نئی دہلی

 ہندوستان میں امریکہ کے سفیر سرجیو گور نے پیر کے روز امریکی تجارتی نمائندے جیمیسن گریئر کے نئی دہلی کے دورے سے قبل امید کا اظہار کرتے ہوئے کہا کہ یہ دورہ دوطرفہ تجارتی معاہدے پر پیش رفت کے لیے اہم ثابت ہوگا۔سفیر سرجیو گور نے ایکس پر اپنی پوسٹ میں کہا کہ وہ جیمیسن گریئر کا نئی دہلی میں خیرمقدم کرنے کے منتظر ہیں، جہاں ان کی تجارت و صنعت کے وزیر پیوش گوئل اور دیگر اعلیٰ حکام کے ساتھ متعدد ملاقاتیں طے ہیں۔

انہوں نے لکھا کہ سفیر گریئر کا نئی دہلی میں استقبال کرنے کا منتظر ہوں! وزیر پیوش گوئل کے ساتھ کئی اجلاس طے ہیں تاکہ امریکہ-ہندوستان تجارتی معاہدے کو آگے بڑھایا جا سکے۔ امریکی تجارتی نمائندہ (یو ایس ٹی آر) جیمیسن گریئر اس ہفتے نئی دہلی کا دورہ کریں گے۔اعلیٰ سطح کی ان ملاقاتوں میں امریکہ-ہندوستان مشترکہ بیان اور ایک عبوری معاہدے پر بات چیت کی جائے گی، جو وسیع تر دوطرفہ تجارتی مذاکرات کا حصہ ہیں۔ یو ایس ٹی آر کی جانب سے جاری بیان کے مطابق، ان مذاکرات کا آغاز 13 فروری 2025 کو امریکی صدر ڈونلڈ ٹرمپ اور وزیر اعظم نریندر مودی نے کیا تھا۔

یہ دورہ فرانس کے شہر ایویان میں جی-7 سربراہی اجلاس کے موقع پر وزیر اعظم نریندر مودی اور امریکی صدر ڈونلڈ ٹرمپ کی ملاقات کے بعد ہو رہا ہے، جہاں دونوں رہنماؤں نے تجارتی معاہدے کو جلد از جلد حتمی شکل دینے پر زور دیا تھا۔

ہندوستان میں ملاقاتوں کے بعد سفیر جیمیسن گریئر ازبکستان کے دارالحکومت تاشقند جائیں گے، جہاں وہ صدر شوکت مرزیایف، صدارتی انتظامیہ کی سربراہ سعیدہ مرزیایوا اور نائب وزیر اعظم جمشید خواجایف سے ملاقات کریں گے۔یو ایس ٹی آر کے بیان میں کہا گیا ہے کہ سفیر گریئر ان تمام بین الاقوامی ملاقاتوں میں اپنے ہم منصبوں کے ساتھ منصفانہ، متوازن اور باہمی بنیادوں پر تجارت کے فروغ پر تبادلہ خیال کریں گے۔

گزشتہ ہفتے ہندوستان کے خارجہ سکریٹری وکرم مصری نے کہا تھا کہ عبوری دوطرفہ تجارتی معاہدہ اپنے آخری مرحلے میں داخل ہو چکا ہے۔ جی-7 سربراہی اجلاس کے بعد میڈیا بریفنگ کے دوران انہوں نے کہا کہ دونوں ممالک نے اس معاہدے کے سلسلے میں نمایاں پیش رفت کی ہے اور جیمیسن گریئر کے نئی دہلی کے متوقع دورے کو انتہائی اہم قرار دیا۔وکرم مصری نے کہا کہ امریکہ کے ساتھ عبوری آزاد تجارتی اور دوطرفہ تجارتی معاہدے کی تکمیل کے سلسلے میں ہم پہلے ہی خاطر خواہ پیش رفت کر چکے ہیں۔ ہم اس معاہدے کو حتمی شکل دینے کے آخری مراحل میں ہیں۔

انہوں نے مزید کہا کہ اگلے ہفتے امریکی تجارتی نمائندہ جیمیسن گریئر ہندوستان کا دورہ کریں گے تاکہ ان مذاکرات کو مزید آگے بڑھایا جا سکے۔خارجہ سکریٹری کے مطابق، ایویان میں وزیر اعظم نریندر مودی اور صدر ڈونلڈ ٹرمپ کے درمیان ہونے والی دوطرفہ ملاقات میں یہ موضوع اہم ترین نکات میں شامل تھا۔ دونوں رہنماؤں نے ایک بار پھر ہدایت دی کہ اس معاہدے کو جلد از جلد مکمل کیا جائے۔