نئی دہلی: وزیر دفاع راج ناتھ سنگھ نے جمعرات کے روز پڑوسی ملک پاکستان کو خبردار کرتے ہوئے کہا کہ اگر اس نے دوبارہ بھارت کی طرف میلی آنکھ سے دیکھنے کی کوشش کی تو “وہ کچھ ہوگا جو اب تک کبھی نہیں ہوا۔” راجستھان کے ناگور ضلع کے میڑتا قصبے میں راجپوت حکمراں راؤ دودا کے مجسمے کی نقاب کشائی کے بعد عوامی اجتماع سے خطاب کرتے ہوئے انہوں نے کہا کہ وزیر اعظم نریندر مودی کی قیادت میں بھارتی حکومت نے دنیا کو واضح پیغام دے دیا ہے کہ دہشت گردی کو کسی صورت برداشت نہیں کیا جائے گا۔

انہوں نے کہا کہ بھارتی افواج کے “آپریشن سندور” نے نئی تاریخ رقم کی ہے۔ راج ناتھ سنگھ نے کہا: “شاید پاکستان اب دوبارہ بھارت کی طرف نظر اٹھانے کی جرات نہ کرے، اور آج میں اس سرزمین سے یہ کہہ کر جا رہا ہوں کہ اگر پاکستان نے دوبارہ بھارت کے خلاف جرات کی تو وہ ہوگا جو اب تک کبھی نہیں ہوا۔”

انہوں نے مزید کہا: “ابتدا سے ہماری پالیسی رہی ہے کہ ہم کسی کو چھیڑتے نہیں، لیکن اگر کوئی ہمیں چھیڑے تو ہم اسے چھوڑتے بھی نہیں ہیں۔” پہلگام دہشت گرد حملے کا ذکر کرتے ہوئے وزیر دفاع نے کہا کہ دہشت گردوں نے لوگوں سے ان کا مذہب پوچھ کر انہیں قتل کیا۔

انہوں نے کہا: “ہماری بھارتی تہذیب یہ سکھاتی ہے کہ ذات یا مذہب کی بنیاد پر کوئی تقسیم نہیں ہونی چاہیے۔ ہم انصاف اور انسانیت پر یقین رکھتے ہیں، لیکن پاکستان کے دہشت گرد لوگوں سے ان کا مذہب پوچھ کر انہیں گولیوں سے بھون رہے تھے۔” راج ناتھ سنگھ نے کہا کہ پورا ملک اس واقعے پر غم و غصے میں تھا، جس کے بعد بھارت نے ایسا “منہ توڑ جواب” دیا کہ دشمن کے “ہوش اڑ گئے”۔ انہوں نے کہا: “ہم نے ثابت کر دیا کہ بھارت اب خاموشی سے سب کچھ برداشت کرنے والا ملک نہیں رہا۔ اگر کوئی ہمارے شہریوں پر حملہ کرے گا تو ہم اس کے گھر میں گھس کر جواب دیں گے۔ یہ پیغام ہم نے دے دیا ہے۔”