کھٹمنڈو: نیپال میں راسووا کے سیلاب اور دیگر متاثرہ علاقوں میں ہلاکتوں کی تعداد 1385 تک پہنچ گئی ہے جبکہ 5130 افراد تاحال لاپتہ ہیں۔ نیپال کی قومی قدرتی آفات کے خطرات میں کمی اور انتظامی اتھارٹی کی جانب سے جاری تازہ تلاش بچاؤ اور امدادی رپورٹ میں یہ اعداد و شمار سامنے آئے ہیں۔

جمعہ کو صبح 11 بجے جاری رپورٹ کے مطابق چتوان میں سب سے زیادہ 364 افراد ہلاک ہوئے ہیں۔ اس کے بعد مشرقی نوالپراسی میں 228 مغربی نوالپراسی میں 222 نوواکوت میں 199 اور راسووا میں 185 اموات ہوئی ہیں۔ گورکھا میں 77 دھادنگ میں 70 اور تنہون میں 38 افراد ہلاک ہوئے جبکہ کھٹمنڈو میں علاج کے دوران بھی دو افراد کی موت ہوئی۔

امدادی کارروائیوں کے دوران اب تک 13676 افراد کو محفوظ مقامات پر منتقل کیا جا چکا ہے۔ متاثرہ علاقوں میں تلاش اور بچاؤ کے ساتھ ساتھ امدادی سرگرمیاں بھی مسلسل جاری ہیں۔

بے گھر افراد کے لیے 37 عارضی مراکز قائم کیے گئے ہیں جہاں متاثرین کو پناہ دی جا رہی ہے۔ نوواکوت میں سب سے زیادہ 2615 افراد ان مراکز میں موجود ہیں جبکہ راسووا میں 775 اور دھادنگ میں 295 افراد مقیم ہیں۔

نیپال حکومت نے امدادی کارروائیوں کے لیے 21022 سکیورٹی اہلکار تعینات کیے ہیں جن میں نیپالی فوج کے 8844 اہلکار نیپال پولیس کے 7975 اہلکار اور مسلح پولیس فورس کے 4203 اہلکار شامل ہیں۔

حکام کے مطابق متاثرہ اضلاع تک سڑک اور فضائی راستوں سے خوراک اور دیگر ضروری امدادی سامان پہنچایا جا رہا ہے۔ نوواکوت کے دیوی گھاٹ میں ایک عارضی پل بھی نصب کرکے آمد و رفت کے لیے کھول دیا گیا ہے تاکہ متاثرہ علاقوں سے رابطہ بہتر بنایا جا سکے۔

بڑھتی ہوئی تباہی کے درمیان ہندوستان نے بھی نیپال میں تلاش بچاؤ امداد اور فرانزک کارروائیوں میں تعاون جاری رکھا ہے۔ بدھ کو ہندوستانی فضائیہ کی جانب سے انسانی امداد لے کر آٹھویں پرواز کھٹمنڈو پہنچی۔

وزارت خارجہ کے مطابق ہندوستان نے 26 اگست سے اب تک آٹھ خصوصی پروازوں کے ذریعے نیپال کو 130 ٹن سے زیادہ امدادی سامان فراہم کیا ہے۔ ہندوستان نے نیپال کی جاری تلاش بچاؤ امدادی اور فرانزک کارروائیوں میں مدد کے لیے 54 ماہر اہلکار بھی تعینات کیے ہیں۔

امدادی سامان میں عارضی خیمے کمبل حفظان صحت کے سامان شمسی چراغ اور ادویات شامل ہیں۔ اس کے علاوہ سرنگوں اور کیچڑ میں پھنسے افراد کو نکالنے کے لیے خصوصی آلات ڈی این اے شناخت کے لیے ضروری سامان اور دیگر ہنگامی وسائل بھی فراہم کیے گئے ہیں۔