نئی دہلی: وزیر اعظم نریندر مودی نے ہفتے کے روز ازبکستان اور کرغزستان کے دو ملکی دورے کا آغاز کیا۔ انہوں نے امید ظاہر کی کہ یہ سفارتی دورہ وسطی ایشیا میں ہندوستان کی اسٹریٹجک شراکت داری کو مزید مضبوط بنانے میں مددگار ثابت ہوگا۔ دورے کے پہلے مرحلے میں وزیر اعظم مودی ازبکستان کے صدر شوکت مرزیایوف کی دعوت پر دو روزہ دو طرفہ دورے کے لیے تاشقند جائیں گے۔

وزیر اعظم مودی نے روانگی سے قبل اپنے بیان میں کہا کہ حالیہ برسوں میں ہندوستان اور ازبکستان کے درمیان اسٹریٹجک شراکت داری میں نمایاں پیش رفت ہوئی ہے۔ انہوں نے کہا کہ وہ صدر مرزیایوف کے ساتھ تجارت اور سرمایہ کاری، ڈیجیٹل رابطے، دفاع، توانائی اور ’وکست ہندوستان‘ اور ’یانگی ازبکستان‘ کے مشترکہ وژن کو آگے بڑھانے کے حوالے سے بات چیت کے منتظر ہیں۔ تاشقند میں وزیر اعظم شاستری میموریل اور تاشقند اسٹیٹ یونیورسٹی آف اورینٹل اسٹڈیز میں قائم مہاتما گاندھی مرکز کا بھی دورہ کریں گے۔

انہوں نے اسے دونوں ممالک کے درمیان قریبی ثقافتی اور عوامی روابط کے لیے خراجِ تحسین قرار دیا۔ یہ وزیر اعظم مودی کا ازبکستان کا چوتھا دورہ ہوگا۔ اس سے قبل وہ 2015 میں دو طرفہ دورے پر، جبکہ 2016 اور 2022 میں شنگھائی تعاون تنظیم (SCO) کے سربراہی اجلاسوں میں شرکت کے لیے ازبکستان جا چکے ہیں۔ نئی دہلی اور تاشقند کے درمیان دو طرفہ اور کثیر ملکی تعاون گزشتہ برسوں میں مسلسل مضبوط ہوا ہے۔ 2018 میں صدر مرزیایوف کا ہندوستان کا سرکاری دورہ اور 2019 میں وائبرنٹ گجرات گلوبل سمٹ میں ان کی شرکت دونوں ممالک کے بڑھتے ہوئے تعلقات کی اہم مثالیں ہیں۔

تاشقند میں دو طرفہ دورہ مکمل کرنے کے بعد وزیر اعظم مودی کرغزستان کے صدر صدر صادیر جاپاروف کی دعوت پر بشکیک جائیں گے، جہاں وہ SCO کے 26ویں سربراہی اجلاس میں شرکت کریں گے۔ یہ اجلاس تنظیم کے قیام کے 25 سال مکمل ہونے کے موقع پر منعقد کیا جا رہا ہے۔ وزیر اعظم نے کہا کہ ہندوستان 2017 سے SCO کا ایک فعال اور تعمیری رکن رہا ہے۔ انہوں نے کہا کہ ہندوستان خطے کے لیے سلامتی، رابطے اور مواقع پر مبنی اپنے وژن کو آگے بڑھانا چاہتا ہے اور رکن ممالک کے ساتھ مل کر ایسے خطے کے قیام کے لیے کام کرے گا جو دہشت گردی، علیحدگی پسندی اور انتہا پسندی سے پاک ہو۔

مودی نے کہا کہ وہ صدر جاپاروف اور دیگر SCO رہنماؤں سے ملاقات کے علاوہ چھٹے عالمی نومیڈ گیمز کی افتتاحی تقریب میں شرکت کے بھی منتظر ہیں۔ انہوں نے اسے وسطی ایشیا کے شاندار اور زندہ ثقافتی ورثے کا جشن قرار دیا۔ وزیر اعظم نے اعتماد ظاہر کیا کہ ان کا یہ دورہ وسطی ایشیا میں ہندوستان کی اسٹریٹجک شراکت داری کو مضبوط کرے گا، خطے کے ساتھ ہندوستان کے تہذیبی روابط کو مزید گہرا کرے گا اور امن، استحکام اور خوشحالی کے مشترکہ مقصد کو آگے بڑھائے گا۔ شنگھائی تعاون تنظیم (SCO) میں دس رکن ممالک شامل ہیں۔

ان ممالک کا مجموعی رقبہ تقریباً 3.6 کروڑ مربع کلومیٹر اور آبادی 3.4 ارب سے زیادہ ہے۔ تنظیم کی عالمی مجموعی قومی پیداوار (GDP) میں تقریباً 25 فیصد حصہ داری ہے، جبکہ عالمی تجارت میں بھی اس کا اہم کردار ہے۔ ہندوستان کو 2017 میں SCO کی مکمل رکنیت دی گئی تھی۔