راولاکوٹ: پاکستان کے زیر انتظام جموں و کشمیر (پی او جے کے) میں راولاکوٹ کے عیدگاہ مقام پر جاری احتجاجی دھرنے کے خلاف سکیورٹی فورسز کی کارروائی کے بعد صورتحال کشیدہ ہو گئی ہے۔ جموں کشمیر جوائنٹ عوامی ایکشن کمیٹی (جے کے جے اے اے سی) کے مطابق کارروائی میں کم از کم دو افراد ہلاک جبکہ متعدد زخمی ہوئے ہیں۔

کمیٹی نے سوشل میڈیا پلیٹ فارم ایکس پر جاری بیان میں الزام عائد کیا کہ سکیورٹی اہلکاروں نے علی الصبح کئی روز سے جاری دھرنے کو ختم کرانے کے لیے کارروائی کی، جس کے نتیجے میں دو مظاہرین جان کی بازی ہار گئے۔

ہلاک ہونے والوں میں ایک کی شناخت پلندری کے علاقے اسلام پورہ فلیاں کے رہائشی نعیم امین کے طور پر کی گئی ہے، جبکہ دوسرے شخص کی شناخت فوری طور پر نہیں ہو سکی۔

جے کے جے اے اے سی کے مطابق کارروائی کے دوران 10 سے 12 نوجوان مظاہرین بھی زخمی ہوئے۔ کمیٹی نے الزام لگایا کہ حکام نے طاقت کا حد سے زیادہ استعمال کیا اور کارروائی کے بعد ہونے والی شدید شیلنگ سے پورا علاقہ دھوئیں کی لپیٹ میں آ گیا، جس کے باعث مقامی آبادی اور مظاہرین کو سانس لینے میں دشواری کا سامنا کرنا پڑا۔

رپورٹس کے مطابق کارروائی کے بعد راولاکوٹ میں موبائل مواصلاتی خدمات بھی متاثر ہوئیں، جس سے شہریوں کو رابطوں میں شدید مشکلات پیش آئیں اور شہر میں خوف و بے یقینی کی فضا پیدا ہو گئی۔

یہ کشیدگی ایسے وقت میں سامنے آئی ہے جب احتجاج اور انتظامیہ کے درمیان تعطل گزشتہ آٹھ روز سے جاری ہے۔ مظاہرین کا مؤقف ہے کہ ان کے مطالبات تاحال تسلیم نہیں کیے گئے، جبکہ مذاکرات بھی کسی نتیجے پر نہیں پہنچ سکے۔

کمیٹی نے مزید الزام لگایا کہ سکیورٹی فورسز مختلف علاقوں میں خوراک اور ضروری اشیائے زندگی لے جانے والی گاڑیوں کو روک رہی ہیں، جس کے باعث بعض علاقوں میں بنیادی اشیا کی قلت کا خدشہ پیدا ہو گیا ہے۔

دوسری جانب انسانی حقوق کی بین الاقوامی تنظیم ایمنسٹی انٹرنیشنل نے بھی پی او جے کے میں احتجاجی مظاہروں کے خلاف جاری کارروائیوں پر شدید تشویش کا اظہار کیا ہے۔ تنظیم نے حکام پر طاقت کے بے جا استعمال، اختلاف رائے کو دبانے اور بنیادی انسانی حقوق کی خلاف ورزیوں کے الزامات عائد کیے ہیں۔

ایمنسٹی انٹرنیشنل نے جموں کشمیر جوائنٹ عوامی ایکشن کمیٹی کو انسداد دہشت گردی قوانین کے تحت "کالعدم تنظیم" قرار دینے کے فیصلے کو بھی تنقید کا نشانہ بنایا ہے۔ تنظیم کے مطابق یہ اقدام غیر متناسب اور آزادیِ تنظیم سازی و پرامن سیاسی سرگرمیوں کے حق پر ایک سنگین حملہ ہے۔