بشکیک: وزیر اعظم نریندر مودی نے منگل کو بشکیک میں منعقدہ شنگھائی تعاون تنظیم کے 26ویں سربراہی اجلاس کے دوران دیگر رکن ممالک کے سربراہان کے ساتھ مشترکہ اعلامیے پر دستخط کیے۔اس سے قبل اجلاس سے خطاب کرتے ہوئے وزیر اعظم نریندر مودی نے دہشت گردی کے خلاف مؤثر اور متحدہ کارروائی پر زور دیتے ہوئے کہا کہ دہشت گردی کی مکمل معاونت کے نظام کو ختم کرنا ہوگا۔ اس میں دہشت گردی کی مالی معاونت بھرتی انتہا پسندی کی جانب مائل کرنا اور دہشت گردوں کو محفوظ پناہ گاہیں فراہم کرنا شامل ہیں۔

دہشت گردی کے خلاف دوہرے معیار کی گنجائش نہیں

وزیر اعظم نے کہا کہ دہشت گردی پوری انسانیت کے لیے ایک سنگین چیلنج ہے اور اس کے خلاف جنگ کو محض کارروائی اور جوابی کارروائی کی سوچ تک محدود نہیں کیا جاسکتا۔انہوں نے کہا کہ تمام ممالک کو ایک آواز میں یہ واضح کرنا ہوگا کہ دہشت گردی جیسے سنگین مسئلے پر دوہرے معیار کی کوئی گنجائش نہیں ہے۔ جو ممالک دہشت گردی کو اپنی پالیسی کے ایک آلے کے طور پر استعمال کرتے ہیں یا دہشت گردوں کو پناہ اور مدد فراہم کرتے ہیں انہیں واضح پیغام دیا جانا چاہیے کہ دہشت گردی کسی کے لیے بھی تزویراتی اثاثہ نہیں ہوسکتی۔

امن و سلامتی ہندوستان کی ترجیح

وزیر اعظم نے کہا کہ شنگھائی تعاون تنظیم کے لیے ہندوستان کے تصور میں امن و سلامتی اولین ترجیح ہیں جبکہ رابطہ اور مواقع بھی اس کے اہم ستون ہیں۔انہوں نے کہا کہ پُرامن اور محفوظ یوریشیا کی مشترکہ خواہش افغانستان میں امن اور استحکام سے بھی جڑی ہوئی ہے۔ ہندوستان افغانستان کے عوام کی ترقی اور انسانی امداد کے لیے اپنا کردار ادا کرتا رہا ہے اور آئندہ بھی یہ سلسلہ جاری رکھے گا۔

مغربی ایشیا کی صورت حال پر تشویش

مغربی ایشیا کی صورتحال کا ذکر کرتے ہوئے وزیر اعظم نے کہا کہ کسی ایک خطے میں ہونے والا تنازع صرف اسی خطے تک محدود نہیں رہتا بلکہ اس کے اثرات پوری دنیا کی توانائی کی سلامتی سمندری تجارت اور رسد کے نظام پر پڑتے ہیں۔انہوں نے کہا کہ اس کا سب سے زیادہ بوجھ عالمی جنوب کے ممالک کو اٹھانا پڑتا ہے۔ ہندوستان مسلسل یہ مؤقف پیش کرتا رہا ہے کہ تمام تنازعات اور جنگوں کا حل میدان جنگ میں نہیں بلکہ مذاکرات اور سفارت کاری کے ذریعے تلاش کیا جانا چاہیے۔

منشیات اور منظم جرائم کے خلاف تعاون

وزیر اعظم نے نوجوان نسل اور علاقائی سلامتی کے لیے منشیات کی اسمگلنگ کو بھی ایک سنگین خطرہ قرار دیا۔ انہوں نے شنگھائی تعاون تنظیم کے ذریعے سلامتی کے خطرات منظم جرائم معلوماتی سلامتی اور منشیات کے خلاف تعاون کو مزید مضبوط بنانے پر زور دیا۔انہوں نے کہا کہ تنظیم کے متعلقہ اداروں کو عملی تعاون اور بروقت کارروائی کے مؤثر ذرائع میں تبدیل کیا جانا چاہیے۔

عوامی روابط کو مرکز میں رکھنے پر زور

وزیر اعظم نے کہا کہ شنگھائی تعاون تنظیم کے تعاون کے فوائد براہ راست عوام تک پہنچنے چاہئیں۔ ان کے مطابق مختلف ممالک کے عوام کے درمیان تعلقات اس تعاون کا سب سے بڑا سرمایہ ہیں۔انہوں نے کہا کہ ہندوستان کے لیے شنگھائی تعاون تنظیم عظیم تہذیبوں ثقافتوں اور خیالات کے باہمی ملاپ کی علامت ہے۔ تنظیم کے آئندہ 25 برسوں میں عوامی روابط کو باہمی تعاون کے مرکز میں رکھا جانا چاہیے۔انہوں نے کہا کہ کامیابی کا اصل پیمانہ یہ ہونا چاہیے کہ نوجوانوں کے لیے کتنے نئے مواقع پیدا ہوئے کاروباری افراد کے لیے کتنی نئی منڈیاں کھلیں کسانوں کو ٹیکنالوجی سے کتنا فائدہ پہنچا اور شہریوں کی زندگی کتنی بہتر ہوئی۔وزیر اعظم نے کہا کہ یہی شنگھائی تعاون تنظیم کے تین بنیادی تصورات امن و سلامتی رابطہ اور مواقع کا حقیقی مفہوم ہے۔

10 رکن ممالک کی شرکت

شنگھائی تعاون تنظیم کے 26ویں سربراہی اجلاس کی میزبانی کرغزستان کے صدر صدر صابر جپاروف کر رہے ہیں اور کرغزستان اس وقت تنظیم کی صدارت بھی سنبھالے ہوئے ہے۔اجلاس میں وزیر اعظم نریندر مودی کے علاوہ چین کے صدر شی جن پنگ روس کے صدر ولادیمیر پوتن پاکستان کے وزیر اعظم شہباز شریف ایران کے صدر مسعود پزشکیان بیلاروس کے صدر الیگزینڈر لوکاشینکو قازقستان کے صدر قاسم جومارت توکایف ازبکستان کے صدر شوکت مرزیایوف اور تاجکستان کے صدر امام علی رحمان بھی شریک ہیں۔شنگھائی تعاون تنظیم کے 26ویں سربراہی اجلاس میں 10 رکن ممالک 15 شراکت دار ممالک اور 2 مبصر ممالک شامل ہیں۔ اجلاس میں علاقائی اور عالمی سطح کے مختلف امور پر مکالمے اور تعاون کو آگے بڑھانے پر توجہ مرکوز کی گئی۔