اسلام آباد-پاکستان کا نام اگرچہ اسٹیٹ آف فوڈ اینڈ ایگریکلچر 2025 کی تازہ ترین رپورٹ میں شامل نہیں لیکن فوڈ اینڈ ایگریکلچر آرگنائزیشن کی جانب سے جاری کردہ خدشات پاکستان کی بگڑتی ہوئی زرعی صورتحال سے پوری طرح مطابقت رکھتے ہیں۔رپورٹ کو ایک سخت تنبیہ قرار دیا گیا ہے جس میں بتایا گیا ہے کہ انسانی سرگرمیوں سے ہونے والی زمین کی تباہی نہ صرف عالمی سطح پر پیداوار کو کم کر رہی ہے بلکہ ایک اعشاریہ سات ارب افراد کے روزگار کو بھی خطرے میں ڈال رہی ہے۔ایف اے او کے مطابق امیر ممالک بھاری زرعی اخراجات کے ذریعے مٹی کے نقصان کو کچھ حد تک چھپا لیتے ہیں لیکن غریب ممالک کو اس کے کہیں زیادہ منفی اثرات کا سامنا کرنا پڑ رہا ہے

پاکستان میں بھی زمین اور پانی کے وسائل کی مسلسل غلط حکمرانی نے صورتحال کو خطرناک رخ دے دیا ہے جیسا کہ ڈان نے رپورٹ کیا ہے۔ڈان کے مطابق آزادی کے بعد پاکستان کی زرعی ترقی زیادہ زمین کی کاشت بہتر پیداوار اور فصلوں کی زیادہ شدت کے باعث ہوئی
مگر پانی کی کمی نے زرعی رقبے میں اضافے کو روک دیا اور یہ اضافہ آبادی کے بڑھتے ہوئے دباؤ کے مقابلے میں بہت پیچھے رہ گیا۔پیداواری بہتری بھی زیادہ تر فصلوں میں رک چکی ہے جس کے بعد کسان ایک ہی سال میں زیادہ فصلیں لینے پر مجبور ہو گئے ہیں

قلیل دورانیہ کی اقسام مشینری کا استعمال اور معاشی دباؤ خصوصاً دو اعشاریہ پانچ ایکڑ سے کم زمین رکھنے والے کسانوں پر اس حد تک بڑھ چکا ہے کہ زیادہ تر نہری علاقوں میں تین فصلوں کا چکر عام ہو گیا ہے
یہ بے رحمانہ طریقہ کار آرام کے وقفوں کو ختم کر چکا ہے فصلوں کی ترتیب کو سخت بنا چکا ہے اور مٹی کی صحت کو شدید نقصان پہنچا چکا ہے
گندم پر گندم اور چاول پر چاول کا مسلسل کاشت ہونا اب عام بات ہے

ساتھ ہی یوریا اور ڈی اے پی جیسے کیمیائی کھادوں کے استعمال میں بے تحاشا اضافہ ہوا ہے جبکہ نامیاتی مادہ تقریباً ختم ہو چکا ہے۔اس عدم توازن نے مٹی سے نامیاتی مواد چھین لیا ہے اور پنجاب کے کئی علاقوں میں یہ سطح صفر اعشاریہ پانچ فیصد سے بھی کم ہو چکی ہے
مٹی کی الکلائن سطح جو اب اکثر آٹھ پی ایچ سے اوپر ہے غذائی اجزا کے جذب کو روک رہی ہے۔فصلوں کی باقیات جلانے سے مٹی کے جاندار ختم ہو رہے ہیں اور پاکستان کی سردیوں کی اسموگ میں اضافہ ہو رہا ہے۔زیر زمین پانی کے حد سے زیادہ استعمال نے آبپاشی کے معیار کو مزید خراب کر دیا ہے جس سے زمین میں نمکیات بڑھ رہے ہیں اور پیداوار کم ہو رہی ہے۔بے حساب جوتائی بھی مٹی کی بناوٹ کو توڑ رہی ہے جس سے کٹاؤ بڑھ رہا ہے اور حیاتیاتی تنوع کم ہو رہا ہے۔ایف اے او کے مطابق یہ صورتحال مستقبل کی زرعی صلاحیت کے لئے تباہ کن ثابت ہو سکتی ہے

ماہرین کا کہنا ہے کہ پاکستان کے لئے اب ردعمل پر مبنی حکمرانی کا وقت ختم ہو چکا ہے۔زرعی رقبہ سکڑ رہا ہے اور فصلوں کا دباؤ بڑھ رہا ہے اس لئے پائیدار جوتائی پانی کے مؤثر استعمال اور متوازن کھاد پالیسی کو قومی ترجیح بنانا ناگزیر ہے۔کسانوں کو نامیاتی طریقوں کی تربیت دینا ضروری ہے۔بایو گیس اور کمپوسٹ پلانٹس جنہیں سرکاری اور نجی شراکت کے ذریعے فروغ دیا جا سکتا ہے ملک کے بڑے شہری فضلے کو سستی کھاد میں بدلنے کا بہترین ذریعہ ثابت ہو سکتے ہیں جیسا کہ ڈان نے رپورٹ کیا ہے