ویلنگٹن

 نیوزی لینڈ کے وزیر اعظم کرسٹوفر لکسن نے جمعہ کے روز اعلان کیا کہ وزیر اعظم نریندر مودی اگلے ہفتے نیوزی لینڈ کا اپنا پہلا سرکاری دورہ کریں گے۔

لکسن نے کہا کہ دونوں ممالک کے رہنما نیوزی لینڈ-ہندوستان آزاد تجارتی معاہدے (ایف ٹی اے) کے ذریعے دوطرفہ تعلقات کو ایک نئی بلندی تک لے جائیں گے۔

انہوں نے ایکس پر اپنی پوسٹ میں کہا کہ مجھے یہ اعلان کرتے ہوئے خوشی ہو رہی ہے کہ ہندوستان کے وزیر اعظم نریندر مودی اگلے ہفتے نیوزی لینڈ کا اپنا پہلا سرکاری دورہ کریں گے۔ ہندوستان دنیا کی سب سے بڑی اور تیزی سے ترقی کرنے والی معیشتوں میں سے ایک ہے اور نیوزی لینڈ کی اقتصادی خوشحالی کے لیے انتہائی اہم ملک ہے۔ ہم نیوزی لینڈ-ہندوستان آزاد تجارتی معاہدے کے ذریعے دونوں ممالک کے تعلقات کو اگلے مرحلے تک لے جا رہے ہیں، جس پر اپریل میں دستخط کیے گئے تھے۔ یہ معاہدہ نیوزی لینڈ کے لیے مزید روزگار، زیادہ برآمدات اور مضبوط اقتصادی ترقی کا باعث بنے گا۔"

انہوں نے مزید کہا کہ یہ معاہدہ 1.4 ارب آبادی والی منڈی میں ہماری اشیا اور خدمات کی برآمدات کے لیے نئے مواقع پیدا کرے گا، جس سے نیوزی لینڈ کی مقامی برادریوں میں زیادہ سرمایہ آئے گا، روزگار کے مواقع پیدا ہوں گے اور اجرتوں میں اضافہ ہوگا۔"

اس سے قبل 6 مئی کو نیوزی لینڈ کے وزیر تجارت و سرمایہ کاری ٹوڈ میک کلے نے کہا تھا کہ ہندوستان اور نیوزی لینڈ کے درمیان دوطرفہ تجارت آئندہ چند برسوں میں دوگنی ہونے کا امکان ہے، کیونکہ دونوں ممالک ایک اعلیٰ معیار کے آزاد تجارتی معاہدے کو حتمی شکل دے رہے ہیں۔

اے این آئی سے خصوصی گفتگو میں وزیر نے کہا تھا کہ یہ آزاد تجارتی معاہدہ نیوزی لینڈ کے ان صارفین کی ضروریات کو پورا کرے گا جو اعلیٰ معیار کی اشیا اور خدمات کے خواہاں ہیں، اور ایسی مصنوعات و خدمات ہندوستانی بازار میں آسانی سے دستیاب ہیں۔ انہوں نے بتایا کہ نیوزی لینڈ کی حکومت آئندہ 15 برسوں میں ہندوستان میں 20 ارب امریکی ڈالر تک کی سرمایہ کاری کو فروغ دینے کے لیے پُرعزم ہے۔

سرمایہ کاری کے عمل کو آسان بنانے کے لیے، حکومتِ ہند نے نیوزی لینڈ کے لیے ایک خصوصی "سنگل ڈیسک" قائم کرنے پر اتفاق کیا ہے، تاکہ سرمایہ کاری کی منظوری کے عمل کو تیز اور آسان بنایا جا سکے۔

ٹوڈ میک کلے نے کہا کہ  حکومتِ ہند نے نیوزی لینڈ کے لیے ایک خصوصی ڈیسک یا سنگل ونڈو سسٹم قائم کرنے پر اتفاق کیا ہے، تاکہ سرمایہ کاری کی منظوری کے عمل کو تیز کیا جا سکے اور نیوزی لینڈ کے سرمایہ کاروں کے لیے ہندوستان میں سرمایہ کاری آسان ہو جائے۔"

واضح رہے کہ اپریل 2026 میں ہندوستان اور نیوزی لینڈ نے آزاد تجارتی معاہدے (ایف ٹی اے) پر دستخط کا اعلان کیا تھا، جسے دونوں ممالک کے اقتصادی تعلقات میں ایک تاریخی سنگ میل قرار دیا گیا۔ یہ جامع معاہدہ منڈی تک رسائی، زرعی پیداوار، سرمایہ کاری، ہنر مند افرادی قوت کی نقل و حرکت، کھیلوں، سیاحت اور عوامی روابط سمیت متعدد شعبوں کا احاطہ کرتا ہے۔ اس معاہدے سے دونوں ممالک کے صنعت کاروں، کسانوں، چھوٹے اور درمیانے درجے کے کاروباری اداروں، خواتین کاروباری شخصیات، طلبہ اور ہنر مند پیشہ ور افراد کو فائدہ پہنچنے کی توقع ہے۔