نئی دہلی
نیپال کے وزیرِ خارجہ ششر خانال جمعہ کو دو روزہ سرکاری دورے پر ہندوستان پہنچ گئے۔خانال ہفتے کے روز وزیرِ خارجہ ایس جے شنکر کے ساتھ مذاکرات کریں گے اور اتوار کو واپس روانہ ہوں گے۔ان کی آمد کا خیرمقدم کرتے ہوئے وزارتِ خارجہ کے ترجمان رندھیر جیسوال نے ایکس پر ایک پوسٹ میں کہا کہ نیپال کے وزیرِ خارجہ ششر خانال کو ان کے پہلے سرکاری دورۂ ہندوستان پر خوش آمدید۔ اعلیٰ سطحی رابطوں کی روایت کو جاری رکھتے ہوئے یہ دورہ ہندوستان اور نیپال کے درمیان خصوصی شراکت داری کو مزید مضبوط بنانے میں مددگار ثابت ہوگا۔
اس سے قبل اپنی ہفتہ وار پریس بریفنگ کے دوران جیسوال سے پوچھا گیا کہ آیا خانال کے دورے کے ایجنڈے میں رابطہ کاری، تجارت اور سرحدی بنیادی ڈھانچے سے متعلق امور شامل ہیں یا نہیں۔
اس پر جیسوال نے کہا کہ نیپال کے وزیرِ خارجہ ابھی ابھی پہنچے ہیں اور وہ ہمارے وزیرِ خارجہ سے ملاقات کریں گے۔ نیپال کے ساتھ ہمارا ایجنڈا بہت وسیع ہے، جس میں ترقیاتی تعاون، عوامی روابط، تجارت اور سرمایہ کاری شامل ہیں۔ ہم اس کثیر جہتی شراکت داری کو مزید مضبوط بنانے کے خواہاں ہیں۔
جیسوال سے یہ بھی سوال کیا گیا کہ کیا وزیرِ خارجہ نیپال کے وزیرِ اعظم کی جانب سے حالیہ بیان پر بات کریں گے، جس میں الزام لگایا گیا تھا کہ ہندوستان نے نیپال کے کچھ علاقے پر قبضہ کر رکھا ہے۔
اس کے جواب میں جیسوال نے کہا کہ ملاقات میں تمام متعلقہ دوطرفہ امور پر بات چیت ہوگی۔ جہاں تک سرحدی معاملات کا تعلق ہے، ہم پہلے ہی اپنا مؤقف واضح کر چکے ہیں اور ایسے مسائل پر بات چیت اور حل کے لیے ایک دوطرفہ نظام موجود ہے۔ کسی بھی اعلیٰ سطحی دورے کے بارے میں مناسب وقت پر معلومات فراہم کی جائیں گی۔
خانال کا یہ دورہ وزیرِ اعظم بلندر شاہ کی حکومت کے رواں سال مارچ میں اقتدار سنبھالنے کے بعد نیپال کی جانب سے سب سے اعلیٰ سطحی سرکاری رابطہ تصور کیا جا رہا ہے۔
یہ دورہ ایس جے شنکر کی دعوت پر ہو رہا ہے۔نیپال کی وزارتِ خارجہ کے بیان کے مطابق:دورے کے دوران وزیرِ خارجہ ششر خانال نئی دہلی میں ہندوستان کے وزیرِ خارجہ ڈاکٹر ایس جے شنکر کے ساتھ باضابطہ ملاقات کریں گے۔ دونوں فریق تجارت، سرمایہ کاری، رابطہ کاری، توانائی اور عوامی تعلقات سمیت باہمی دلچسپی کے مختلف امور پر تبادلہ خیال کریں گے تاکہ تعاون کو مزید فروغ دیا جا سکے۔
اعلیٰ سطحی سفارتی تبادلوں کے معمول کے سلسلے کا حصہ بننے والا یہ دورہ نیپال اور ہندوستان کے درمیان دیرینہ، کثیر جہتی اور تاریخی تعلقات کو مزید مضبوط بنانے کی سمت ایک اہم قدم سمجھا جا رہا ہے۔یہ اعلان ایسے وقت میں سامنے آیا ہے جب نیپال کی راشٹریہ سواتنترا پارٹی کے صدر ربی لامیچھانے بھی ہندوستان کے دورے پر ہیں۔ انہوں نے بدھ کے روز نئی دہلی میں وزیرِ اعظم نریندر مودی سے ملاقات کی تھی۔
