ماسکو: روس کے صدر ولادیمیر پوتن نے کہا ہے کہ روس یوکرین میں جاری اپنی "خصوصی فوجی کارروائی" کے تمام مقاصد حاصل کرے گا۔ انہوں نے مغربی ممالک پر "روس دشمنی" (Russophobia) کی مہم چلانے اور روس کو کمزور کرنے کی کوشش کرنے کا الزام بھی عائد کیا۔

روسی وزارتِ خارجہ کے مطابق، پوتن نے پیر کو ماسکو میں وفاقی اسمبلی کی آٹھویں اسٹیٹ ڈوما کے ارکان سے خطاب کرتے ہوئے کہا کہ گزشتہ پانچ برس روس کے لیے نہایت مشکل اور فیصلہ کن رہے، کیونکہ اس دوران ملک اور عوام کے مستقبل کا سوال درپیش تھا۔ انہوں نے کہا، "ہم اپنے مقاصد حاصل کریں گے اور مل کر روس کی فتح کے لیے ہر ممکن کوشش کریں گے۔"

پوتن نے روس کی خودمختاری کو مضبوط بنانے اور قومی مفادات کے تحفظ کے لیے قانون سازوں کی خدمات کو سراہتے ہوئے کہا کہ روس اپنی سلامتی اور آزادی کے دفاع کے لیے پرعزم ہے۔ انہوں نے کہا کہ "خصوصی فوجی کارروائی میں شریک ہمارے فوجی روس اور اپنے وطن کے لیے بہادری سے لڑ رہے ہیں، اور انہیں پوری قوم اور معاشرے کی حمایت حاصل ہے۔"

پوتن نے کہا کہ روس نے اپنی تاریخ میں ہر بیرونی خطرے کا مقابلہ قومی اتحاد کے ذریعے کیا ہے اور آج بھی یہی جذبہ برقرار ہے۔ انہوں نے مغربی ممالک پر اقوام متحدہ کے منشور کے اصولوں کو دوہرے معیار کے ساتھ استعمال کرنے کا الزام لگاتے ہوئے کہا کہ مغرب صرف اپنی سہولت کے مطابق "حقِ خود ارادیت" کا حوالہ دیتا ہے۔

پوتن نے دعویٰ کیا کہ 2022 سے مغربی ممالک نے روس پر ریکارڈ تعداد میں پابندیاں عائد کیں، لیکن یہ پابندیاں اپنے مقاصد حاصل کرنے میں ناکام رہیں۔ انہوں نے مزید الزام لگایا کہ میدانِ جنگ میں ناکامی کے بعد روس کے مخالفین نے روسی عوام کے خلاف "براہِ راست دہشت گردانہ طریقے" اختیار کر لیے ہیں۔

انہوں نے کہا، "روس کے عوام کو کبھی شکست نہیں دی جا سکتی۔ نہ ماضی میں دی گئی اور نہ آئندہ دی جا سکے گی۔" پوتن نے روس کے سیاسی نظام کا دفاع کرتے ہوئے کہا کہ ملک کے ادارے آئین کی بنیاد پر قائم ہیں اور ریاست کے خلاف ہر قسم کی کارروائی کا مقابلہ کرنے کی صلاحیت رکھتے ہیں۔ یہ بیان ایسے وقت میں سامنے آیا ہے جب یوکرین میں جنگ جاری ہے، روس اپنی فوجی مہم برقرار رکھے ہوئے ہے، جبکہ مغربی ممالک یوکرین کی فوجی مدد جاری رکھنے کے ساتھ روس پر مختلف پابندیاں بھی عائد کیے ہوئے ہیں۔

ادھر یوکرین کے صدر ولودیمیر زیلنسکی امریکہ پہنچ گئے ہیں، جہاں وائٹ ہاؤس میں امریکی صدر ڈونلڈ ٹرمپ سے ان کی ملاقات متوقع ہے۔ وائٹ ہاؤس کے ایک عہدیدار نے سی این این کو بتایا کہ اس ملاقات میں روس-یوکرین جنگ کے خاتمے اور امن عمل پر بات ہوگی اور "اب جنگ ختم کرنے کا وقت آ گیا ہے۔"

اس سے قبل پیر کے روز ٹرمپ نے زیلنسکی کے اس الزام کو مسترد کر دیا تھا کہ روس، ایران کو امریکی فوجی اڈوں سے متعلق انٹیلی جنس فراہم کر رہا ہے۔ ٹرمپ نے کہا، "مجھے نہیں لگتا کہ وہ ایسا کر رہے ہیں، کم از کم بڑے پیمانے پر تو ہرگز نہیں۔"