تہران (ایران): ایران کے سپریم لیڈر کے فوجی مشیر محسن رضائی نے امریکہ کی جانب سے ایران کے خلاف بحری ناکہ بندی کی کسی بھی کوشش پر سخت انتباہ جاری کیا ہے۔ ایرانی سرکاری میڈیا پریس ٹی وی کے مطابق ایک ٹیلیویژن انٹرویو میں رضائی نے کہا کہ اسلامی جمہوریہ کی فوج براہِ راست امریکی بحری اثاثوں سے خطرہ محسوس ہونے کی صورت میں پوری طرح تیار ہے۔

انہوں نے کہا، "دباؤ بڑھانا چاہیے۔ ہمارے لانچرز اب جنگی بحری جہازوں پر لاک ہو چکے ہیں، اور ہم انہیں سب کو ڈبو دیں گے۔" پریس ٹی وی کے مطابق انہوں نے آبنائے ہرمز میں امریکی ناکہ بندی کی کوششوں کا حوالہ دیتے ہوئے کہا کہ یہ اقدام ناکام ہوگا اور ایران اس کا مؤثر جواب دینے کی صلاحیت رکھتا ہے۔ رضائی نے کہا، "جس طرح امریکہ آبنائے ہرمز کو کھلوانے کی کوشش میں تاریخی شکست سے دوچار ہوا، اسی طرح بحری ناکہ بندی میں بھی وہ ناکام ہوگا۔"

انہوں نے مزید کہا کہ ایران کی مسلح افواج کسی بھی امریکی قیادت میں ناکہ بندی کو کامیاب نہیں ہونے دیں گی اور تہران کے پاس "بڑے غیر استعمال شدہ ذرائع" موجود ہیں جن کے ذریعے وہ جواب دے سکتا ہے۔ یہ بیان ایسے وقت میں سامنے آیا ہے جب امریکی سینٹرل کمانڈ (سینٹ کام) نے بدھ کو اعلان کیا تھا کہ ایران کی بندرگاہوں کی مکمل ناکہ بندی کامیابی سے نافذ کر دی گئی ہے اور امریکی افواج نے آبنائے ہرمز سمیت اہم علاقائی آبی راستوں پر بحری برتری حاصل کر لی ہے۔

سینٹ کام کے کمانڈر ایڈمرل بریڈ کوپر کے مطابق آپریشن شروع ہونے کے 36 گھنٹوں کے اندر امریکی افواج نے ایران میں داخل اور خارج ہونے والی تمام بحری تجارت کو مؤثر طور پر روک دیا۔ رضائی نے یہ بھی الزام لگایا کہ واشنگٹن نے اسرائیل کے ساتھ مل کر ایران کے خلاف پہلے بھی فوجی منصوبے بنائے تھے، جن میں اصفہان میں پیرا ٹروپرز اتار کر یورینیم مواد پر قبضے کی مبینہ کوشش شامل تھی تاہم ان دعوؤں کی آزادانہ تصدیق نہیں ہو سکی۔

انہوں نے مزید کہا کہ ایران کا خیال ہے کہ جب تک وسیع تر شرائط پوری نہ ہوں، کسی بھی جنگ بندی کو جاری رکھنا اس کے مفاد میں نہیں ہوگا۔ ان کے مطابق، جب تک تمام معاہدے اور ہمارے حقوق پورے نہیں ہوتے اور ایک قرارداد اقوام متحدہ کی سلامتی کونسل میں پیش نہیں کی جاتی، اس وقت تک جنگ بندی معنی نہیں رکھتی۔ ایرانی عہدیدار نے یہ بھی کہا کہ انسانی اور اخلاقی وجوہات کے تحت ایران نے عارضی جنگ بندی کو قبول کیا تھا۔ امریکہ کے ساتھ مستقبل کے مذاکرات کے حوالے سے رضائی نے احتیاط اور باریک بینی کی ضرورت پر زور دیا۔ انہوں نے کہا، ہمیں ہر ایک لفظ کے بارے میں حساس ہونا ہوگا۔