لاہور
سول سوسائٹی کے نمائندوں، ماہرینِ معاشیات، مزدور رہنماؤں اور انسانی حقوق کے کارکنوں نے پاکستان کے مالی سال 2026-27 کے وفاقی بجٹ پر سخت تنقید کرتے ہوئے اسے کفایت شعاری پر مبنی منصوبہ قرار دیا ہے، جو معاشی استحکام کا بوجھ کم آمدنی والے خاندانوں پر ڈال رہا ہے جبکہ مزدوروں کے حقوق اور صنفی مساوات کو نظر انداز کر رہا ہے۔
ہیومن رائٹس کمیشن آف پاکستان کی جانب سے ایکس پر جاری بیان کے مطابق، کمیشن کے زیر اہتمام ایک سیمینار میں شرکاء نے مؤقف اختیار کیا کہ حکومت کی مالیاتی پالیسیاں پہلے سے موجود عدم مساوات کو مزید بڑھائیں گی اور کمزور طبقات کے معیارِ زندگی کو مزید متاثر کریں گی۔
گفتگو کی نظامت کرتے ہوئے ماہرِ معاشیات ڈاکٹر فہد علی نے کہا کہ تعلیم، صحت، غذائیت اور سماجی تحفظ پر سرکاری اخراجات میں کمی سماجی و معاشی خلیج کو مزید گہرا کرے گی۔ ان کے مطابق گھریلو اخراجات کے رجحانات میں بگاڑ اور غذائی معیار میں کمی ملک بھر میں بڑھتی ہوئی معاشی مشکلات کی عکاسی کرتی ہے۔
ڈاکٹر فہد علی نے مزدوروں کے تحفظ سے متعلق قوانین کے مؤثر نفاذ کی ضرورت پر بھی زور دیا اور کہا کہ تخمینے کے مطابق باعزت زندگی گزارنے کے لیے درکار اجرت، مقررہ کم از کم اجرت سے کہیں زیادہ ہے۔
ماہرِ معاشیات ڈاکٹر ہادیہ مجید نے کہا کہ بجٹ میں صنفی مساوات سے متعلق وعدے زیادہ تر علامتی نوعیت کے ہیں۔ انہوں نے کہا کہ تعلیم، صحت اور سماجی تحفظ جیسے اہم شعبوں کی ذمہ داری عملاً صوبوں پر منتقل کر دی گئی ہے، جو پہلے ہی شدید مالی دباؤ کا سامنا کر رہے ہیں۔
انہوں نے مزید کہا کہ اگرچہ بینظیر انکم سپورٹ پروگرام کے لیے فنڈز میں اضافہ کیا گیا ہے، لیکن یہ امداد اب بھی بنیادی غذائی ضروریات پوری کرنے کے لیے ناکافی ہے۔
ڈاکٹر ہادیہ مجید کے مطابق بجٹ میں دی گئی ٹیکس رعایتوں سے زیادہ تر خواتین کو فائدہ نہیں پہنچے گا کیونکہ رسمی روزگار میں ان کی شرکت محدود ہے۔ انہوں نے حکومت کو تنقید کا نشانہ بناتے ہوئے کہا کہ زچگی کی صحت، بچوں کی بقا اور لڑکیوں کی تعلیم جیسے کمزور اشاریوں کے باوجود خواتین کی معاشی ترقی میں رکاوٹ بننے والے بنیادی مسائل کو حل کرنے کے لیے کوئی مؤثر اقدامات نہیں کیے گئے۔
آل پاکستان ٹریڈ یونین فیڈریشن کی سیکریٹری جنرل روبینہ جمیل نے حکومت پر الزام عائد کیا کہ اس نے ایسے اخراجات کو ترجیح دی ہے جن سے محنت کش طبقے کو کوئی حقیقی ریلیف نہیں ملتا۔
انہوں نے کہا کہ بجٹ میں کنٹریکٹ ورکرز، گھریلو ملازمین، زرعی مزدوروں، گارمنٹس صنعت کے کارکنوں، پنشنرز اور خطرناک صنعتوں میں کام کرنے والے ملازمین کے تحفظ کے لیے کوئی مؤثر اقدامات شامل نہیں ہیں۔
.webp "پاکستان : کفایت شعاری بجٹ پر غربت میں اضافے کا الزام")
