کیف : روس نے یوکرین بھر میں بڑے پیمانے پر میزائل اور ڈرون حملے کیے، جن میں توانائی کے مراکز اور رہائشی علاقے نشانہ بنے۔ ان حملوں میں کم از کم دو افراد ہلاک اور کئی زخمی ہوئے، جن میں بچے بھی شامل ہیں، جب کہ مختلف علاقوں میں بجلی کی فراہمی بری طرح متاثر ہوئی، فرانس 24 نے رپورٹ کیا۔

یوکرینی صدر وولودیمیر زیلنسکی نے اپنے بیان میں کہا کہ روسی افواج نے نو علاقوں میں شہریوں اور توانائی کے ڈھانچے پر حملہ کیا، جن میں دارالحکومت کیف بھی شامل ہے۔

انہوں نے مغربی اتحادیوں سے اپیل کی کہ "امریکہ، یورپ اور جی-7 ممالک ماسکو کے تباہ کن ارادوں کو نظر انداز نہ کریں۔" زیلنسکی نے روس پر مزید پابندیاں عائد کرنے کا مطالبہ کیا تاکہ اس کی جارحیت روکی جا سکے۔

یوکرین کی سب سے بڑی نجی توانائی کمپنی ڈی ٹی ای کے (DTEK) نے تصدیق کی کہ اس کے کئی پاور پلانٹس کو نقصان پہنچا ہے۔ کمپنی کے سی ای او میکسم تیمچینکو نے کہا، "یہ ہمارے لیے ایک بڑا دھچکا ہے، خاص طور پر اس موسمِ سرما میں بجلی بحال رکھنے کی کوششوں کے دوران۔"

مغربی علاقے لیوو (Lviv) کے حکام نے بتایا کہ دو توانائی مراکز پر حملے کیے گئے۔ یوکرین کی وزارتِ توانائی کے مطابق "ایک بڑی تعداد میں صارفین" بجلی سے محروم ہو گئے، تاہم درست اعداد و شمار نہیں بتائے گئے۔

یوکرینی فضائیہ کے مطابق روس نے اس حملے میں 52 میزائل اور 653 ڈرون استعمال کیے، جن میں سے 623 کو فضا میں ہی مار گرایا گیا۔ یہ رواں سال یوکرین کے توانائی نظام پر ہونے والے سب سے بڑے حملوں میں سے ایک تھا۔

جنوب مشرقی شہر زاپوریزیا میں دو افراد ہلاک اور 17 زخمی ہوئے، جن میں چھ بچے شامل ہیں۔

دوسری جانب روسی وزارتِ دفاع نے اس "بڑے پیمانے کے حملے" کی ذمہ داری قبول کرتے ہوئے کہا کہ اس نے یوکرین کے "فوجی و صنعتی مراکز، توانائی کے ڈھانچے اور فضائی اڈوں" کو نشانہ بنایا۔ روس نے دعویٰ کیا کہ اس نے رات کے دوران 170 یوکرینی ڈرون بھی مار گرائے، جن میں سے 48 برینسک علاقے اور نو ماسکو کے قریب تھے۔

روسی فوج نے مزید اعلان کیا کہ اس نے خارکیف کے علاقے میں سادووے (Sadove) اور زاپوریزیا کے علاقے میں کراسنوگیرسکے (Krasnogirske) نامی دو دیہات پر قبضہ کر لیا ہے، جنہیں ماسکو اپنی زمین قرار دیتا ہے۔

خیال رہے کہ روس 2022 میں جنگ کے آغاز سے ہی ہر موسمِ سرما میں یوکرین کے بجلی کے نظام کو نشانہ بناتا آیا ہے، جس سے کیف کو بجلی کی راشننگ اور درآمدی توانائی پر انحصار کرنا پڑا۔

دوسری طرف یوکرین نے بھی جوابی کارروائی میں روس کے تیل کے مراکز اور توانائی تنصیبات پر حملے تیز کر دیے ہیں۔ تاہم، امریکی صدر ڈونلڈ ٹرمپ کی جانب سے امن معاہدے کی کوششوں کے باوجود کوئی ٹھوس سفارتی پیش رفت نہیں ہو سکی۔