ویٹیکن سٹی۔پوپ لیو چہاردہم نے اتوار کو مقامی وقت کے مطابق مغربی کنارے میں فلسطینی شہری آبادی کے خلاف جاری تشدد کے خاتمے کی اپنی اپیل ایک بار پھر دہرائی۔پوپ لیو چہاردہم نے ایکس پر جاری ایک پیغام میں عالمی برادری سے منصفانہ اور پائیدار امن کے لیے دو ریاستی حل کو آگے بڑھانے کی کوشش کرنے کی بھی اپیل کی۔

پیغام میں کہا گیا کہ میں مغربی کنارے میں فلسطینی شہری آبادی کے خلاف جاری تشدد کے خاتمے کی اپنی اپیل ایک بار پھر دہراتا ہوں اور عالمی برادری سے فوری طور پر مطالبہ کرتا ہوں کہ وہ منصفانہ اور پائیدار امن کے لیے دو ریاستی حل کو آگے بڑھانے کی کوشش کرے۔

فلسطینی خبر رساں ایجنسی وفا نے اسرائیلی آباد کاروں کی بڑھتی ہوئی آمد کے درمیان غزہ اور مغربی کنارے میں اسرائیل کی جانب سے کیے گئے حملوں کی اطلاع دی ہے۔

گزشتہ ہفتے اسرائیل نے امریکی صدر ڈونلڈ ٹرمپ کے غزہ کے لیے پیش کردہ 15 نکاتی امن منصوبے کو مسترد کردیا۔ اسرائیلی وزیر اعظم بینجمن نیتن یاہو نے اتوار کو کہا کہ اسرائیل اس وقت تک غزہ سے اپنی فوج واپس نہیں بلائے گا جب تک حماس کو حقیقی طور پر غیر مسلح نہیں کردیا جاتا۔

اسرائیلی ذرائع ابلاغ کے مطابق نیتن یاہو نے جولائی کے اواخر میں حماس کی جانب سے حمایت کیے گئے منصوبے کا حوالہ دیتے ہوئے کہا کہ اسرائیل 15 نکاتی دستاویز کو مسترد کرتا ہے۔

کابینہ کے اجلاس سے خطاب کرتے ہوئے نیتن یاہو نے زور دیا کہ اسرائیلی فوج اس وقت تک کسی قسم کا انخلا نہیں کرے گی جب تک حماس کو حقیقی طور پر غیر مسلح نہیں کردیا جاتا اور وہ اسرائیلی فوجیوں اور شہریوں کے خلاف خطرات کو ناکام بنانے کا سلسلہ جاری رکھے گی۔

امن منصوبے کو ترک کرنے کے لیے کابینہ میں دوبارہ ووٹنگ کرانے کا مطالبہ کرنے والے انتہائی دائیں بازو کے اتحادی شراکت داروں کے دباؤ کے درمیان نیتن یاہو نے کہا کہ اسرائیل اس معاملے پر واشنگٹن کے ساتھ بات چیت جاری رکھے ہوئے ہے۔ رائے عامہ کے جائزوں کے مطابق نیتن یاہو سخت انتخابی مقابلے کا سامنا کر رہے ہیں۔

انہوں نے کہا کہ ان کے پاس کچھ تجاویز ہیں۔ ان میں سے کچھ ہمیں قابل قبول ہیں اور کچھ نہیں ہیں اور ہم جانتے ہیں کہ ان معاملات پر اپنے مؤقف پر کیسے قائم رہنا ہے۔

ٹرمپ کے 15 نکاتی منصوبے میں غزہ تنازع کو ختم کرنے مسلح گروہوں کو غیر مسلح کرنے اسرائیلی فوج کے انخلا اور غزہ کے انتظام کو ایک فلسطینی ماہرین پر مشتمل ادارے یعنی غزہ کے انتظام کے لیے قومی کمیٹی کے حوالے کرنے کی مرحلہ وار حکمت عملی پیش کی گئی ہے۔

منصوبے کے تحت بھاری ہتھیاروں اسلحے کے ذخائر فوجی تنصیبات اور سرنگوں کو کمیٹی کے کنٹرول میں دیا جائے گا جبکہ اسرائیلی فوج اور فلسطینی انتظام کے تحت علاقوں کے درمیان علیحدگی قائم کرنے کے لیے ایک بین الاقوامی استحکامی فورس تعینات کی جائے گی۔اس کے بعد اسرائیلی فوج مرحلہ وار انخلا کرے گی جس سے غزہ کی تعمیر نو اور فلسطینیوں کے حق خود ارادیت کی جانب ایک طویل مدتی سیاسی عمل کی راہ ہموار ہوگی۔