کولمبو: ہندوستانی وکٹ کیپر بلے باز رشبھ پنت نے لیجنڈری ایم ایس دھونی کو پیچھے چھوڑتے ہوئے ہندوستانی ریکارڈ بک میں اپنا نام درج کرا لیا ہے۔ وہ بیرون ملک یا غیر جانب دار مقام پر کھیلے گئے ٹیسٹ میچوں میں بطور وکٹ کیپر ہندوستان کے لیے سب سے زیادہ رنز بنانے والے کھلاڑی بن گئے ہیں۔

پنت نے یہ اعزاز پیر کو کولمبو میں سری لنکا کے خلاف دوسرے ٹیسٹ کے دوران حاصل کیا۔ رپورٹ لکھے جانے تک پنت نے 41.68 کی اوسط سے 2,501 رنز بنا لیے تھے، جبکہ دھونی کے نام 2,496 رنز تھے۔ اس فہرست میں فرخ انجینئر 1,209 رنز کے ساتھ تیسرے، سید کرمانی 1,109 رنز کے ساتھ چوتھے اور کرن مور 901 رنز کے ساتھ پانچویں نمبر پر ہیں۔

پنت کو کولمبو میں سری لنکا کے خلاف دوسرے ٹیسٹ کے پہلے روز بائیں بازو پر گیند لگنے کے بعد ریٹائرڈ ہرٹ ہونا پڑا تھا۔ یہ واقعہ تیسرے سیشن میں پیش آیا، جب سری لنکا کے فاسٹ بولر لہیرو کمارا نے پنت کو شارٹ گیند کرائی۔ ہندوستانی بلے باز نے گیند کو اسکوائر کے پیچھے پل کرنے کی کوشش کی، لیکن ناکام رہے اور گیند ان کے بائیں بازو پر جا لگی۔ چوٹ لگنے کے بعد پنت واضح طور پر تکلیف میں نظر آئے اور ہندوستانی ٹیم کے فزیوتھراپسٹ نے فوری طور پر ان کی دیکھ بھال کی۔

ابتدا میں ان کے بازو پر آئس پیک رکھا گیا، پھر اسے پٹی سے باندھا گیا، تاہم پنت کی تکلیف برقرار رہنے کے باعث بعد میں ٹیپ ہٹا دی گئی۔ 15 گیندوں پر تین رنز بنانے کے بعد پنت ہندوستانی اننگز کے 58ویں اوور میں فزیوتھراپسٹ کے ساتھ میدان سے باہر چلے گئے۔ تاہم دوسرے روز سری لنکا کے اسیتھا فرنینڈو نے سارنش جین کو 6 رنز پر آؤٹ کر کے سری لنکا کو چھٹی وکٹ دلائی، جس کے بعد پنت دوبارہ بیٹنگ کے لیے میدان میں اترے۔

پنت نے دھرو جریل کے ساتھ مل کر اننگز کو سنبھالا اور ہندوستان کو ایک مضبوط مجموعے کی جانب لے جانے کی کوشش کی۔ سری لنکا کے فاسٹ بولرز نے شارٹ پچ گیندوں سے پنت کو مسلسل پریشان کیا اور ڈرنکس بریک تک ان کے کندھے پر بھی دو گیندیں لگیں۔ اس کے باوجود پنت نے بہترین حوصلے کا مظاہرہ کیا، جبکہ دھرو جریل نے بھی بھرپور ساتھ دیا۔ دونوں نے مل کر ہندوستانی اننگز کو سنبھالتے ہوئے ڈرنکس بریک تک 47 رنز کی قیمتی شراکت قائم کی۔