اسلام آباد۔ پاکستان کی سپریم کورٹ نے سابق وزیر اعظم اور جیل میں قید عمران خان کی صحت سے متعلق بڑھتی تشویش کے پیش نظر منگل کے روز انہیں طبی معائنے کے لیے اسلام آباد کے شفا انٹرنیشنل اسپتال منتقل کرنے کا حکم دیا ہے۔ ڈان کی رپورٹ کے مطابق عدالت نے عمران خان کی جانب سے اسپتال منتقل کیے جانے کی درخواست پر یہ حکم جاری کیا۔

جسٹس شاہد وحید کی سربراہی میں 3 رکنی بینچ نے معاملے کی سماعت کی۔ بینچ میں جسٹس نعیم اختر افغان اور جسٹس اشتیاق ابراہیم بھی شامل تھے۔عدالت نے سیاسی قیدیوں پر عائد پابندیوں اور تنہائی کے معاملے کو بھی مدنظر رکھتے ہوئے حکام کو عمران خان کی اہل خانہ سے ہر ہفتے ملاقات یقینی بنانے کی ہدایت کی۔ عدالت نے ایک میڈیکل بورڈ تشکیل دینے کا بھی حکم دیا جس میں عمران خان کے ذاتی معالج اور ان کی بہن عظمیٰ خان بھی شامل رہیں گی۔عدالتی حکم میں عمران خان کی صحت سے متعلق معلومات کو عام کرنے کے معاملے پر بھی ہدایات دی گئیں۔ عمران خان کے وکلا اور اہل خانہ کو ان کی میڈیکل رپورٹس میڈیا کے ساتھ شیئر کرنے یا معاملے کو سیاسی رنگ دینے سے گریز کرنے کو کہا گیا ہے۔

یہ حکم ایسے وقت میں سامنے آیا ہے جب پاکستان کی جیلوں میں قیدیوں کی صورتحال اور عمران خان کی صحت کے بارے میں تشویش بڑھ رہی ہے۔ ڈان کے مطابق اڈیالہ جیل کے سپرنٹنڈنٹ نے ایک روز قبل سپریم کورٹ میں عمران خان کی صحت سے متعلق رپورٹ پیش کی تھی۔ عمران خان اگست 2023 سے اڈیالہ جیل میں قید ہیں۔

پاکستان کے سابق صدر عارف علوی نے بھی منگل کے روز عمران خان کی صحت پر شدید تشویش کا اظہار کیا۔ سوشل میڈیا پلیٹ فارم ایکس پر ایک پوسٹ میں انہوں نے عمران خان کی بے چینی۔ بلند فشار خون اور 54 دھڑکن فی منٹ کی دل کی رفتار کا ذکر کرتے ہوئے کہا کہ تنہائی ان کے جسم پر جسمانی اثرات ڈال رہی ہے۔ انہوں نے آزاد ڈاکٹروں کے پینل کی نگرانی میں عمران خان کو فوری طور پر اسپتال منتقل کرنے کا مطالبہ کیا۔

عمران خان کی صحت سے متعلق یہ صورتحال اس وقت سامنے آئی ہے جب ان تک رسائی پر بھی سخت پابندیاں عائد ہونے کی اطلاعات ہیں۔ عمران خان کے بیٹوں سلیمان خان اور قاسم خان نے سی این این کو بتایا کہ انہیں اپنے والد کی صحت کے بارے میں کوئی تازہ معلومات نہیں مل رہیں۔ ان کے مطابق خاندان کے افراد۔ وکلا اور ڈاکٹر گزشتہ 7 ماہ سے عمران خان سے ملاقات نہیں کر سکے ہیں۔

عمران خان کے حامیوں کی جماعت پاکستان تحریک انصاف کے کارکنوں نے بھی ملک بھر میں مظاہرے کیے ہیں اور پارٹی کے بانی عمران خان اور ان کی اہلیہ بشریٰ بی بی کی فوری رہائی کا مطالبہ کیا ہے۔عمران خان کی گرفتاری اور ان کے خلاف مقدمات کا سلسلہ 2023 میں شروع ہوا۔ ان کے ساتھی ان مقدمات کو سیاسی نوعیت کا قرار دیتے رہے ہیں۔ 2022 میں پارلیمانی عدم اعتماد کے ذریعے حکومت سے برطرفی کے بعد عمران خان اور ان کی جماعت کو طویل سیاسی کشمکش اور حکومتی کارروائیوں کا سامنا رہا۔ 2024 کے عام انتخابات میں عمران خان اور تحریک انصاف کی قیادت کو انتخابی عمل میں حصہ لینے سے روکنے کے اقدامات نے بھی ملک میں سیاسی کشیدگی کو مزید بڑھایا۔