نئی دہلی/ آواز دی وائس

وزیرِاعظم نریندر مودی نے منگل کے روز منگولیا کے صدر خورلسُکھ اُخنا سے قومی دارالحکومت میں ملاقات کی۔ دونوں رہنماؤں نے خوشگوار ملاقات کے دوران گرم جوشی کا اظہار کیا اور ایک پودا بھی لگایا۔ حیدرآباد ہاؤس میں ہونے والی ملاقات کے دوران وزیرِاعظم مودی اور صدر اُخنا نے مصافحہ کیا اور باہمی دوستی و تعاون کا مظاہرہ کیا۔ دونوں رہنماؤں نے بعد ازاں ایک یادگار پودا مشترکہ طور پر لگایا۔

اس سے قبل، آج صبح صدر اُخنا نے منگولیائی وفد کے کئی اراکین کے ساتھ راج گھاٹ پر حاضری دی، جہاں انہوں نے مہاتما گاندھی کو خراجِ عقیدت پیش کیا اور پھولوں کی چادر چڑھائی۔ انہوں نے مہمانوں کی کتاب پر دستخط کیے اور انہیں مہاتما گاندھی کے مجسمے اور کتاب کا تحفہ پیش کیا گیا۔

منگولیا کے صدر پیر کے روز چار روزہ سرکاری دورے پر دہلی پہنچے تھے۔ ان کا استقبال ہوائی اڈے پر شہری ہوا بازی کے وزیرِمملکت مرلی دھر موہول نے کیا۔ پیر کو وزیرِخارجہ ایس جے شنکر نے منگولیا کے صدر خورلسُکھ اُخنا سے ملاقات کی اور دونوں ممالک کے درمیان تزویراتی شراکت داری کو آگے بڑھانے پر ان کے "گرم جوش خیالات" کی تعریف کی۔

وزارتِ خارجہ کے ترجمان رندھیر جیسوال نے پیر کو ایک پوسٹ میں لکھا کہ ہماری تہذیبی رشتوں کو مزید مضبوط کرتے ہوئے، منگولیا کے صدر خورلسُکھ اُخنا ہندوستان کے سرکاری دورے پر نئی دہلی پہنچ گئے ہیں۔ انہیں ہوائی اڈے پر گارڈ آف آنر اور پروٹوکول کے ساتھ خوش آمدید کہا گیا۔ شہری ہوا بازی کے وزیرِمملکت مرلی دھر موہول نے ان کا پرتپاک استقبال کیا۔

صدر اُخنا کے ساتھ ایک اعلیٰ سطحی وفد بھی آیا ہے، جس میں کابینہ کے وزراء، ارکانِ پارلیمان، اعلیٰ عہدیداران، کاروباری شخصیات اور ثقافتی نمائندے شامل ہیں۔ یہ صدر اُخنا کا منگولیا کے سربراہِ مملکت کی حیثیت سے ہندوستان کا پہلا سرکاری دورہ ہے۔ ہندوستان اور منگولیا کے درمیان سفارتی تعلقات 1955 میں قائم ہوئے تھے۔ گزشتہ سات دہائیوں کے دوران دونوں ممالک نے قریبی اور کثیر جہتی شراکت داری قائم کی ہے، جو مشترکہ ثقافتی و روحانی رشتوں اور جمہوری اقدار پر مبنی ہے۔ یہ شراکت داری دفاع و سلامتی، پارلیمانی تبادلے، ترقیاتی تعاون، توانائی، کان کنی، انفارمیشن ٹیکنالوجی، تعلیم، صحت اور ثقافتی تعاون جیسے مختلف شعبوں پر محیط ہے۔