واشنگٹن ڈی سی :امریکہ جنوری پندرہ اے این آئی کے مطابق امریکہ نے بدھ کے روز مقامی وقت کے مطابق پچھتر ممالک کے شہریوں کے لیے امیگرنٹ ویزوں کے اجرا پر باضابطہ طور پر عارضی پابندی کا اعلان کیا ہے جن میں پاکستان بھی شامل ہے۔ امریکی محکمہ خارجہ کے بیان کے مطابق اس فیصلے کی وجہ یہ خدشہ ہے کہ کچھ تارکین وطن عوامی فلاحی سہولتوں کا غلط استعمال کر سکتے ہیں۔
محکمہ خارجہ نے بتایا کہ یہ فیصلہ صدر ڈونلڈ ٹرمپ کی ہدایت پر جاری ایک وسیع تر پالیسی جائزے کا حصہ ہے۔ صدر ٹرمپ بارہا اس بات پر زور دے چکے ہیں کہ امریکہ آنے والے تارکین وطن کو مالی طور پر خود کفیل ہونا چاہیے اور امریکی ٹیکس دہندگان پر بوجھ نہیں بننا چاہیے۔ پالیسی اپ ڈیٹ جس کا عنوان ہائی رسک ممالک کے شہریوں کے لیے امیگرنٹ ویزا پراسیسنگ اپ ڈیٹس ہے چودہ جنوری کو آخری بار اپ ڈیٹ کی گئی اور اس پر اکیس جنوری دو ہزار چھبیس سے عمل درآمد ہوگا۔
محکمہ خارجہ کے بیان میں کہا گیا ہے کہ تمام موجودہ پالیسیوں ضوابط اور رہنما ہدایات کا مکمل جائزہ لیا جا رہا ہے تاکہ ان ممالک سے آنے والے افراد امریکہ میں فلاحی سہولتوں پر انحصار نہ کریں اور پبلک چارج نہ بنیں۔ اس نئی ہدایت کے تحت پاکستان افغانستان بنگلہ دیش ایران عراق نائجیریا روس صومالیہ سوڈان شام اور یمن سمیت فہرست میں شامل ممالک کے شہری ویزا کے لیے درخواستیں دے سکتے ہیں اور مقررہ انٹرویوز میں بھی شریک ہو سکتے ہیں۔
تاہم اس عارضی مدت کے دوران ان ممالک کے شہریوں کو کوئی امیگرنٹ ویزا جاری نہیں کیا جائے گا۔ محکمہ خارجہ نے واضح کیا ہے کہ اس فیصلے کا اطلاق پہلے سے جاری شدہ امیگرنٹ ویزوں پر نہیں ہوگا۔ امریکہ میں داخلے سے متعلق معاملات امریکی محکمہ داخلی سلامتی کے دائرہ اختیار میں آتے ہیں۔
یہ پابندی صرف امیگرنٹ ویزوں تک محدود ہے اور نان امیگرنٹ ویزوں پر اس کا کوئی اثر نہیں پڑے گا جن میں سیاحتی اور کاروباری ویزے شامل ہیں۔ فاکس نیوز کے مطابق یہ اقدام ان تارکین وطن کے خلاف سختی کا حصہ ہے جن کے بارے میں خدشہ ہے کہ وہ مستقبل میں پبلک چارج بن سکتے ہیں۔
پبلک چارج امریکی امیگریشن قانون کا ایک معیار ہے جس کے تحت یہ جانچا جاتا ہے کہ کوئی غیر ملکی شہری حکومتی امداد پر بنیادی طور پر انحصار کرے گا یا نہیں۔ نومبر دو ہزار پچیس میں محکمہ خارجہ کی جانب سے دنیا بھر میں تعینات سفارتی دفاتر کو ایک کیبل بھیجی گئی تھی جس میں پبلک چارج شق کے تحت اسکریننگ کے دائرے کو وسیع کرنے کی ہدایت دی گئی تھی۔
ان ہدایات کے مطابق قونصلر افسران درخواست گزار کی صحت عمر انگریزی زبان کی مہارت مالی حیثیت اور طویل مدتی طبی ضرورت جیسے عوامل کو مدنظر رکھتے ہوئے ویزا مسترد کر سکتے ہیں۔ یہ قدم ٹرمپ انتظامیہ کی سخت امیگریشن پالیسی کے عین مطابق قرار دیا جا رہا ہے۔
