کراچی۔ پاکستان کے صوبہ سندھ سے تعلق رکھنے والی لیڈی ہیلتھ ورکرز نے پیر کے روز کلفٹن کے تین تلوار پر بڑا دھرنا دیا اور صوبائی حکومت سے مطالبہ کیا کہ لیڈی ہیلتھ ورکرز پروگرام کو محکمہ صحت کے تحت برقرار رکھا جائے اور سروس اسٹرکچر اور ریٹائرمنٹ فوائد سمیت دیرینہ مسائل فوری طور پر حل کیے جائیں۔ڈان کی رپورٹ کے مطابق آل سندھ لیڈی ہیلتھ ورکرز اینڈ ایمپلائز یونین کے زیر اہتمام احتجاج پیر کی رات محکمہ صحت کے سیکریٹری کے ساتھ کامیاب مذاکرات کے بعد ختم ہوا۔

احتجاج ابتدائی طور پر کلفٹن میں بلاول چورنگی پر ہونا تھا تاہم پولیس کی جانب سے راستے بند کیے جانے کے باعث مظاہرین نے اپنا راستہ تبدیل کیا اور احتجاجی مقام تین تلوار منتقل کر دیا۔یونین کی قیادت نے دعویٰ کیا کہ قانون نافذ کرنے والے اداروں نے 400 سے زائد کارکنوں کو حراست میں لیا۔ تاہم ایک پولیس افسر نے بتایا کہ مرکزی سڑک بند کرنے پر تقریباً 150 لیڈی ہیلتھ ورکرز کو حراست میں لیا گیا تھا اور بعد میں سب کو رہا کر دیا گیا۔

احتجاج سے خطاب کرتے ہوئے آل سندھ لیڈی ہیلتھ ورکرز اینڈ ایمپلائز یونین کی مرکزی صدر حلیمہ ذوالقرنین لغاری نے لیڈی ہیلتھ ورکرز پروگرام کا انتظام نجی اداروں کو منتقل کرنے کی مخالفت کی۔ ان میں پیپلز پرائمری ہیلتھ کیئر انیشی ایٹو بھی شامل ہے۔انہوں نے کہا کہ ہمارا بنیادی مطالبہ ہے کہ لیڈی ہیلتھ ورکرز کو محکمہ صحت کے تحت رکھا جائے اور انہیں پروگرام کی پالیسی کے مطابق کام جاری رکھنے کی اجازت دی جائے۔ انہوں نے مناسب سروس اسٹرکچر۔ ٹائم اسکیل پروموشن۔ پنشن اور ریٹائرڈ ملازمین کے لیے گریجویٹی کا بھی مطالبہ کیا۔

لغاری نے کہا کہ صحت کے عملے کو مسلسل نظر انداز کیا جا رہا ہے۔ ان کے مطابق لیڈی ہیلتھ ورکرز کو 2012 میں مستقل کیے جانے کے باوجود 14 سال کی سروس مکمل کرنے کے بعد بھی وہ نچلے گریڈز میں کام کر رہی ہیں۔یونین کی جنرل سیکریٹری شما گلانی نے صوبائی محکمہ صحت میں ترقی کے مواقع میں مبینہ امتیاز پر سوال اٹھاتے ہوئے کہا کہ جب اسی پروگرام میں افسران کو اعلیٰ اسکیل دیا جاتا ہے تو نچلے درجے کے کارکنوں کو اسی موقع سے کیوں محروم رکھا جاتا ہے۔

مظاہرین نے پیپلز پرائمری ہیلتھ کیئر انیشی ایٹو کو منتقل کیے گئے ادویات کے بجٹ کو واپس بحال کرنے کا بھی مطالبہ کیا۔ اس کے علاوہ سپروائزرز کی گاڑیوں کے لیے مرمت اور ایندھن کے الاؤنس کی بحالی کا مطالبہ بھی کیا گیا۔یونین نے کہا کہ ضلعی سطح پر مناسب فنڈز ڈسٹرکٹ ہیلتھ افسران کے ذریعے مختص کیے جانے چاہئیں تاکہ ادویات کی مسلسل فراہمی۔ آلات کی مرمت اور دیگر ضروری انتظامی وسائل کی دستیابی یقینی بنائی جا سکے۔

یونین کی سینئر نائب صدر نصیرہ پروین نے کہا کہ پیر کا احتجاج ایک وسیع اور مسلسل پرامن جدوجہد کا حصہ ہے جو 3 جولائی کو حیدرآباد پریس کلب کے سامنے احتجاج سے شروع ہوئی تھی۔ اس کے بعد بنیادی مراکز صحت۔ دیہی مراکز صحت اور ضلعی ہیڈکوارٹرز میں بھی مظاہرے کیے گئے۔آل سندھ لیڈی ہیلتھ ورکرز اینڈ ایمپلائز یونین کی قیادت نے پاکستان پیپلز پارٹی کے چیئرمین بلاول بھٹو زرداری۔ سندھ کے وزیر اعلیٰ اور صوبائی وزیر صحت سے مداخلت کرنے اور ہیلتھ پروگرام کو برقرار رکھنے کی اپیل کی۔

حلیمہ لغاری نے کہا کہ یہ شہید محترمہ بے نظیر بھٹو کا پروگرام ہے۔ ہم پیپلز پارٹی کے چیئرمین بلاول بھٹو زرداری سے اپیل کرتے ہیں کہ وہ اس ورثے کا احترام کریں اور فرنٹ لائن ہیلتھ ورکرز کو ان کے جائز حقوق فراہم کریں۔یونین قیادت نے سندھ حکومت سے فوری مذاکرات کا مطالبہ کرتے ہوئے ٹریڈ یونینز۔ مزدور تنظیموں۔ انسانی حقوق کے کارکنوں اور سول سوسائٹی سے بھی ملازمت کے تحفظ۔ منصفانہ ترقی اور بنیادی مزدور حقوق کی جدوجہد میں حمایت کی اپیل کی ہے۔