نئی دہلی: ہندوستان نے پاکستان کے زیر قبضہ جموں و کشمیر (پی او کے) میں حال ہی میں ہونے والے نام نہاد بلدیاتی انتخابات کو مکمل ڈھونگ قرار دیتے ہوئے عالمی برادری سے مطالبہ کیا ہے کہ وہ وہاں شہریوں کے خلاف پاکستانی اسٹیبلشمنٹ کے مبینہ مظالم کا نوٹس لے اور اسلام آباد کو جوابدہ ٹھہرائے۔

وزارتِ خارجہ کے ترجمان رندھیر جیسوال نے منگل کو ہفتہ وار پریس بریفنگ میں کہا، "پی او کے میں ہونے والے یہ نام نہاد مقامی انتخابات مکمل طور پر ایک ڈھونگ ہیں۔ اصل حقیقت عوامی احتجاج اور پاکستانی فورسز کی جانب سے شہریوں کی ہلاکتیں ہیں۔ ایسے کھوکھلے انتخابی عمل سے زمینی حقیقت نہیں چھپائی جا سکتی۔" انہوں نے دعویٰ کیا کہ رواں سال جون سے اب تک جاری کریک ڈاؤن میں کم از کم 90 شہری ہلاک ہو چکے ہیں۔

ان کے مطابق پاکستانی اسٹیبلشمنٹ عوامی ناراضی کا جواب گولیوں، بلیک آؤٹ، دھمکیوں اور جبر سے دے رہی ہے اور اب ایک نمائشی انتخابی عمل کے ذریعے اسے قانونی حیثیت دینے کی کوشش کر رہی ہے۔ رندھیر جیسوال نے عالمی برادری سے کہا کہ پاکستان کو اس کے اقدامات پر جوابدہ بنایا جائے اور انسانی حقوق کے بارے میں اس کے دعووں کی حقیقت کو سمجھا جائے۔

یہ بیان ایسے وقت میں سامنے آیا ہے جب پاکستان کے زیر قبضہ جموں و کشمیر میں مقامی انتخابات کے دوران کشیدگی، احتجاج، انتظامی ناکامیوں اور بدامنی کی اطلاعات سامنے آئیں۔ مختلف شہروں، خصوصاً کراچی میں بھی کشمیری برادری کی جانب سے احتجاج کیا گیا، جہاں مظاہرین نے انتخابی عمل پر اعتراضات اٹھاتے ہوئے سیاسی اصلاحات کا مطالبہ کیا۔ ذرائع کے مطابق پولیس نے متعدد مظاہرین اور طلبہ رہنماؤں کو حراست میں لیا۔

ادھر ایمنسٹی انٹرنیشنل اور کمیٹی ٹو پروٹیکٹ جرنلسٹس (سی پی جے ایشیا) سمیت انسانی حقوق اور صحافتی آزادی کی بین الاقوامی تنظیموں نے بھی احتجاج کے دوران مبینہ تشدد، میڈیا پر پابندیوں، صحافیوں کی جبری گمشدگیوں، غیر ملکی میڈیا کی سرگرمیوں پر قدغن اور انٹرنیٹ بندش پر تشویش کا اظہار کرتے ہوئے فوری اور شفاف تحقیقات کا مطالبہ کیا ہے۔