دوحہ : قطر کی وزارت خارجہ کے ترجمان ماجد الانصاری نے کہا کہ مصر میں ہونے والے مذاکرات کا محور ان بنیادی رکاوٹوں کو دور کرنا ہے جو ’’اس المناک جنگ کے خاتمے‘‘ میں حائل ہیں۔اس کا انکشاف روزنامہ  ڈان نے کیا ۔الجزیرہ کے مطابق قطر امریکی صدر ڈونلڈ ٹرمپ کے امن منصوبے سے متعلق جاری مذاکرات کی کامیابی اور غزہ میں ایک جامع جنگ بندی کے حصول کے لیے پُرعزم ہے تاکہ اس المناک جنگ کا خاتمہ ممکن بنایا جا سکے۔

فی الحال مذاکرات کا مرکز ان ’’اہم رکاوٹوں‘‘ کی نشاندہی پر ہے جو ٹرمپ کے منصوبے کے نفاذ میں حائل ہیں اور ساتھ ہی ’’اس کے عملی نفاذ کی تفصیلات واضح کرنے‘‘ پر توجہ دی جا رہی ہے۔بات چیت کے دوران بعض تفصیلات پر غور کیا گیا جن میں غزہ میں بین الاقوامی افواج کی تعیناتی، قیدیوں اور یرغمالیوں کے تبادلے، اور انسانی امداد کی فراہمی کے مسائل شامل ہیں۔

ترجمان نے کہا کہ ’’تمام فریق اس منصوبے کی بھرپور حمایت کر رہے ہیں اور اتفاق رائے کے لیے کوشاں ہیں‘‘ تاہم ’’متعدد تکنیکی پہلو‘‘ ابھی تک حل طلب ہیں۔الجزیرہ کے مطابق یہ مذاکرات اس 20 نکاتی منصوبے پر مبنی ہیں جو صدر ٹرمپ نے جنگ کے خاتمے کے لیے پیش کیا ہے۔ٹرمپ نے صحافیوں سے گفتگو کرتے ہوئے کہا، ’’حقیقی امکان ہے کہ ہم کچھ کر سکتے ہیں۔ میرا خیال ہے کہ مشرق وسطیٰ میں امن قائم ہونے کا امکان موجود ہے۔‘‘

ٹرمپ نے کہا کہ اگر حماس اور اسرائیل جنگ بندی پر متفق ہو جاتے ہیں تو امریکہ یہ یقینی بنانے کے لیے ’’ہر ممکن اقدام‘‘ کرے گا کہ تمام فریق معاہدے پر عمل کریں، تاہم انہوں نے مزید وضاحت نہیں کی۔نیدرلینڈز کے وزیر خارجہ ڈیوڈ فان ویل نے مصر کی جانب سے رفحہ سرحدی گزرگاہ کا دورہ کیا اور امید ظاہر کی کہ امریکی صدر ڈونلڈ ٹرمپ کا امن منصوبہ اس گزرگاہ کو مکمل طور پر کھولنے اور قحط زدہ غزہ میں انسانی امداد کے بہاؤ میں مددگار ثابت ہوگا، جیسا کہ الجزیرہ نے رپورٹ کیا۔

رفحہ کراسنگ پر ایک پریس کانفرنس سے خطاب کرتے ہوئے فان ویل نے غزہ میں بگڑتی ہوئی انسانی صورتحال پر ’’گہری تشویش‘‘ کا اظہار کیا اور امداد اور زخمیوں کی منتقلی میں مصر کے کردار کو سراہا۔انہوں نے امید ظاہر کی کہ ٹرمپ کی تجویز ’’زمینی حالات میں بہتری لائے گی اور فلسطینی جانب سے گزرگاہ کو مکمل طور پر کھولنے میں مدد دے گی تاکہ امداد کے بہاؤ کو آسان بنایا جا سکے۔‘الجزیرہ کے مطابق ہزاروں ٹرک جن میں طبی اور خوراکی سامان موجود ہے اسرائیلی اجازت کے منتظر ہیں تاکہ وہ محصور غزہ میں داخل ہو سکیں۔