تل ابیب: اسرائیلی وزیر اعظم بن یامین نیتن یاہو نے اپنے فوجی سیکریٹری میجر جنرل رومن گوفمین کو خفیہ ادارے موساد کا نیا سربراہ مقرر کر دیا ہے۔ یہ تقرری اعلیٰ سطحی مشاورتی کمیٹی کی منظوری کے بعد عمل میں آئی۔

وزیر اعظم نے اپنے بیان میں گوفمین کو ایک جرات مند اور تخلیقی افسر قرار دیتے ہوئے کہا کہ انہوں نے جنگ کے دوران غیر معمولی بصیرت اور مسائل کو منفرد انداز میں حل کرنے کی صلاحیت کا مظاہرہ کیا ہے۔ انہوں نے امید ظاہر کی کہ وہ اپنے نئے عہدے پر اسرائیل کی سلامتی کے لیے اہم کردار ادا کریں گے۔

وزیر اعظم کے دفتر کے مطابق رومن گوفمین 2 جولائی 2026 سے اپنے عہدے کا چارج سنبھالیں گے اور ان کی مدت پانچ سال ہوگی۔ وہ موجودہ سربراہ ڈیوڈ بارنیا کی جگہ لیں گے جن کی مدت جون میں مکمل ہو رہی ہے۔

گوفمین گزشتہ دو برسوں سے وزیر اعظم کے فوجی سیکریٹری کے طور پر خدمات انجام دے رہے تھے اور انہیں نیتن یاہو کا قریبی ساتھی سمجھا جاتا ہے۔ اس دوران انہوں نے مختلف اہم ذمہ داریاں نبھائیں اور اسرائیلی دفاعی افواج میں پالیسیوں کے نفاذ میں کردار ادا کیا۔

بیلاروس میں پیدا ہونے والے رومن گوفمین 1990 میں اپنے خاندان کے ساتھ اسرائیل منتقل ہوئے اور بعد ازاں فوج میں ترقی کرتے ہوئے ڈویژن کمانڈر کے عہدے تک پہنچے۔

7 اکتوبر 2023 کو ہونے والے حملے کے دوران وہ تزئیلیم ٹریننگ بیس کے کمانڈر تھے اور غزہ سرحد پر جھڑپ کے دوران شدید زخمی بھی ہوئے تھے۔

اس سے قبل انہوں نے ایک متنازع پالیسی دستاویز بھی تیار کی تھی جس میں حماس کی شکست کے بعد غزہ پر اسرائیلی فوجی کنٹرول برقرار رکھنے کی تجویز دی گئی تھی جس پر پالیسی حلقوں میں بحث ہوئی تھی۔