لاہور: پاکستان میں انسانی حقوق کی نگرانی کا نظام بڑھتی ہوئی بے یقینی کا شکار ہے۔ اہم قومی اور صوبائی کمیشنوں کے چیئرمینوں اور ارکان کی تقرری میں تاخیر نے ان اداروں کی آزادی اور کارکردگی اور پاکستان کی جانب سے بین الاقوامی انسانی حقوق سے متعلق وعدوں کو پورا کرنے کی صلاحیت پر سوالات کھڑے کردیے ہیں۔

ایکسپریس ٹریبیون کے مطابق قومی کمیشن برائے انسانی حقوق کی سابقہ تشکیل نے نومبر 2025 میں اپنی 4 سالہ مدت مکمل کرلی تھی لیکن اب تک نیا کمیشن مکمل طور پر تشکیل نہیں دیا جاسکا ہے۔ قومی کمیشن برائے وقارِ نسواں بھی مستقل چیئرپرسن کے بجائے قائم مقام سربراہ کے ذریعے کام کر رہا ہے۔ قومی کمیشن برائے انسانی حقوق کی سابق چیئرپرسن خاور ممتاز نے حکومتوں پر بروقت تقرریاں یقینی نہ بنانے پر تنقید کی ہے۔

انہوں نے کہا کہ کسی کمیشن کی مدت مکمل ہونے سے کافی پہلے تقرری کا عمل شروع ہوجانا چاہیے تاکہ ادارہ جاتی خلا پیدا نہ ہو۔ خاور ممتاز کے مطابق عارضی انتظامات پر طویل عرصے تک انحصار آزاد انسانی حقوق کے اداروں کی خودمختاری اور کارکردگی کو کمزور کرسکتا ہے۔

قومی کمیشن برائے انسانی حقوق کے قانون میں 2026 میں ترمیم کے ذریعے دفعہ 4 اے شامل کی گئی تھی جس کے تحت چیئرپرسن کو اپنی مدت مکمل ہونے کے بعد زیادہ سے زیادہ 120 دن تک یا نئے چیئرپرسن کی تقرری تک عہدے پر برقرار رہنے کی اجازت دی گئی ہے۔ تاہم سابق کمیشن کی مدت نومبر 2025 میں ختم ہونے کے باعث یہ عبوری مدت بھی گزر چکی ہے جس سے قومی کمیشن برائے انسانی حقوق کی موجودہ قانونی اور انتظامی حیثیت پر سوالات پیدا ہوگئے ہیں۔

قومی کمیشن برائے انسانی حقوق کی چیئرپرسن رابعہ جویری آغا نے مؤقف اختیار کیا کہ کمیشن عملی طور پر مؤثر انداز میں کام کر رہا ہے اور انہوں نے 2 سال قبل بھرتی کیے گئے اضافی عملے کا حوالہ دیا۔ ان کا کہنا تھا کہ چیئرپرسن کی مدت میں توسیع قانون کے تحت کی گئی تھی اور یہ طریقہ کار دنیا بھر کے انسانی حقوق کے اداروں میں رائج طریقوں سے مطابقت رکھتا ہے۔ نئے کمیشن کی تشکیل سے متعلق سوالات انہوں نے حکومت کی طرف منتقل کردیے۔

دریں اثنا انسانی حقوق کے کارکن پیٹر جیکب نے بتایا کہ پارلیمنٹ نے دسمبر 2025 میں قومی کمیشن برائے حقوق اقلیت کے قیام کے لیے قانون منظور کیا تھا لیکن اس ادارے میں بھی تقرریاں اب تک مکمل نہیں ہوسکی ہیں۔

قومی کمیشن برائے حقوق اطفال بھی خالی آسامیوں کے مسئلے سے دوچار ہے۔ وزارت انسانی حقوق نے جولائی 2026 میں پنجاب اور اسلام آباد اور بلوچستان کی نمائندگی کرنے والے ارکان کی تقرری کے لیے درخواستیں طلب کی تھیں۔