تل ابیب: اسرائیلی انٹیلی جنس ایجنسی موساد کے دو سینئر افسران کو ایران میں حکومت کی تبدیلی کی ناکام حکمت عملی تیار کرنے میں مبینہ کردار کے بعد عہدوں سے ہٹا دیا گیا ہے۔ اسرائیلی ٹیلی ویژن کے مطابق موساد میں وسیع تر تنظیمی تبدیلیاں بھی کی جا رہی ہیں۔
اسرائیلی چینل 12 کے مطابق موساد کے ڈائریکٹر رومان گوفمان نے ایجنسی میں جاری تنظیم نو کے تحت دونوں افسران کو ان کے موجودہ عہدوں سے ہٹایا۔ ان میں سے ایک گزشتہ دسمبر سے موساد کے انٹیلی جنس ڈائریکٹوریٹ کا سربراہ تھا، جبکہ دوسرا ایران ڈویژن کی قیادت کر رہا تھا۔
رپورٹ کے مطابق دونوں افسران اس تحریری آپریشنل منصوبے کے معماروں میں شامل تھے جس کا مقصد ایران میں اقلیتی گروہوں کی حمایت اور حکومت کے خلاف بڑے پیمانے پر احتجاج کی حوصلہ افزائی کے ذریعے اسلامی جمہوریہ کو چیلنج کرنا تھا۔ چینل 12 کے مطابق یہ منصوبہ اسرائیلی وزیر اعظم بنیامین نیتن یاہو نے فروری میں امریکی صدر ڈونلڈ ٹرمپ کو ایران کے خلاف فوجی کارروائی پر آمادہ کرنے کی کوشش کے دوران زیر بحث لایا تھا۔ اسرائیلی ذرائع کے مطابق دونوں افسران کے موساد کے سربراہ گوفمان کے ساتھ ابتدا ہی سے اختلافات تھے۔
تاہم ذرائع نے بتایا کہ دونوں کی رخصتی باہمی رضامندی سے ہوئی اور یہ موساد میں وسیع تر تنظیم نو کا حصہ ہے۔ دونوں افسران کے ایجنسی میں دیگر عہدوں پر کام جاری رکھنے کی توقع ہے۔ نیویارک ٹائمز کی ایک رپورٹ کے مطابق موساد کی مبینہ حکمت عملی میں ایران اور عراق کی سرحد کے قریب، خاص طور پر ایرانی کردستان میں، پاسداران انقلاب اسلامی (IRGC) کے ٹھکانوں پر اسرائیلی حملے بھی شامل تھے۔ مبینہ منصوبے کے تحت ان حملوں کے ذریعے کرد جنگجوؤں کے لیے ایران میں داخل ہوکر ملک کے شمال مغربی کرد اکثریتی علاقوں کی جانب پیش قدمی کا موقع پیدا کرنا تھا۔
منصوبہ سازوں کو توقع تھی کہ ہزاروں نوجوان کرد مسلح گروہوں میں شامل ہو سکتے ہیں اور یہ تحریک آگے چل کر تہران تک وسیع عوامی بغاوت کی شکل اختیار کر سکتی ہے۔ رپورٹس کے مطابق اس حکمت عملی کا ایک مقصد ایران میں وسیع پیمانے پر احتجاجی تحریک کو بھی ہوا دینا تھا، تاکہ حکومت کو کمزور کیا جا سکے۔ مبینہ منصوبے میں سابق ایرانی صدر محمود احمدی نژاد کو ملک کا رہنما بنانے کا امکان بھی شامل تھا۔
نیویارک ٹائمز کے مطابق اسرائیل نے احمدی نژاد سے رابطے قائم کرنے کے لیے کئی سال تک کوششیں کیں، جس میں مبینہ طور پر ہنگری میں ایک علمی کانفرنس کے موقع پر اس وقت کے موساد سربراہ ڈیوڈ برنیا سے ان کی ملاقات بھی شامل تھی۔ حالیہ تنازع کے دوران اسرائیل اور امریکہ نے ایران کے سکیورٹی ڈھانچے، فوجی تنصیبات، میزائل نظام، پولیس اسٹیشنوں اور شمال مغربی ایران میں بسیج کے ٹھکانوں سمیت مختلف اہداف پر بڑے پیمانے پر حملے کیے۔
تاہم متعدد رپورٹس کے مطابق ترکی کی سفارتی کوششوں اور کرد گروہوں کے اپنے تحفظات کے باعث واشنگٹن نے اسرائیل کی مبینہ حکومت کی تبدیلی کی حکمت عملی کو ترک کر دیا۔ اس مبینہ حکمت عملی کا وسیع تر مقصد ایران کی فوجی صلاحیتوں کو کمزور کرنے کے ساتھ ساتھ اس کے جوہری اور بیلسٹک میزائل پروگراموں سے لاحق خطرات کو کم کرنا بھی تھا۔ نیویارک ٹائمز نے اپریل میں امریکی حکام کے حوالے سے بتایا تھا کہ ٹرمپ انتظامیہ کے بعض ارکان اس خیال کے حامی تھے کہ ایران کی قیادت کو ہٹایا جا سکتا ہے اور اس کی فوجی صلاحیتوں کو نمایاں طور پر کمزور کیا جا سکتا ہے۔ تاہم بعد میں ٹرمپ انتظامیہ کے اعلیٰ حکام نے نیتن یاہو کی حکومت کی تبدیلی سے متعلق پیش گوئی کو ’’مضحکہ خیز‘‘ اور ’’بکواس‘‘ قرار دیا تھا۔
