واشنگٹن ڈی سی/ آواز دی وائس

امریکی صدر ڈونالڈ ٹرمپ نے جمعرات کے روز کہا کہ امریکی وفد کی یوکرین امن تجویز پر روسی صدر کے ساتھ ہونے والی بات چیت "بہت اچھی" رہی، جس سے یہ "تاثر" ملا کہ ولادیمیر پیوٹن "جنگ ختم کرنا چاہتے ہیں"۔

بدھ کے روز امریکی خصوصی ایلچی اسٹیو وٹکوف اور ٹرمپ کے داماد نے ماسکو میں روسی صدر ولادیمیر پیوٹن کے ساتھ پانچ گھنٹے طویل مذاکرات کیے۔ گفتگو کا مرکزی موضوع فروری 2022 میں شروع ہونے والے روس۔یوکرین تنازعے کو ختم کرنا تھا۔

ٹرمپ نے وائٹ ہاؤس کے اوول آفس میں صحافیوں سے گفتگو کرتے ہوئے کہا کہ پیوٹن کی کل جیرڈ کُشنر اور اسٹیو وٹکوف کے ساتھ بہت اچھی ملاقات ہوئی۔ اس ملاقات کے نتائج کیا ہوں گے، میں نہیں بتا سکتا کیونکہ اس میں دونوں فریقوں کا اتفاق ضروری ہے۔ انہوں نے مزید کہا کہ ان (پیوٹن) کا تاثر یہی تھا کہ وہ جنگ ختم کرنا چاہتے ہیں۔

تاہم، کریملن کے سینئر مشیر یوری اُشاکوف نے بدھ کے روز کہا کہ یہ ملاقات روس اور امریکہ کے درمیان تنازعے کے آغاز سے اب تک ہونے والے "سب سے جامع تبادلوں" میں سے ایک تھی، لیکن علاقائی معاملات پر کوئی سمجھوتہ نہیں ہو سکا۔ انہوں نے کہا کہ دونوں فریقوں نے کسی ممکنہ تصفیے کے مختلف راستوں پر غور کیا، لیکن اہم اختلافات اب بھی برقرار ہیں۔

اُشاکوف نے مزید کہا کہ  ہم یوکرین بحران کے حل کے کسی قریب نہیں ہیں، اور ابھی بہت کام باقی ہے۔ انہوں نے بتایا کہ بات چیت رات گئے تک جاری رہی۔ انہوں نے تصدیق کی کہ امریکی وفد نے کچھ نئی تجاویز بھی پیش کیں، مگر یوکرینی علاقوں کے مسئلے پر بڑی رکاوٹیں اب بھی موجود ہیں۔ انہوں نے کہا کہ روسی سرمایہ کاری کے ایلچی کیرِل دمترییف سمیت کئی اعلیٰ حکام بھی مذاکرات میں شریک تھے، اور فریقین نے جنگ بندی کے مختلف امکانات پر غور کیا۔ اُشاکوف نے زور دیتے ہوئے کہا کہ یہ بات چیت مکمل طور پر خفیہ رہے گی۔

انہوں نے کہا کہ گفتگو خفیہ تھی۔ ہم نے طے کیا ہے کہ مذاکرات کے مضامین کو ظاہر نہیں کیا جائے گا۔ ان کے مطابق ابھی تک کوئی قابلِ ذکر پیش رفت نہیں ہوئی، تاہم سفارتی رابطے جاری ہیں۔انہوں نے یہ بھی بتایا کہ پیوٹن نے اسٹیو وٹکوف کو کہا ہے کہ وہ صدر ٹرمپ تک چند اہم سیاسی پیغامات" براہِ راست پہنچائیں۔

اُشاکوف نے کہا کہ وہ اپنی رپورٹ ٹرمپ کو پیش کریں گے اور ہم سے دوبارہ رابطہ کریں گے۔ اس سے ظاہر ہوتا ہے کہ دونوں حکومتوں کے درمیان مزید بات چیت کا منصوبہ ہے۔

امریکی وفد سے ملاقات سے قبل، پیوٹن نے یورپی ممالک کے کردار پر تنقید کی، یہ کہتے ہوئے کہ یورپی یونین کی حکومتیں ایسے مسودے پیش کر رہی ہیں جو "صرف ایک مقصد رکھتے ہیں: امن عمل کو مکمل طور پر روک دینا"۔