جکارتہ:وزیر اعظم نریندر مودی نے منگل کو انڈونیشیا کے صدر پرابوو سوبیانتو کے ساتھ ہونے والی بات چیت کے نتائج کا خیر مقدم کرتے ہوئے کہا کہ دونوں ممالک کے درمیان تعلقات آئندہ برسوں میں نئی بلندیوں کو چھوتے رہیں گے۔

ایکس پر اپنی پوسٹ میں وزیر اعظم مودی نے کہا کہ اس دورے کے نتائج جامع۔ بامعنی اور مستقبل پر مبنی ہیں۔ انہوں نے کہا کہ ہندوستان اور انڈونیشیا کی دوستی آنے والے برسوں میں مزید مضبوط ہوگی اور نئی کامیابیاں حاصل کرے گی۔

وزیر اعظم مودی اور صدر پرابوو سوبیانتو کے درمیان دو طرفہ اور وفود کی سطح پر ہونے والی ملاقاتوں کے بعد وزارت خارجہ نے دونوں ممالک کے درمیان 20 مفاہمتی یادداشتوں اور معاہدوں کی تفصیلات جاری کیں۔

ان معاہدوں میں براہموس میزائل نظام میں تعاون اور انڈونیشیا کے سنگھاساری خصوصی اقتصادی زون میں انڈین انسٹی ٹیوٹ آف مینجمنٹ بنگلور کے برانچ کیمپس کے قیام جیسے اہم فیصلے شامل ہیں۔

دونوں ممالک نے معدنیات اور اسٹیل سپلائی چین میں تعاون پر اتفاق کیا تاکہ معدنی شعبے میں سرمایہ کاری کو فروغ دیا جا سکے۔ جدید کان کنی اور پروسیسنگ ٹیکنالوجی تک رسائی بہتر بنائی جائے اور اہم معدنیات کی سپلائی چین کو مضبوط کیا جا سکے۔

سمندری سلامتی اور سیکیورٹی کے شعبے میں تعاون سے متعلق معاہدے میں توسیع کی گئی جس کے تحت دونوں ممالک کے کوسٹ گارڈز کے درمیان رابطہ مزید مضبوط ہوگا۔ اس کے علاوہ سمندری نگرانی۔ تلاش و بچاؤ کی کارروائیوں اور صلاحیت سازی میں بھی تعاون بڑھایا جائے گا۔

نایاب معدنیات اور ریئر ارتھ میگنیٹس کی تیاری کے لیے این ایف ٹی ڈی سی۔ مڈویسٹ لمیٹڈ اور پی ٹی پرمیناس کے درمیان معاہدہ کیا گیا تاکہ اہم معدنیات کی سپلائی چین کو متنوع بنایا جا سکے۔

براہموس میزائل نظام میں تعاون کے معاہدے کو ہندوستانی دفاعی صنعت کی صلاحیت کا مظہر قرار دیا گیا۔ اس سے آتم نربھر بھارت مہم کو تقویت ملے گی۔ دفاعی پیداوار میں اضافہ ہوگا اور برآمدات کو فروغ حاصل ہوگا۔

فضا سے فضا میں مار کرنے والے میزائلوں کے شعبے میں تعاون کے معاہدے سے دفاعی برآمدات۔ ٹیکنالوجی میں اشتراک اور مقامی میزائل ترقیاتی نظام کو مزید مضبوط بنانے میں مدد ملے گی۔

اسٹیل اتھارٹی آف انڈیا اور کراکاٹاؤ اسٹیل کے درمیان انڈونیشیا میں اسٹین لیس اسٹیل سلیب تیار کرنے کے مشترکہ منصوبے پر بھی اتفاق ہوا۔ اس سے روزگار کے مواقع پیدا ہوں گے اور صنعتی ترقی کو فروغ ملے گا۔

خلائی تحقیق اور خلائی ٹیکنالوجی کے پرامن استعمال سے متعلق معاہدے میں توسیع کی گئی تاکہ مشترکہ تحقیق۔ ٹیکنالوجی کے تبادلے اور صلاحیت سازی کو مزید آگے بڑھایا جا سکے۔

ہندوستان یوگیاکارتا میں واقع تاریخی پرمبانان مندر کمپلیکس کے تحفظ اور بحالی میں بھی تعاون کرے گا۔ اس اقدام کا مقصد مشترکہ تہذیبی ورثے کا تحفظ اور ثقافتی سفارت کاری کو فروغ دینا ہے۔

زراعت اور متعلقہ شعبوں میں تعاون کے معاہدے کے تحت پائیدار زراعت۔ فصلوں۔ زرعی مشینری۔ مشترکہ تحقیق اور کسانوں کی آمدنی میں اضافے پر کام کیا جائے گا۔

طبی مصنوعات کے ضابطہ کاری کے شعبے میں ہندوستان کے سی ڈی ایس سی او اور انڈونیشیا کے بی پی او ایم کے درمیان معاہدہ کیا گیا تاکہ عالمی معیار کے ضابطوں اور بہترین طریقوں کا تبادلہ ہو سکے اور ہندوستانی طبی مصنوعات کے لیے انڈونیشیا کی منڈی تک رسائی آسان بنائی جا سکے۔

قدرتی آفات سے نمٹنے کے شعبے میں دونوں ممالک کی متعلقہ ایجنسیوں نے بہترین تجربات کے تبادلے۔ ابتدائی انتباہی نظام اور جدید ٹیکنالوجی کے استعمال پر تعاون بڑھانے پر اتفاق کیا۔

ٹیلی مواصلات کی جدید ٹیکنالوجی اور خدمات کے شعبے میں تعاون کے معاہدے کے ذریعے وائرلیس اور کوانٹم نظام سمیت جدید ٹیکنالوجی میں مشترکہ تحقیق اور اختراع کو فروغ دیا جائے گا۔

تحقیق۔ ٹیکنالوجی اور اختراع کے میدان میں بھی تعاون بڑھانے پر اتفاق ہوا تاکہ علم کے تبادلے۔ اسٹارٹ اپس اور اختراعی نظام کو مزید تقویت دی جا سکے۔

صحت کے شعبے میں افرادی قوت کے تعاون کے معاہدے کے تحت طبی ماہرین کے لیے فیلوشپ پروگرام۔ خصوصی تربیت اور انڈونیشیا میں خدمات انجام دینے کے مواقع فراہم کیے جائیں گے۔

ہندوستان کے انفارمیشن فیوژن سینٹر انڈین اوشین ریجن میں انڈونیشیا کے رابطہ افسر کی تعیناتی پر بھی اتفاق ہوا تاکہ سمندری معلومات کے تبادلے اور ہند بحرالکاہل میں سیکیورٹی تعاون کو مزید مضبوط بنایا جا سکے۔

ہندوستان انڈونیشیا کو اعلیٰ معیار کے ڈی ڈبلیو آر 162 قسم کے 100 ٹن گیہوں کے بیج فراہم کرے گا تاکہ غذائی تحفظ کو فروغ دیا جا سکے اور زرعی تعاون کو مزید وسعت دی جا سکے۔

رابندر ناتھ ٹیگور اور کی ہاجر دیوانتارا کے مشترکہ تعلیمی اور ثقافتی وژن کی یاد میں ایک سالہ ثقافتی اور تعلیمی پروگرام منعقد کیا جائے گا۔ یہ پروگرام رابندر ناتھ ٹیگور کے 1927 کے انڈونیشیا دورے کے 100 سال مکمل ہونے کی مناسبت سے ہوگا۔

انڈونیشیا کے سنگھاساری خصوصی اقتصادی زون میں انڈین انسٹی ٹیوٹ آف مینجمنٹ بنگلور کے برانچ کیمپس کے قیام پر بھی اتفاق ہوا۔ اس اقدام سے عالمی سطح پر ہندوستان کی تعلیمی مہارت اور علمی مرکز کی حیثیت مزید مستحکم ہوگی۔

اوپن نیٹ ورک فار ڈیجیٹل کامرس اور انڈونیشیا اوپن نیٹ ورک کے درمیان تعاون پر بھی اتفاق ہوا تاکہ ڈیجیٹل پبلک انفراسٹرکچر اور ڈیجیٹل تجارت کے شعبے میں شراکت داری کو فروغ دیا جا سکے۔