کٹھمنڈو: نیپال میں دریائے بھوٹے کوشی میں آنے والے تباہ کن سیلاب کے باعث بہہ جانے والے افراد کی لاشیں دریا کے بہاؤ کی سمت میں کافی دور تک مل رہی ہیں۔ بڑی تعداد میں لاشیں ملنے کے باعث کئی اضلاع کے مردہ خانوں میں جگہ کم پڑ گئی ہے اور حکام کو لاشوں کو رکھنے اور ان کی شناخت کے لیے عارضی انتظامات کرنے پڑ رہے ہیں۔

’دی کٹھمنڈو پوسٹ‘ کی رپورٹ کے مطابق، رسوا اور نواکوٹ سے بہہ کر آنے والی لاشیں چتوان، تناہون، نول پرسی، گورکھا اور دیگر اضلاع میں ملی ہیں۔ اس کے باعث کئی علاقوں کے مردہ خانوں کی گنجائش تقریباً پوری ہو چکی ہے۔ چتوان میں اسپتالوں کے مردہ خانوں کی گنجائش سے زیادہ لاشیں پہنچنے کے بعد بھرت پور میں ایک عارضی مرکز قائم کیا جا رہا ہے۔

بھرت پور میٹروپولیٹن-10 میں واقع ایک خالی سرکاری عمارت کو اس مرکز میں تبدیل کیا جائے گا، جہاں تقریباً 250 لاشیں رکھنے کی گنجائش ہونے کی امید ہے۔ جمعرات کو چتوان میں تریشولی اور ناراینی ندیوں کے درمیان فِشلنگ اور گولاگھاٹ کے علاقے سے 137 لاشیں برآمد کی گئیں۔ لاشیں ملنے کا سلسلہ اب بھی جاری ہے۔ لاپتہ افراد کے اہل خانہ بھی اپنے رشتہ داروں کی تلاش میں مختلف اضلاع سے چتوان پہنچ رہے ہیں۔

چتوان کے چیف ڈسٹرکٹ افسر گنیش آریال کے مطابق، ضلع کے اسپتالوں کے مردہ خانوں میں مجموعی طور پر صرف 30 سے 50 لاشیں رکھنے کی گنجائش ہے۔ اگر عارضی مرکز کی گنجائش بھی کم پڑ گئی تو دیوگھاٹ میں واقع برقی شمشان گھاٹ کو اضافی متبادل کے طور پر استعمال کیا جائے گا۔ دوسری جانب، سیلاب سے متاثرہ اضلاع سے لاشیں پہنچنے کے باعث پوکھرا کے مردہ خانوں میں بھی جگہ تقریباً ختم ہو چکی ہے۔

تناہون، گورکھا، نول پرسی ایسٹ اور دھادِنگ سے 93 لاشیں پوکھرا لائی گئی ہیں۔ کاسکی کے چیف ڈسٹرکٹ افسر کُمان سنگھ گرونگ نے بتایا کہ ضلع کے اسپتالوں میں مجموعی طور پر 88 لاشیں رکھنے کی گنجائش ہے اور یہ گنجائش پہلے ہی پوری ہو چکی ہے۔ انہوں نے کہا کہ فی الحال لاشوں کو رکھنے کا انتظام کر لیا گیا ہے، لیکن اگر مزید لاشیں پہنچتی ہیں تو پڑوسی اضلاع کے ساتھ تال میل کرنا پڑے گا۔