سینڈائی [جاپان]: وزیر اعظم نریندر مودی اور جاپان کے وزیر اعظم شیگیرُو ایشیبا نے ہفتے کے روز ٹوکیو الیکٹران فیکٹری کا دورہ کیا اور کمپنی کے اعلیٰ حکام سے ملاقات کی۔ اپنے دورے کی تفصیلات ایکس پر شیئر کرتے ہوئے وزیر اعظم مودی نے بتایا کہ وزیر اعظم ایشیبا کے ساتھ انہوں نے ٹریننگ روم اور پروڈکشن انوویشن لیب کا دورہ کیا۔

انہوں نے کہا: "وزیر اعظم ایشیبا اور میں نے ٹوکیو الیکٹران فیکٹری کا دورہ کیا۔ ہم ٹریننگ روم، پروڈکشن انوویشن لیب گئے اور کمپنی کے اعلیٰ حکام سے بات چیت کی۔ سیمی کنڈکٹر کا شعبہ ہندوستان-جاپان تعاون کا ایک کلیدی شعبہ ہے۔ پچھلے چند برسوں میں ہندوستان نے اس میدان میں نمایاں کامیابیاں حاصل کی ہیں۔ بہت سے نوجوان اس سے وابستہ ہو رہے ہیں۔ ہم چاہتے ہیں کہ یہ رفتار مستقبل میں بھی جاری رہے۔"

وزیر اعظم نریندر مودی ہفتے کی صبح سینڈائی پہنچے تو مقامی باشندوں اور بھارتی کمیونٹی کے افراد نے پرجوش طریقے سے ان کا خیر مقدم کیا۔ ہر طبقے کے لوگ خوشی کا اظہار کرتے ہوئے "ویلکم ٹو جاپان، مودی سان" کے نعرے لگا رہے تھے۔ وزارت خارجہ کے ترجمان رندھیر جیسوال نے کہا کہ دونوں وزرائے اعظم کا ایک ساتھ سفر کرنا ہندوستان-جاپان دوستی کی گرم جوشی کی علامت ہے۔

انہوں نے ایکس پر لکھا: "دوستی اور ترقی کا سفر۔ ایک منفرد اقدام میں، جو ہندوستان-جاپان رفاقت کی گرمجوشی کی علامت ہے، وزیر اعظم نریندر مودی اور وزیر اعظم شیگیرُو ایشیبا شنکانسن کے ذریعے ایک ساتھ سینڈائی، میاگی پریفیکچر گئے۔" مودی اس وقت جاپان کے دو روزہ سرکاری دورے پر ہیں جہاں وہ جاپانی وزیر اعظم شیگیرُو ایشیبا کے ساتھ 15ویں سالانہ ہندوستان-جاپان سربراہی اجلاس میں شریک ہوں گے۔

سیمی کنڈکٹر کی یہ فیکٹری، جو سینڈائی کے قریب میاگی پریفیکچر میں واقع ہے، تائیوان کی پاورچپ سیمی کنڈکٹر مینوفیکچرنگ کارپوریشن (PSMC) کی قیادت میں SBI ہولڈنگز اور جاپانی شراکت داروں کے تعاون سے مشترکہ منصوبہ جاپان سیمی کنڈکٹر مینوفیکچرنگ کمپنی (JSMC) کے تحت تیار کی جا رہی ہے۔ یہ پلانٹ، جو اوہیرا گاؤں کے سیکنڈ نادرن سینڈائی سینٹرل انڈسٹریل پارک میں قائم کیا جا رہا ہے، جاپان کی اپنی گھریلو چپ سازی کی صنعت کو دوبارہ زندہ کرنے کی سب سے بڑی کوششوں میں سے ایک ہے۔

اقتصادی سلامتی ہندوستان-جاپان تعاون کا ایک اہم ستون ہے، جس میں سیمی کنڈکٹر، مصنوعی ذہانت، اہم معدنیات اور صاف توانائی شامل ہیں۔ ہندوستان کے لیے ان شعبوں میں گہرا تعاون جدید ٹیکنالوجی تک رسائی، سپلائی چین کی مضبوطی، اور سرمایہ کاری کے نئے مواقع فراہم کرتا ہے، جو دونوں ممالک کی اسٹریٹجک شراکت داری کو مزید مستحکم کرتا ہے۔