نئی دہلی: اسٹاک ہوم انٹرنیشنل پیس ریسرچ انسٹی ٹیوٹ (سیپری) کی نئی رپورٹ کے مطابق پاکستان کے فوجی سازوسامان کا بڑا حصہ اب چین سے حاصل کیا جا رہا ہے اور ملک کی تقریباً 80 فیصد اسلحہ درآمدات بیجنگ سے آ رہی ہیں۔ رپورٹ کے مطابق 2021 سے 2025 کے دوران پاکستان دنیا میں بڑے ہتھیار حاصل کرنے والا پانچواں بڑا ملک بن گیا، جبکہ 2016 سے 2020 کے عرصے میں وہ دسویں نمبر پر تھا۔

اس مدت کے دوران پاکستان کی اسلحہ درآمدات میں 66 فیصد اضافہ ہوا اور عالمی اسلحہ درآمدات میں اس کا حصہ 4.2 فیصد رہا۔ سیپری کے مطابق چین پاکستان کا سب سے بڑا اسلحہ فراہم کرنے والا ملک رہا۔ 2021 سے 2025 کے دوران پاکستان کو ملنے والے ہتھیاروں کا 80 فیصد چین سے آیا، جبکہ 2016 سے 2020 کے دوران یہ تناسب 73 فیصد تھا۔

رپورٹ میں بتایا گیا ہے کہ اگرچہ چین نے اس عرصے میں 47 ممالک کو اسلحہ فراہم کیا، تاہم اس کی مجموعی برآمدات کا 61 فیصد صرف پاکستان کو گیا۔ رپورٹ میں بھارت کی پوزیشن کا بھی ذکر کیا گیا ہے، جو اسی مدت میں دنیا کا دوسرا بڑا اسلحہ درآمد کرنے والا ملک رہا۔ عالمی اسلحہ درآمدات میں بھارت کا حصہ 8.2 فیصد رہا۔ سیپری کے مطابق بھارت کی اسلحہ درآمدات کی ایک بڑی وجہ چین اور پاکستان کے ساتھ کشیدگی ہے۔

رپورٹ میں کہا گیا کہ ان تنازعات کے باعث کئی بار مسلح جھڑپیں بھی ہو چکی ہیں، جیسا کہ مئی 2025 میں بھارت اور پاکستان کے درمیان مختصر فوجی تصادم کے دوران دونوں ممالک نے درآمد شدہ ہتھیار استعمال کیے۔ تاہم رپورٹ کے مطابق گزشتہ دہائی کے دوران بھارت کی مجموعی اسلحہ درآمدات میں معمولی کمی آئی ہے۔ 2016-20 کے مقابلے میں 2021-25 کے دوران بھارت کی اسلحہ درآمدات میں تقریباً 4 فیصد کمی ریکارڈ کی گئی۔ اس کمی کی ایک وجہ بھارت کی جانب سے مقامی سطح پر ہتھیاروں کی تیاری اور ڈیزائن کی بڑھتی ہوئی صلاحیت کو قرار دیا گیا ہے، اگرچہ گھریلو پیداوار میں اکثر تاخیر کا سامنا بھی رہتا ہے۔

رپورٹ میں یہ بھی کہا گیا ہے کہ بھارت اب بھی کئی اہم دفاعی نظاموں کے لیے غیر ملکی سپلائرز پر انحصار کر رہا ہے۔ حالیہ یا مجوزہ دفاعی معاہدوں میں فرانس سے 140 تک لڑاکا طیاروں اور جرمنی سے چھ آبدوزوں کی خریداری شامل ہے، جو ظاہر کرتا ہے کہ بھارت کا غیر ملکی ہتھیاروں پر انحصار مستقبل میں بھی جاری رہ سکتا ہے۔

گزشتہ برسوں میں بھارت نے اسلحہ خریداری کے معاملے میں روس پر انحصار کم کر کے مغربی ممالک کی طرف رخ کیا ہے، خصوصاً فرانس، اسرائیل اور امریکا کی جانب۔ رپورٹ کے مطابق بھارت کی اسلحہ درآمدات میں روس کا حصہ 2011-15 میں 70 فیصد تھا جو 2016-20 میں کم ہو کر 51 فیصد اور 2021-25 میں مزید کم ہو کر 40 فیصد رہ گیا۔

سیپری کے سینئر محقق سیمون ویزمین کے مطابق چین کی بڑھتی ہوئی فوجی طاقت کے بارے میں خدشات ایشیا اور اوشیانا کے کئی ممالک میں دفاعی اخراجات اور اسلحہ کی خریداری کو متاثر کر رہے ہیں۔ انہوں نے کہا کہ جنوبی ایشیا میں بھارت کی بڑی اسلحہ درآمدات کی ایک وجہ چین سے لاحق خطرات اور پاکستان کے ساتھ طویل عرصے سے جاری تنازع ہے، جبکہ پاکستان چین سے اسلحہ حاصل کرنے والا سب سے بڑا ملک ہے۔

رپورٹ کے مطابق عالمی سطح پر 2021 سے 2025 کے دوران سب سے زیادہ اسلحہ درآمد کرنے والے پانچ ممالک یوکرین، بھارت، سعودی عرب، قطر اور پاکستان رہے، جن کا مجموعی طور پر عالمی اسلحہ درآمدات میں 35 فیصد حصہ بنتا ہے۔ اسی عرصے میں امریکا دنیا کا سب سے بڑا اسلحہ برآمد کرنے والا ملک رہا جس کا عالمی برآمدات میں حصہ 42 فیصد رہا۔ فرانس 9.8 فیصد کے ساتھ دوسرے جبکہ روس 6.8 فیصد کے ساتھ تیسرے نمبر پر رہا۔

رپورٹ میں یہ بھی بتایا گیا کہ روس کے عالمی اسلحہ برآمدات میں نمایاں کمی آئی ہے۔ 2016-20 میں اس کا حصہ 21 فیصد تھا جو 2021-25 میں کم ہو کر 6.8 فیصد رہ گیا۔ اس کمی کی بڑی وجہ الجزائر، چین اور مصر جیسے ممالک کو اسلحہ برآمدات میں کمی کو قرار دیا گیا ہے۔

مزید برآں تجزیے کے مطابق 1960 کی دہائی کے بعد پہلی بار یورپ عالمی اسلحہ درآمدات کا سب سے بڑا خطہ بن گیا ہے۔ یوکرین جنگ اور خطے میں بڑھتے ہوئے سکیورٹی خدشات کے باعث یورپ کا عالمی اسلحہ درآمدات میں حصہ 33 فیصد رہا، جبکہ ایشیا و اوشیانا کا حصہ 31 فیصد اور مغربی ایشیا کا حصہ 26 فیصد ریکارڈ کیا گیا۔