اسلام آباد :سیاچن میں پاکستانی فوج کا ایوی ایشن ہیلی کاپٹر گر کر تباہ ہو گیا جس کے نتیجے میں ہیلی کاپٹر میں سوار دو میجر ہلاک ہو گئے۔

پاک فوج کے شعبہ تعلقات عامہ (آئی ایس پی آر) کے مطابق سیاچن میں پاک فوج کا ہیلی کاپٹر گر کر تباہ ہو گیا اور ہیلی کاپٹر میں سوار میجر راجا ذیشان جہانزیب اور میجر عرفان برچا کی موت ہوگئی۔

پاک فوج نے ریسکیو آپریشن شروع کردیا ہے اور فوجی دستے جائے حادثہ پر پہنچ گئے ہیں۔

گلگت بلتستان کی صوبائی حکومت کے مطابق حادثہ ضلع گانچھے میں پیش آیا جس میں پاک فوج کے دو پائلٹ ہلاک ہوئے۔وزیر اعلیٰ گلگت بلتستان خالد خورشید نے واقعے پر افسوس کا اظہار کرتے ہوئے کہا کہ حادثے میں ہلاک ہونے والے میجر عرفان اور میجر ذیشان کے خاندان سے تعزیت کرتے ہیں۔

واضح رہے کہ گزشتہ سال دسمبر میں بھی گلگت بلتستان کے ضلع استور کے علاقے منی مرگ میں پاکستان آرمی ایوی ایشن کا ہیلی کاپٹر گر کر تباہ ہونے سے 4 فوجی جوان ہوگئے تھے۔

رواں سال پاک فضائیہ کا لڑاکا طیارہ تربیتی پرواز کے دوران گرکر تباہ ہو گیاتھا تاہم طیارے میں سوار دونوں پائلٹ باحفاظت اترنے میں کامیاب ہو گئے تھے۔

اسی طرح کا ایک حادثہ 2016 میں پیش آیا تھا جب پاک فوج کا ہیلی کاپٹر تربیتی پرواز کے دوران تربیلا کے قریب گر کر تباہ ہو گیا تھا اور حادثے میں ہیلی کاپٹر کے فلائنگ آفیسر لیفٹیننٹ کرنل توقیر ہلاک ہو گئے تھے۔

مئی 2015 میں گلگت بلتستان کے علاقے نلتر میں پاک فوج کا ہیلی کاپٹر لینڈنگ کے دوران گر کر تباہ ہوگیا تھا جس کے نتیجے میں 2 پائلٹ اور 2 غیر ملکی سفیروں سمیت 7 افراد جاں بحق ہوگئے تھے۔

اسی سال اگست میں بھی خیبرپختونخوا کے ضلع مانسہرہ میں ایک فوجی ہیلی کاپٹر کو حادثہ پیش آیا تھا جس کے نتیجے میں دونوں پائلٹس سمیت 12 افراد ہلاک ہوگئے تھے۔