نئی دہلی

ہندوستان میں اسرائیل کے سفیر رووین آذر نے وزیر اعظم نریندر مودی کے اسرائیل کے دورے کے وقت اور اس کے بعد امریکہ اور اسرائیل کی جانب سے ایران کے خلاف مشترکہ فوجی کارروائیوں کے بارے میں جاری مختلف “نظریات” پر ردعمل ظاہر کیا ہے۔فروری کے آخر میں ہونے والے اس دورے کے پس منظر میں موجود جغرافیائی سیاسی صورتحال پر بات کرتے ہوئے سفیر نے کہا کہ خطے میں عدم استحکام پہلے ہی سے ایک معلوم حقیقت تھا۔

انہوں نے کہا كہ یہ بات واضح تھی کہ ہمارے خطے میں صورتحال بہت غیر مستحکم ہے، اور یہ بات وزیر اعظم نریندر مودی کے 25-26 فروری 2026 کو آنے سے پہلے ہی ظاہر ہو چکی تھی۔” اس طرح انہوں نے اس دورے کے پس منظر کی وضاحت کی۔

سفارتی شیڈول کو فوجی کارروائی کے وقت سے جوڑنے کے بارے میں بات کرتے ہوئے آذر نے کہا کہ حملہ کرنے کا فیصلہ مکمل طور پر تزویراتی حالات کے مطابق لیا گیا تھا، نہ کہ وزیر اعظم کے دورے کی وجہ سے۔انہوں نے کہا كہ جہاں تک حملہ کرنے کے فیصلے کا تعلق ہے تو عملی موقع وزیر اعظم مودی کے روانہ ہونے کے بعد ہی ملا۔” اس طرح انہوں نے اس تاثر کو مسترد کر دیا کہ دونوں واقعات آپس میں مربوط تھے۔

سفیر نے مزید بتایا کہ اس کارروائی کی باضابطہ منظوری بھی وزیر اعظم کے خطے سے روانہ ہونے کے بعد دی گئی تھی۔آذر کے مطابق، اس کارروائی کی منظوری کے لیے کابینہ کا فیصلہ صرف دو دن بعد لیا گیا تھا۔”اس طرح انہوں نے سفارتی دورے کے اختتام اور فوجی کارروائی کے آغاز کے درمیان واضح فرق کو اجاگر کیا۔دہلی میں ایک پریس کانفرنس کے دوران آذر نے موجودہ فوجی کارروائیوں کے طویل مدتی مقاصد کے بارے میں بھی وضاحت کی۔

انہوں نے زور دے کر کہا کہ نہ امریکہ اور نہ ہی اسرائیل کا ایران پر حملہ کر کے اسے قبضے میں لینے کا کوئی ارادہ ہے۔ ان کے مطابق اصل توجہ فوجی قبضے کے بجائے اندرونی دباؤ کے ذریعے تبدیلی لانے پر ہے۔

اسرائیلی سفیر نے کہا کہ مقصد یہ ہے کہ خطے میں زیادہ استحکام اور سلامتی کو یقینی بنایا جائے، اور ساتھ ہی ایرانی عوام کو اپنے ملک کی پالیسیوں یا قیادت میں تبدیلی کے لیے آواز اٹھانے کا موقع ملے۔انہوں نے کہا  كہ ہم ایرانی عوام کو ایسی صورتحال دینا چاہتے ہیں جس میں وہ پالیسی میں تبدیلی یا حکومت میں تبدیلی کے لیے دباؤ ڈال سکیں۔انہوں نے مزید کہا كہ ہم دیکھیں گے کہ ایسا ہوتا ہے یا نہیں، لیکن ہماری توجہ اسی مقصد پر مرکوز ہے۔ اس سے نہ صرف ایرانی عوام کو فائدہ ہوگا بلکہ خطے کے لیے ایک زیادہ مستحکم مستقبل بنانے کے ہمارے مقصد کو بھی تقویت ملے گی۔

آذر کے مطابق اگر مغربی ایشیا میں استحکام قائم ہوتا ہے تو اس سے خلیجی ممالک اور عالمی برادری کو بھی فائدہ پہنچے گا۔انہوں نے اس بات پر بھی زور دیا کہ مشرقِ وسطیٰ کو “ان خطرناک خطرات سے آزاد ہونا چاہیے جو ایران پیدا کرنے کی کوشش کر رہا تھا۔یہ بیانات ایسے وقت میں سامنے آئے ہیں جب خطے میں کشیدگی میں شدید اضافہ ہوا ہے۔ اسرائیل بار بار ایران پر الزام لگاتا رہا ہے کہ وہ اپنے میزائل پروگرام اور مسلح گروہوں کی حمایت کے ذریعے خطے میں عدم استحکام پیدا کر رہا ہے۔

دوسری جانب ایران کا کہنا ہے کہ اس کے پروگرام صرف دفاعی مقاصد کے لیے ہیں۔ تاہم دونوں ممالک کے درمیان کشیدگی اکثر پراکسی جنگوں اور مخصوص فوجی حملوں کی صورت میں ظاہر ہوتی رہی ہے۔رووین آذر کے بیانات سے ظاہر ہوتا ہے کہ اسرائیل کے نزدیک خطے میں استحکام اسی وقت ممکن ہے جب ان سکیورٹی خطرات کا مقابلہ کیا جائے اور ساتھ ہی ایران کے اندر عوامی سطح پر سیاسی تبدیلی کے امکانات بھی موجود رہیں۔