اسلام آباد" پاکستانی حکومت نے خبردار کیا ہے کہ کئی معاشی اور بیرونی عوامل مالی سال 2026-27 کے بجٹ کے منظرنامے کو شدید متاثر کر سکتے ہیں۔ پارلیمنٹ میں پیش کیے گئے مالیاتی خطرات کے بیان میں کہا گیا ہے کہ یہ عوامل مالی خسارے میں نمایاں اضافہ کر سکتے ہیں۔یہ رپورٹ وزیر خزانہ محمد اورنگزیب اور سیکریٹری خزانہ امداد اللہ بوسال نے پبلک فنانس مینجمنٹ ایکٹ 2019 کے تحت پارلیمنٹ میں پیش کی۔ رپورٹ میں ان بڑے خطرات کی نشاندہی کی گئی ہے جو آئندہ مالی سال میں مالیاتی استحکام کے لیے چیلنج بن سکتے ہیں۔

ڈان اخبار کے مطابق حکومت نے عالمی منڈی میں تیل کی بڑھتی ہوئی قیمتوں کو ایک بڑا خطرہ قرار دیا ہے۔ خاص طور پر مشرق وسطیٰ میں جاری کشیدگی کے باعث تیل کی قیمتوں میں اضافے کا خدشہ موجود ہے۔

وزارت خزانہ نے خبردار کیا ہے کہ اگر حکومت ایندھن کی قیمتوں میں مکمل اضافہ صارفین تک منتقل نہ کرے تو پیٹرولیم لیوی کی وصولیوں میں کمی آسکتی ہے جبکہ سبسڈی کی ضرورت بڑھ سکتی ہے۔

رپورٹ کے مطابق اگر خام تیل کی قیمت میں 40 امریکی ڈالر فی بیرل اضافہ ہوتا ہے تو مالی سال 2026-27 کے دوران مالی خسارہ مجموعی قومی پیداوار (جی ڈی پی) کے 0.8 فیصد تک بڑھ سکتا ہے۔

ڈان کے مطابق معاشی ترقی کی سست رفتار بھی ایک بڑا چیلنج ہے۔ حقیقی جی ڈی پی کی شرح نمو میں 1 فیصد کمی ٹیکس آمدنی کو کم کر سکتی ہے جبکہ سماجی تحفظ کے اخراجات میں اضافہ ہو سکتا ہے۔ اس کے نتیجے میں مالی خسارہ جی ڈی پی کے تقریباً 0.2 فیصد تک بڑھ سکتا ہے۔

محصولات کی وصولی بھی خطرات سے دوچار ہے۔ رپورٹ کے مطابق اگر ٹیکس آمدنی میں اضافہ بجٹ ہدف سے 10 فیصد کم رہتا ہے تو حکومتی وسائل جی ڈی پی کے 0.7 فیصد کے برابر کم ہو سکتے ہیں۔

اسی طرح اسٹیٹ بینک آف پاکستان کے منافع میں 30 فیصد کمی کی صورت میں مالی خسارہ جی ڈی پی کے 0.3 فیصد تک بڑھ سکتا ہے جبکہ پیٹرولیم لیوی کی وصولیاں توقعات سے کم رہنے پر خسارے میں مزید 0.2 فیصد اضافہ ہو سکتا ہے۔

مالیاتی خطرات کے بیان میں قرضوں کی ادائیگی کے اخراجات کو بھی ایک بڑی کمزوری قرار دیا گیا ہے۔ اندرون ملک اور بیرونی شرح سود میں اضافہ اور قرضوں کی دوبارہ مالیاتی ترتیب کے دباؤ سے حکومتی اخراجات میں نمایاں اضافہ ہو سکتا ہے۔

سرکاری ملکیتی ادارے بھی خطرات کا سبب بن سکتے ہیں کیونکہ ان کی جانب سے منافع کی ادائیگی میں کمی اور مالی معاونت کی ممکنہ ضرورت حکومتی مالیات پر اضافی بوجھ ڈال سکتی ہے۔

رپورٹ میں موسمیاتی تبدیلی اور قدرتی آفات کو بھی سنگین خطرات میں شامل کیا گیا ہے۔ کہا گیا ہے کہ اگرچہ ماحولیاتی موافقت کے لیے سبز سرمایہ کاری مالی توازن پر محدود اثر ڈال سکتی ہے لیکن قدرتی آفات کے لیے مخصوص مالیاتی انتظامات نہ ہونے کی صورت میں ایک اوسط قدرتی آفت مالی خسارے میں جی ڈی پی کے 1.5 فیصد تک اضافہ کر سکتی ہے۔