کیف: یوکرین کے صدر ولودیمیر زیلنسکی نے اتوار کو خبردار کیا ہے کہ روس فوج کی ایک نئی بڑی بھرتی کی تیاری کر رہا ہے اور توقع ہے کہ ماسکو یوکرین میں اپنی فوجی کارروائیوں کو وسعت دینے کے لیے کم از کم 3 لاکھ مزید فوجیوں کو متحرک کرے گا۔سی این این کے مطابق زیلنسکی نے کہا کہ انہیں توقع ہے کہ روس رواں سال کے اختتام تک بھاری جانی نقصان کے باوجود یوکرین کے اتنے ہی علاقے پر قابض ہوگا جتنا سال کے آغاز میں تھا۔ زیلنسکی نے دعویٰ کیا کہ رواں سال کے آغاز سے اب تک روس کے 267000 اہلکار ہلاک یا زخمی ہوچکے ہیں جن میں تقریباً 155000 ہلاک ہوئے ہیں۔

زیلنسکی کے مطابق روسی صدر ولادیمیر پوتن مشرقی یوکرین کی صورت حال کے مطابق 3 لاکھ نئے بھرتی کیے گئے فوجیوں کو تعینات کرنے کا ارادہ رکھتے ہیں اور انہوں نے روسی فوجی قیادت کو سال کے اختتام تک دونیتسک پر قبضہ مکمل کرنے کی ہدایت دی ہے۔ زیلنسکی نے دعویٰ کیا کہ روس ان 3 لاکھ نئے فوجیوں کو بھی اسی محاذ پر کھو دے گا۔

زیلنسکی نے سماجی ذرائع ابلاغ پر متعدد پیغامات میں روسی رسد اور تجارتی ڈھانچے کو طویل فاصلے سے نشانہ بنانے والی کارروائیوں کے بارے میں بھی تفصیلات بیان کیں۔ انہوں نے روس کے اندر عوامی رائے میں تبدیلی کا دعویٰ کرتے ہوئے مغربی ممالک سے یوکرین کے لیے اہم فضائی دفاعی نظام فراہم کرنے کی فوری اپیل کی۔زیلنسکی نے کہا کہ یوکرین کے داخلی جائزوں کے مطابق روسی معاشرے کے 60 فیصد سے زیادہ افراد اب جنگ کے خاتمے کے حامی ہیں۔ ان کے مطابق روس میں جنگ اور صدر پوتن کی حکومت کے لیے عوامی حمایت میں واضح کمی دیکھی جا رہی ہے۔

انہوں نے روسی اپوزیشن جماعت یابلکو کا حوالہ دیتے ہوئے کہا کہ انتخابات میں اس جماعت کی ممکنہ حمایت میں اضافہ دیکھا گیا تھا جس کے بعد اسے انتخابی فہرست سے خارج کردیا گیا۔ روس کی سپریم کورٹ نے رواں ماہ پارلیمانی انتخابات کے لیے یابلکو کی رجسٹریشن منسوخ کردی تھی۔ یورونیوز کے مطابق اس فیصلے کے بعد یہ جماعت یوکرین میں روس کی جنگ کی مخالفت کرنے والی واحد باضابطہ طور پر رجسٹرڈ سیاسی جماعت کے طور پر انتخابی عمل سے باہر ہوگئی۔

طویل فاصلے تک مار کرنے والی کارروائیوں میں اضافے کے حوالے سے زیلنسکی نے کہا کہ روسی رسدی نیٹ ورک اور تجارتی اداروں کو نشانہ بنانے والی کارروائیاں روس کی جانب سے یوکرین کے شہری بنیادی ڈھانچے اور رسدی نظام پر مسلسل حملوں کا جواب ہیں۔ انہوں نے روسی برقی تجارت کی بڑی کمپنی وائلڈ بیریز کو نشانہ بنانے کی ایک کارروائی کا بھی ذکر کیا اور دعویٰ کیا کہ اس سے روس کو تقریباً ایک کھرب روبل کا براہ راست نقصان پہنچا جبکہ قرضوں اور کاروباری تنظیم نو کو شامل کرنے کے بعد مجموعی اثر 3 کھرب روبل تک پہنچ گیا۔

موسم سرما سے قبل روس کی جانب سے یوکرین کے رسدی نظام اور شہری بنیادی ڈھانچے کے خلاف ممکنہ فضائی حملوں کا مقابلہ کرنے کے لیے زیلنسکی نے مغربی اتحادیوں سے فضائی دفاعی میزائل فراہم کرنے کی ایک بار پھر اپیل کی۔ انہوں نے خاص طور پر پیٹریاٹ میزائل نظام کے لیے مزید میزائلوں کی ضرورت پر زور دیا۔زیلنسکی نے کہا کہ یوکرین دیگر اقسام کے میزائلوں کو روکنے میں خاصی مؤثر صلاحیت حاصل کرچکا ہے اور اس کے پاس آئی آر آئی ایس ٹی اور ہاک سمیت مختلف فضائی دفاعی نظام موجود ہیں۔ تاہم ان کے مطابق بیلسٹک میزائلوں کے خلاف دفاع اب بھی ایک بڑا چیلنج ہے۔انہوں نے بتایا کہ یوکرین کی وزارت دفاع کو اس وقت 27 ارب ڈالر کے بجٹ خسارے کا سامنا ہے۔ زیلنسکی نے کہا کہ وہ موسم سرما کے دفاعی منصوبے کے تحت پیٹریاٹ نظام کے لیے 300 میزائل حاصل کرنا چاہتے تھے جبکہ فضائیہ نے 360 میزائلوں کی درخواست کی ہے۔ ان کے مطابق دنیا بھر میں ایک سال میں صرف تقریباً 600 ایسے میزائل تیار ہوتے ہیں جس کی وجہ سے مطلوبہ تعداد حاصل کرنا مشکل ہے۔

زیلنسکی نے امریکہ سے اپنے ذخائر میں موجود پیٹریاٹ میزائلوں کا 5 یا 10 فیصد حصہ یوکرین کو فراہم کرنے کی اپیل بھی کی اور کہا کہ یوکرین ان میزائلوں کی قیمت ادا کرنے کے لیے تیار ہے۔دوسری جانب روسی صدر ولادیمیر پوتن نے دعویٰ کیا ہے کہ یوکرین نے روس کے اقتصادی اور شہری بنیادی ڈھانچے کو نشانہ بنا کر ’’پنڈورا کا ڈبہ‘‘ کھول دیا ہے اور اب اسے روسی جوابی کارروائی کے نتیجے میں ایک ’’تباہ کن صورت حال‘‘ کا سامنا ہے۔پوتن کے مطابق کیف پس پردہ رابطوں کے ذریعے موجودہ صورتحال کو تباہ کن مرحلے تک پہنچنے سے روکنے کی کوشش کر رہا ہے تاہم ان کے بقول یوکرین کی موجودہ سمت واضح ہے۔