اسلام آباد: پاکستان کے ایک سفارتکار نے جلال آباد میں افغانستان کے ایک سینیئر گورنر سے ملاقات کی، جو حالیہ مہینوں میں دونوں ممالک کے درمیان بڑھتی کشیدگی کے دوران پہلا اعلیٰ سطحی رابطہ ہے۔ یہ ملاقات ایسے وقت میں ہوئی جب پشاور کے صدر علاقے میں فیڈرل کنسٹیبلری ہیڈکوارٹر پر خودکش حملے میں تین اہلکار جاں بحق ہوئے، تاہم فورسز نے حملہ آوروں کو فوری طور پر ہلاک کر دیا۔

یہ ملاقات پاکستان کے قونصل جنرل شفیع اللہ خان اور ننگرہار کے گورنر ملا محمد نعیم اخوند کے درمیان ہوئی، جو طالبان کے مقرر کردہ ایک اہم رہنما اور سپریم لیڈر ہبت اللہ اخوندزادہ کے قریبی ساتھی سمجھے جاتے ہیں۔ ڈان کے مطابق گزشتہ کئی ماہ میں دونوں عہدیداروں کے درمیان یہ پہلا براہِ راست رابطہ تھا۔

ملا نعیم اخوند کا طالبان کے ساتھ طویل تعلق ہے۔ طالبان کے پہلے دورِ حکومت (1996–2001) میں وہ سرحدی و قبائلی امور کے نائب وزیر اور سول ایوی ایشن کے نائب وزیر رہ چکے ہیں۔ 20 سالہ جنگ کے دوران وہ طالبان کی فوجی کمیشن میں بھی اہم کردار میں شامل رہے اور صوبہ ہلمند میں عسکری کارروائیوں کی قیادت کی۔ وہ ملا اختر منصور کے قریبی ساتھی اور وزیرِ دفاع ملا یعقوب مجاہد کے قابلِ اعتماد اتحادی سمجھے جاتے ہیں۔

افغان خبر ایجنسی بختَر کے مطابق، "اسلامی امارت خطے اور پڑوسی ممالک کے ساتھ اچھے تعلقات، تعاون اور مشترکہ مفادات کے تحفظ کے لیے مثبت اور تعمیری رویہ رکھتی ہے، اور اس سلسلے میں کوششیں جاری ہیں۔"

پاکستان کا دیرینہ مؤقف ہے کہ دہشتگرد گروہوں نے افغان سرزمین کو سرحد پار حملوں کے لیے استعمال کیا ہے، جس کی افغان طالبان تردید کرتے ہیں۔

رپورٹ کے مطابق گورنر ننگرہار نے دونوں ممالک کے درمیان "بھائی چارے، حسنِ سلوک اور تاریخی رشتے" کا ذکر کرتے ہوئے کہا کہ باہمی احترام، سمجھ بوجھ اور منظم رابطہ کاری سے تعلقات مضبوط رہ سکتے ہیں۔

ذرائع کے مطابق ملا نعیم اخوند نے پاکستانی سفارتکار کو بتایا کہ وہ دونوں ملکوں کے درمیان کشیدگی کم کرنے کے لیے پہلے ہی کوششیں کر چکے ہیں۔ سفارتکار نے بھی پاکستان کے موجودہ سیکیورٹی خدشات کی وضاحت کی اور دونوں نے تعلقات کو دوبارہ درست سمت میں لانے کے طریقوں پر بات کی۔

بختَر کے مطابق، ملاقات میں "نسلی، لسانی، مذہبی اور ثقافتی پہلوؤں سمیت خطے کی صورتحال اور عوام کی روزمرہ ضروریات" پر بھی گفتگو ہوئی، جو اچھے ہمسائیگی کے اصولوں کے مطابق ہے۔

ملاقات میں ننگرہار کے نائب گورنر مولوی عزیز اللہ مصطفی، ڈائریکٹر خارجہ امور مولوی جان محمد انقلاب، صوبائی ترجمان قاری احسان اللہ عثمانی اور دیگر حکام بھی شریک تھے۔