نئی دہلی: مرکزی وزیر تجارت و صنعت پیوش گوئل نے منگل کے روز چلی کے وزیرِ خارجہ فرانسسکو پیریز میکینا اور چلی کے وفد کے اراکین کے ساتھ ملاقات کی، جس میں بھارت اور چلی کے درمیان مجوزہ جامع اقتصادی شراکت داری معاہدے (CEPA) کی پیش رفت کا جائزہ لیا گیا اور دو طرفہ تجارت و سرمایہ کاری کو مزید مضبوط بنانے پر بات چیت ہوئی۔

ملاقات میں دونوں ممالک نے اقتصادی تعلقات کو وسعت دینے، سرمایہ کاری بڑھانے اور اسٹریٹجک شراکت داری کو مزید مستحکم بنانے پر تبادلہ خیال کیا۔ پیوش گوئل نے اس ملاقات کی تفصیلات سوشل میڈیا پلیٹ فارم “ایکس” پر شیئر کرتے ہوئے کہا کہ دونوں ممالک نے بھارت-چلی جامع اقتصادی شراکت داری معاہدے کی مذاکراتی پیش رفت کا جائزہ لیا اور تجارت، سرمایہ کاری اور اسٹریٹجک تعاون کو مزید گہرا کرنے کے طریقوں پر گفتگو کی۔

Held a delightful discussion over breakfast today with H.E. Mr. Francisco Pérez Mackenna, Minister of Foreign Affairs of the Republic of Chile, along with members of the Chilean delegation.

We reviewed the progress of the India-Chile Comprehensive Economic Partnership Agreement… pic.twitter.com/vIMeWoA3Xv

— Piyush Goyal (@PiyushGoyal) May 12, 2026

انہوں نے کہا کہ بھارت چلی کے ساتھ اپنے دیرینہ اور دوستانہ تعلقات کو قدر کی نگاہ سے دیکھتا ہے اور باہمی اقتصادی تعاون اور عوامی روابط کو مزید وسعت دینے کے لیے پرعزم ہے۔ یہ ملاقات ایسے وقت میں ہوئی ہے جب دونوں ممالک مجوزہ CEPA پر مذاکرات جاری رکھے ہوئے ہیں، جس کا مقصد موجودہ ترجیحی تجارتی معاہدے (PTA) کو وسعت دینا ہے۔

مجوزہ معاہدے کے تحت ڈیجیٹل خدمات، سرمایہ کاری کے فروغ، چھوٹے و درمیانے درجے کے کاروبار (MSMEs) اور اہم معدنیات جیسے شعبوں کو بھی شامل کرنے کی کوشش کی جا رہی ہے۔ واضح رہے کہ بھارت اور چلی نے 2005 میں اقتصادی تعاون کا فریم ورک معاہدہ کیا تھا، جس کے بعد 2006 میں PTA پر دستخط ہوئے۔ اس کا توسیعی ورژن 2016 میں طے پایا اور 2017 میں نافذ ہوا۔ بعد ازاں دونوں ممالک نے اسے مزید وسعت دینے پر اتفاق کیا اور 2019 سے 2021 کے دوران مذاکرات کے تین دور بھی منعقد کیے گئے۔