نئی دہلی
صدر دروپدی مرمو نے جمعرات کو راشٹرپتی بھون میں منعقدہ ایک باوقار تقریب میں چار ممالک کے سفیروں کی اسنادِ سفارت (کریڈینشلز) قبول کیں۔جن سفیروں نے اپنی اسناد پیش کیں ان میں وتھایا زایاوونگ (لاؤ پیپلز ڈیموکریٹک ریپبلک)، ایمیلی آیا زا مشوبیکوا (ڈیموکریٹک ریپبلک آف کانگو)، الیکس لونیازو توکوہوپویلے اور انتونیو سیریفو ایمبالو شامل تھے۔
راشٹرپتی بھون میں منعقد ہونے والی یہ تقریب ان سفیروں کو اپنے اپنے ممالک کی نمائندگی کے لیے باضابطہ منظوری دینے کا عمل ہوتی ہے۔سفارتی سرگرمیوں کے سلسلے میں اس سے قبل پیر کے روز صدر دروپدی مرمو نے لی جے میونگ کا راشٹرپتی بھون میں استقبال کیا اور ان کے اعزاز میں ضیافت بھی دی۔
صدر نے ان کے پہلے دورۂ ہندوستان پر خوش آمدید کہتے ہوئے ہندوستان-کوریا دوطرفہ تعلقات کو مضبوط بنانے میں ان کے اہم کردار کو سراہا، خصوصاً کوریا-ہندوستان پارلیمانی دوستی گروپ کے چیئرمین کی حیثیت سے۔صدر کے سیکریٹریٹ کے بیان کے مطابق، انہوں نے کہا کہ اپنی صدارت کے پہلے سال کے اندر یہ دورہ اس بات کی عکاسی کرتا ہے کہ وہ اس تعلق کو کتنی اہمیت دیتے ہیں۔
صدر نے کہا کہ ہندوستان اور کوریا دونوں متحرک جمہوریتیں ہیں جو مشترکہ اقدار رکھتی ہیں۔ انہوں نے اس بات پر خوشی کا اظہار کیا کہ ہندوستانی پارلیمنٹ میں حال ہی میں ہندوستان-کوریا پارلیمانی دوستی گروپ قائم کیا گیا ہے۔انہوں نے کہا کہ اس سے ہندوستانی پارلیمنٹ اور کورین نیشنل اسمبلی کے درمیان مکالمہ اور تبادلۂ خیال کو فروغ ملے گا، جس سے باہمی سمجھ بوجھ اور اعتماد مزید مضبوط ہوگا۔
صدر نے اس بات پر بھی اطمینان ظاہر کیا کہ دونوں ممالک نے جہاز سازی، بندرگاہوں کی ترقی، ڈیجیٹل تعاون، چھوٹے اور درمیانے درجے کے کاروبار، اسٹیل، تعلیم، تحقیق، ثقافت اور عوامی روابط سمیت مختلف شعبوں میں تعاون کے لیے ایک جامع ایجنڈا طے کیا ہے۔انہوں نے مزید کہا کہ دونوں فریقوں نے جامع اقتصادی شراکت داری معاہدہ پر مذاکرات دوبارہ شروع کرنے کے لیے مشترکہ اعلامیہ بھی اپنایا ہے۔ انہوں نے کہا کہ ہندوستان باہمی فائدہ مند تجارتی تعلقات کو آگے بڑھانے اور مصنوعی ذہانت، سیمی کنڈکٹرز، الیکٹرانکس، صاف توانائی، خدمات اور سیاحت جیسے شعبوں میں کوریا کے ساتھ تعاون مضبوط کرنے کا خواہاں ہے۔صدر نے کہا کہ ہندوستان کے پاس مہارت، رفتار اور وسعت ہے، جبکہ کوریا کے پاس ہائی ٹیک مینوفیکچرنگ کی مہارت موجود ہے۔ ان دونوں کی صلاحیتوں کو یکجا کر کے نوجوانوں کے لیے بے شمار مواقع پیدا کیے جا سکتے ہیں۔
انہوں نے یہ بھی کہا کہ ہندوستان اور کوریا کو سبز اور صاف توانائی کے ساتھ ساتھ دیگر موسمیاتی ٹیکنالوجیز میں تعاون کے مواقع تلاش کرنے چاہئیں تاکہ انسانیت کے لیے ایک پائیدار مستقبل یقینی بنایا جا سکے۔بیان میں کہا گیا کہ دونوں رہنماؤں نے اس بات پر اتفاق کیا کہ ہندوستان اور کوریا کے درمیان قریبی تعاون سے عوام کو بے پناہ فوائد حاصل ہو سکتے ہیں، اور دونوں ایک دوسرے سے بہت کچھ سیکھ سکتے ہیں۔ ماحولیات، جدت، تعلیم، ہنر مندی اور ٹیکنالوجی جیسے شعبوں میں مشترکہ کام سے عوام کو فائدہ پہنچے گا۔
