جنیوا

 ہندوستان نے اقوامِ متحدہ کی انسانی حقوق کونسل کے 61ویں اجلاس میں پاکستان کو سخت جواب دیا۔ یہ اجلاس 23 فروری سے 31 مارچ تک منعقد ہو رہا ہے۔ ہندوستان نے اسلام آباد پر پروپیگنڈا پھیلانے کا الزام عائد کیا اور کہا کہ جموں و کشمیر کی ترقی کا سفر پاکستان کی معاشی مشکلات کے بالکل برعکس ہے۔ 25 فروری کو ہونے والے اعلیٰ سطحی اجلاس میں حقِ جواب استعمال کرتے ہوئے، ہندوستان کی نمائندہ انوپما سنگھ نے پاکستان اور تنظیمِ تعاونِ اسلامی کی جانب سے لگائے گئے الزامات کو مسترد کر دیا۔ انہوں نے کہا کہ اس گروپ نے خود کو ایک رکن ملک کے لیے “ایکو چیمبر” کے طور پر استعمال ہونے دیا ہے۔

سنگھ نے کہا كہ ہم ان الزامات کو دو ٹوک انداز میں مسترد کرتے ہیں اور مزید کہا کہ پاکستان کا “مسلسل پروپیگنڈا اب حسد کی بو دیتا ہے۔ انہوں نے ہندوستان کے دیرینہ مؤقف کو دہراتے ہوئے کہا کہ جموں و کشمیر “ماضی میں بھی، آج بھی اور ہمیشہ ہندوستان کا اٹوٹ اور ناقابلِ تنسیخ حصہ رہے گا۔” انہوں نے کہا کہ 1947 میں اس خطے کا ہندوستان سے الحاق مکمل طور پر قانونی اور ناقابلِ واپسی تھا، جو انڈین انڈیپنڈنس ایکٹ اور بین الاقوامی قانون کے مطابق ہے۔

انہوں نے کہا كہ اس خطے سے متعلق واحد زیرِ التوا تنازع پاکستان کی جانب سے ہندوستانی علاقوں پر غیر قانونی قبضہ ہے،” اور اسلام آباد سے مطالبہ کیا کہ وہ اپنے زیرِ قبضہ علاقوں کو خالی کرے۔

کونسل میں ایک دو ٹوک تبصرے میں، جس نے خاص توجہ حاصل کی، سنگھ نے خطے میں بنیادی ڈھانچے اور معاشی ترقی کا حوالہ دیا، جن میں چناب ریل پل کا افتتاح بھی شامل ہے، جسے دنیا کا بلند ترین ریلوے پل قرار دیا جاتا ہے۔

انہوں نے کہا كہ اگر جموں و کشمیر میں گزشتہ سال افتتاح کیا گیا دنیا کا بلند ترین پل، چناب ریل پل، جعلی ہے تو پھر پاکستان یا تو واہموں میں مبتلا ہے یا ‘خیالی دنیا’ میں رہ رہا ہے۔

انہوں نے مزید دعویٰ کیا کہ جموں و کشمیر کا ترقیاتی بجٹ اُس حالیہ بیل آؤٹ پیکیج سے “دوگنا سے بھی زیادہ” ہے جو پاکستان نے بین الاقوامی مالیاتی فنڈ سے طلب کیا تھا۔ انہوں نے یونین ٹیریٹری میں حکمرانی اور ترقی کو پاکستان کے معاشی چیلنجز کے مقابل رکھا۔ جمہوری عمل پر تنقید کے جواب میں، سنگھ نے کہا کہ “اس ملک سے جمہوریت پر لیکچر لینا مشکل ہے جہاں سویلین حکومتیں شاذ و نادر ہی اپنی مدت پوری کرتی ہیں۔” انہوں نے جموں و کشمیر میں حالیہ عام اور اسمبلی انتخابات میں ووٹر ٹرن آؤٹ کا حوالہ دیتے ہوئے کہا کہ خطے کے عوام نے “دہشت گردی اور تشدد کی نظریے کو مسترد کر دیا ہے” اور ترقی کی راہ پر آگے بڑھ رہے ہیں۔

اپنے اختتامی کلمات میں، سنگھ نے پاکستان پر “مسلسل ریاستی سرپرستی میں دہشت گردی” کے ذریعے خطے کو غیر مستحکم کرنے کی کوشش کا الزام لگایا، جبکہ اس بات پر زور دیا کہ جموں و کشمیر سیاسی، معاشی اور سماجی طور پر ترقی کی جانب گامزن ہے۔

انہوں نے کہا كہ پاکستان کو چاہیے کہ وہ اس طرح کے پلیٹ فارم پر نمائشی بیانات دینے کے بجائے اپنے بڑھتے ہوئے اندرونی بحران کو درست کرنے پر توجہ دے،” اور مزید کہا کہ “دنیا اس کی اس دکھاوے بازی کو بخوبی پہچانتی ہے۔

یہ تبادلہ اقوامِ متحدہ کی انسانی حقوق کونسل جیسے کثیرالجہتی فورمز پر جموں و کشمیر کے معاملے پر ہندوستان اور پاکستان کے درمیان جاری سخت سفارتی کشمکش کی تازہ ترین کڑی ہے۔