واشنگٹن ڈی سی: امریکی صدارتی مشیر پیٹر ناوارو نے کہا ہے کہ صدر ڈونلڈ ٹرمپ اور وزیر اعظم نریندر مودی کے درمیان بہت اچھے ورکنگ تعلقات ہیں اور دونوں روسی تیل سے متعلق ٹیرف کے معاملے کو حل کرلیں گے۔یہ بیان ایسے وقت میں سامنے آیا ہے جب ہندوستان اور امریکہ اپنے قریبی تعلقات کو مزید مضبوط بنانے کی کوشش کر رہے ہیں۔ دونوں ممالک کے درمیان تعلقات کئی شعبوں پر محیط ہیں۔پیٹر ناوارو نے اے این آئی کے ایک سوال کے جواب میں کہا کہ روس یوکرین جنگ کے دوران تقریباً 6 سے 8 ماہ قبل انہوں نے فنانشل ٹائمز میں ایک مضمون لکھا تھا۔ اس میں انہوں نے کہا تھا کہ یوکرین پر روسی حملے سے قبل ہندوستان روس کے ساتھ تیل کی تجارت میں شامل نہیں تھا لیکن اس کے بعد ہندوستان روس سے بڑی مقدار میں تیل خریدنے لگا اور روس کی جانب سے ریفائن شدہ مصنوعات کی فروخت میں بھی اہم کردار ادا کیا۔ ان کے مطابق اس سے روس کی جنگی مشین کو مدد ملی۔

انہوں نے کہا کہ یہ مسئلہ اب حل ہو چکا ہے۔ ناوارو نے مزید کہا کہ ان کے مضمون کے بعد انہیں انٹرنیٹ پر ہندوستان کی جانب سے شدید تنقید کا سامنا کرنا پڑا۔انہوں نے کہا کہ صدر ٹرمپ اور ہندوستانی وزیر اعظم کے درمیان بہت اچھے ورکنگ تعلقات ہیں۔ دونوں رہنما اس معاملے کو آپس میں حل کرلیں گے اور اس معاملے میں ان کے درمیان آنے کی کوئی ضرورت نہیں ہے۔

روسی تیل پر 100 فیصد ٹیرف کی تجویز

اس سے قبل 7 اگست کو امریکی سینیٹ نے ایک دو طرفہ بل منظور کیا تھا جس کے تحت صدر ڈونلڈ ٹرمپ کو ان ممالک کی اشیا پر 100 فیصد تک ٹیرف عائد کرنے کا اختیار دیا جا سکتا ہے جو روسی تیل اور گیس کی درآمد جاری رکھیں گے۔ اس فہرست میں ہندوستان اور چین بھی شامل ہیں۔اس بل کے حامیوں کا کہنا ہے کہ روسی توانائی کی خریداری ماسکو کی معیشت کو سہارا دیتی ہے اور یوکرین میں اس کی فوجی کارروائیوں کے لیے مالی وسائل فراہم کرتی ہے۔

سینیٹ نے لنڈسے او گراہم سینکشننگ روسیا اینڈ ایران ایکٹ 2026 کو 86 کے مقابلے میں 11 ووٹوں سے بھاری اکثریت سے منظور کیا۔اس قانون کے تحت امریکی صدر کو دنیا کے روسی خام تیل یا قدرتی گیس کے 5 بڑے خریدار ممالک سے درآمد ہونے والی اشیا پر 100 فیصد تک ٹیرف عائد کرنے کا اختیار حاصل ہو سکتا ہے۔

روس پر مزید پابندیوں کی تجویز

اس قانون میں روسی صدر ولادیمیر پوتن اور روس کے اعلیٰ سیاسی و فوجی عہدیداروں کے خلاف نئی پابندیاں عائد کرنے کی تجاویز بھی شامل ہیں۔ اس کے علاوہ مالیاتی اداروں۔ توانائی کے منصوبوں اور روس کی جنگی سرگرمیوں سے منسلک اداروں کو بھی پابندیوں کا سامنا کرنا پڑ سکتا ہے۔مجوزہ قانون کے تحت ان پرانے اور دوبارہ رجسٹر کیے گئے تیل بردار بحری جہازوں کو بھی امریکی پابندیوں کا نشانہ بنایا جا سکتا ہے جن کے بارے میں الزام ہے کہ وہ عالمی پابندیوں سے بچنے اور روس کی توانائی کی آمدنی برقرار رکھنے کے لیے استعمال کیے جاتے ہیں۔اس اقدام کا بنیادی مقصد روسی معیشت اور اس کی فوجی کارروائیوں کے لیے مالی وسائل کی فراہمی کو محدود کرنا ہے۔

ہندوستان روسی تیل کا بڑا خریدار

مجوزہ قانون امریکی صدر کو روسی تیل یا قدرتی گیس کے 5 بڑے خریدار ممالک سے درآمد ہونے والی اشیا پر 100 فیصد تک ٹیرف عائد کرنے کا اختیار دیتا ہے۔ ہندوستان چین کے ساتھ روسی خام تیل کے بڑے خریداروں میں شامل ہے۔اس اقدام کے ذریعے توانائی درآمد کرنے والے ممالک کو یہ انتخاب دینے کی کوشش کی گئی ہے کہ وہ رعایتی روسی توانائی کی خریداری جاری رکھیں یا امریکی مارکیٹ تک رسائی برقرار رکھیں۔

ہندوستان نے 2022 میں روس یوکرین تنازع شروع ہونے کے بعد رعایتی روسی خام تیل کی خریداری میں اضافہ کیا تھا۔ اس کا مقصد عالمی منڈی میں پیدا ہونے والی بے یقینی کے دوران ملک کی توانائی کی ضروریات پوری کرنا تھا۔روس تاریخی طور پر ہندوستان کے لیے خام تیل کا بڑا روایتی سپلائر نہیں رہا تھا۔ تاہم رعایتی قیمت پر دستیاب روسی خام تیل نے ہندوستانی ریفائنریوں کو خام مال کی لاگت کم رکھنے اور ملک میں ایندھن کی مسلسل فراہمی برقرار رکھنے میں مدد دی۔ خاص طور پر آبنائے ہرمز میں نقل و حمل میں رکاوٹوں کے دوران اس کی اہمیت مزید بڑھ گئی۔