خیبر پختونخوا : ضلع بنوں میں مسلح عسکریت پسندوں نے مختلف علاقوں سے دو اسکول اساتذہ سمیت چار سرکاری اہلکاروں کو مبینہ طور پر اغوا کر لیا ہے، اس کا انکشاف  روزنامہ ڈان نے  ایک رپورٹ میں کیا۔ڈان کے مطابق دونوں اساتذہ کو گورنمنٹ ہائی اسکول زِندی موسیٰ خان، منڈاتی نائکہ زیارت کے علاقے سے اغوا کیا گیا جو ہوید تھانے کی حدود میں آتا ہے۔ ضلع پولیس افسر (ڈی پی او) سلیم عباس کلاچی نے بتایا کہ یہ علاقہ طویل عرصے سے عسکریت پسندوں کے خطرے میں رہا ہے اور گزشتہ چند ماہ میں ہوید تھانہ متعدد حملوں کی زد میں آ چکا ہے۔

ڈی پی او کلاچی نے کہا کہ نامعلوم مسلح افراد نے اساتذہ کو اس وقت روکا جب وہ اسکول سے واپس جا رہے تھے اور انہیں نامعلوم مقام پر لے گئے۔ اغوا ہونے والوں میں اسکول کے ہیڈ ماسٹر شامل ہیں جو نیکم ککی کے رہائشی ہیں جبکہ دوسرے ایک سینئر استاد ہیں جو بنوں کے رہنے والے ہیں۔ پولیس ترجمان کاشف نواز کے مطابق سیکیورٹی فورسز نے مغوی اساتذہ کی محفوظ بازیابی کے لیے علاقے میں بڑے پیمانے پر سرچ آپریشن شروع کر دیا ہے۔

ایک علیحدہ واقعے کی تصدیق کرتے ہوئے ڈی پی او کلاچی نے بتایا کہ 15 سے 20 عسکریت پسندوں کے ایک گروہ نے ضلع میں بے نظیر انکم سپورٹ پروگرام (بی آئی ایس پی) کے ادائیگی مرکز پر حملہ کر کے دو ملازمین کو اغوا کر لیا۔

ان اغوا ہونے والوں میں اسسٹنٹ ڈائریکٹر صفی اللہ اور سپروائزر شاہ خالد شامل ہیں۔ حکام کے مطابق عسکریت پسند اغوا کے بعد ایک نامعلوم رقم لوٹ کر فرار ہو گئے۔یہ دونوں واقعات خیبر پختونخوا میں بڑھتے ہوئے عسکریت پسندانہ حملوں کے پس منظر میں پیش آئے ہیں۔ بنوں کے علاوہ پشاور، کرک، لکی مروت اور باجوڑ میں حالیہ ہفتوں میں دہشت گردی کے متعدد واقعات پیش آ چکے ہیں ۔

صرف دو روز قبل بنوں کے قریب ایک فائرنگ کے واقعے میں ایک فوجی شہید اور دوسرا زخمی ہوا تھا۔ اگست میں اسی ضلع میں ایک چیک پوسٹ پر حملے میں ایک پولیس کانسٹیبل ہلاک ہوا تھا جبکہ جوابی کارروائی میں تین عسکریت پسند مارے گئے اور تین پولیس اہلکار زخمی ہوئے تھے۔