نئی دہلی

ہندوستان نے جمعہ کے روز ایک بار پھر پاکستان کی جانب سے سرحد پار دہشت گردی کی حمایت کے معاملے پر سخت موقف اختیار کرتے ہوئے افغانستان میں پاکستان کی جانب سے کیے گئے فضائی حملوں کی شدید مذمت کی، جن میں خواتین اور بچوں سمیت متعدد شہری ہلاک ہوئے تھے۔

جمعہ کو قومی دارالحکومت میں ایک پریس کانفرنس سے خطاب کرتے ہوئے وزارت خارجہ کے ترجمان رندھیر جیسوال نے ایک سوال کے جواب میں کہا کہ سندھ طاس معاہدے کے حوالے سے ہندوستان کا موقف بدستور برقرار ہے۔

انہوں نے کہا کہ سندھ طاس معاہدہ (آئی ڈبلیو ٹی) پاکستان کی جانب سے سرحد پار دہشت گردی کی مسلسل سرپرستی کے جواب میں معطل ہے۔ پاکستان کو قابلِ اعتماد اور ناقابلِ واپسی انداز میں سرحد پار دہشت گردی کی حمایت ترک کرنا ہوگی۔دریں اثنا، جمعرات کو ہندوستان اور جاپان نے پاکستان سے منسلک سرحد پار دہشت گردی کی سخت اور دوٹوک مذمت کرتے ہوئے عالمی برادری سے مطالبہ کیا کہ ریاستی سرپرستی میں قائم دہشت گردوں کی محفوظ پناہ گاہوں اور مالی معاونت کے نیٹ ورکس کو فوری طور پر ختم کیا جائے۔

وزیر اعظم نریندر مودی اور جاپان کی وزیر اعظم سانے تاکائیچی کے درمیان دو طرفہ مذاکرات کے بعد جاری مشترکہ بیان کے مطابق، دونوں ممالک نے جنوبی ایشیا میں دہشت گردی کے بڑھتے ہوئے خطرے کے خلاف متحد اور مضبوط موقف اختیار کیا۔

دونوں رہنماؤں نے صرف بیانات تک محدود رہنے کے بجائے اقوام متحدہ کی فہرست میں شامل تمام دہشت گرد تنظیموں اور ان کے معاون گروہوں کے خلاف فوری اور مشترکہ عالمی کارروائی کا مطالبہ کیا۔ انہوں نے خاص طور پر لشکرِ طیبہ (ایل ای ٹی)، جیشِ محمد (جے ای ایم)، القاعدہ اور داعش کا نام لیا۔

انہوں نے زور دیا کہ عالمی برادری کو دہشت گردوں کی محفوظ پناہ گاہوں کا مکمل خاتمہ کرنے، دہشت گردی کی مالی معاونت اور بین الاقوامی جرائم کے درمیان تعلق کو توڑنے، اور دہشت گردوں کی سرحد پار نقل و حرکت روکنے کے لیے فیصلہ کن اقدامات کرنے چاہئیں۔

ادھر، جمعہ کی پریس بریفنگ کے دوران جب پاکستان کی جانب سے افغانستان پر کیے گئے فوجی حملوں اور افغانستان کو ہندوستانی حمایت کے بارے میں سوال کیا گیا، تو وزارت خارجہ کے ترجمان نے کہا کہ ہندوستان افغانستان کی خودمختاری اور علاقائی سالمیت کی حمایت کرتا ہے اور ملک کے ساتھ انسانی ہمدردی پر مبنی تعاون جاری رکھے ہوئے ہے۔

رندھیر جیسوال نے کہا کہ ہم نے پاکستان کی جانب سے افغانستان پر کیے گئے فضائی حملوں کی سخت مذمت کی تھی، جن میں خواتین اور بچوں سمیت کئی بے گناہ شہری جاں بحق ہوئے۔ ہم نے قیمتی جانوں کے ضیاع پر تعزیت کا اظہار کیا تھا اور ساتھ ہی افغانستان کی خودمختاری اور علاقائی سالمیت کے لیے اپنی مضبوط حمایت کا اعادہ بھی کیا تھا۔

انہوں نے مزید کہا کہ ہمارا افغانستان کے ساتھ انسانی امداد کا تعاون جاری ہے۔ ہم وہاں ادویات بھیج رہے ہیں اور ایسے ترقیاتی منصوبوں میں بھی تعاون کر رہے ہیں جو وہاں کے عوام کی زندگیوں میں بہتری لا سکتے ہیں۔

پاکستان نے افغانستان کے مشرقی صوبوں پکتیا، پکتیکا اور کنڑ میں سرحد پار فوجی حملے کیے تھے، جن کے نتیجے میں بڑی تعداد میں شہری ہلاک و زخمی ہوئے اور وسیع پیمانے پر تباہی پھیلی۔طالبان کی قیادت والی افغان حکومت کے نائب ترجمان حمداللہ فطرت نے سوشل میڈیا پر جاری بیان میں کہا، "اب تک موصول ہونے والی اطلاعات کے مطابق، گزشتہ رات کیے گئے حملوں میں خواتین اور بچوں سمیت 36 شہری شہید ہوئے، جبکہ 163 افراد زخمی ہوئے ہیں۔ تین رہائشی مکانات مکمل طور پر تباہ ہو گئے ہیں۔"