نئی دہلی: وزیر دفاع راج ناتھ سنگھ نے منگل کے روز سری لنکا کا تین روزہ سرکاری دورہ شروع کیا۔ اس دوران وہ سری لنکا کی قیادت کے ساتھ مختلف باہمی امور پر اعلیٰ سطحی مذاکرات کریں گے اور کولمبو میں ہندوستانی تارکین وطن سے بھی ملاقات کریں گے۔ راج ناتھ سنگھ نے روانگی کا اعلان کرتے ہوئے ایکس پر لکھا، ’’تین روزہ سرکاری دورے پر نئی دہلی سے سری لنکا کے لیے روانہ ہو رہا ہوں۔‘‘

اپنے سفارتی دورے کے ایجنڈے پر روشنی ڈالتے ہوئے انہوں نے کہا، ’’میں دورے کے دوران سری لنکا کی قیادت کے ساتھ مفید بات چیت کا منتظر ہوں۔ میں سری لنکا میں متحرک ہندوستانی برادری سے بھی ملاقات کروں گا۔‘‘ وزیر دفاع نے دونوں ملکوں کے درمیان تعلقات کی اسٹریٹجک اہمیت کو اجاگر کرتے ہوئے کہا کہ سری لنکا کے ساتھ ہندوستان کی دیرینہ شراکت داری اور گہرے تاریخی و تہذیبی روابط ہیں۔

انہوں نے کہا کہ سری لنکا ’پڑوسی پہلے‘ (Neighbourhood First) اور ’مہاساگر‘ (MAHASAGAR) اقدامات کے تحت ہندوستان کے اہم ترین شراکت داروں میں شامل ہے۔ وزارت دفاع کی جانب سے جاری بیان کے مطابق، یہ دورہ باہمی مفاد کے مختلف شعبوں میں دونوں ممالک کے دیرینہ اور دوستانہ تعلقات کو مزید مضبوط بنانے کے لیے اہم ہے۔ اس میں خاص طور پر بحری اور سکیورٹی تعاون پر زور دیا جائے گا۔ بیان میں کہا گیا کہ ہندوستان اور سری لنکا کے درمیان گہرے تہذیبی روابط اور کئی شعبوں پر مشتمل شراکت داری ہے، جس کی بنیاد علاقائی سلامتی، دفاع، اقتصادی و تجارتی تعاون اور عوام سے عوام کے مضبوط روابط پر قائم ہے۔

بیان کے مطابق، دونوں ملکوں کے تعلقات کو اس وقت مزید تقویت ملی جب اقتصادی بحران کے دوران ہندوستان نے سری لنکا کی مدد کی۔ اس کے علاوہ 2025 میں سری لنکا میں آنے والے سمندری طوفان ’دتوہ‘ کے بعد ہندوستان نے ابتدائی امدادی کارروائیوں میں شامل ہوتے ہوئے سری لنکا کو مدد فراہم کی۔ وزارت دفاع نے کہا کہ یہ دورہ ’پڑوسی پہلے‘ کی پالیسی اور وزیر اعظم نریندر مودی کے ’مہاساگر‘ وژن کے تئیں ہندوستان کے مسلسل عزم کی بھی عکاسی کرتا ہے۔

’مہاساگر‘ سے مراد خطوں میں سلامتی اور ترقی کے لیے باہمی اور جامع پیش رفت ہے۔ ہندوستان کی جانب سے سری لنکا کو طوفان ’دتوہ‘ کے بعد فراہم کیے گئے 450 ملین امریکی ڈالر کے تعمیر نو پیکیج سے بھی دونوں ملکوں کے تعلقات کو نئی رفتار ملی ہے۔ اس پیکیج کے تحت سڑکوں، ریلوے اور پلوں کے بنیادی ڈھانچے کی بحالی، مکانات کی تعمیر نو، صحت، تعلیم، زراعت اور قدرتی آفات سے نمٹنے کی صلاحیتوں کو بہتر بنانے پر توجہ دی گئی ہے۔

راج ناتھ سنگھ کا موجودہ دورہ حالیہ اعلیٰ سطحی رابطوں کا تسلسل ہے۔ اگست میں سری لنکا کی بحریہ کے کمانڈر وائس ایڈمرل ڈیمیان فرنینڈو نے ہندوستان کا سرکاری دورہ کیا تھا۔ اس دوران انہوں نے چیف آف ڈیفنس اسٹاف جنرل این ایس راجا سبرامنی سے ملاقات کرکے دونوں ملکوں کے درمیان دفاعی تعاون کا جائزہ لیا تھا۔ ہیڈکوارٹرز آف انٹیگریٹڈ ڈیفنس اسٹاف نے ایکس پر اس ملاقات کے بارے میں کہا تھا کہ جنرل این ایس راجا سبرامنی اور وائس ایڈمرل ڈیمیان فرنینڈو نے موجودہ دو طرفہ دفاعی تعاون کا جائزہ لیا، مشترکہ فوجی تربیت اور صلاحیتوں میں اضافے کے لیے نئے امکانات تلاش کیے اور علاقائی سلامتی سے متعلق اہم امور پر تبادلہ خیال کیا۔

وائس ایڈمرل فرنینڈو نے دفاعی سکریٹری راجیش کمار سنگھ سے بھی ملاقات کی اور دو طرفہ دفاعی تعاون کے منصوبے کے تحت طے شدہ اقدامات پر عمل درآمد پر تبادلہ خیال کیا۔ انہوں نے ہندوستانی بحریہ کے سربراہ ایڈمرل کرشنا سوامی ناتھن سے بھی ملاقات کی۔ اس دوران بحری سلامتی کے تعاون کو مزید مضبوط بنانے پر گفتگو ہوئی۔ ہندوستانی بحریہ کے مطابق، دونوں فریقوں نے ’مہاساگر‘ وژن کے تحت بحر ہند کے خطے میں امن اور استحکام برقرار رکھنے کے عزم کا اعادہ کیا۔